Dumonda Noi concernent eventualas contribuziuns finanzialas concedidas da la regenza per finanziar la campagna encunter las iniziativas federalas dal pievel davart las qualas è vegnì votà ils 18 da matg 2003
Sessiun: 14.06.2003
En il rom da la votaziun dal pievel dals 18 da matg 2003 che aveva, dasper auters projects, sco tema pliras iniziativas federalas dal pievel ha pretais in gremi d'infurmaziun che las regenzas dals chantuns da la Svizra da l'ost hajan concedì vaira grondas summas per la propaganda encunter las iniziativas en votaziun.
Perquai ch'igl è gia deplorabel ed eticamain discutabel che plirs organs executivs chantunals e perfin il cussegl federal recumondan cun perseveranza en occasiun da mintga votaziun dal pievel a las votantas ed als votants co ch'ellas/ch'els duain votar, empè da be far attent sin ils avantatgs e dischavantatgs dals projects da votaziun, fiss quai ussa tut al fauss lieu da duvrar daners publics- che derivan er da persunas che han suttascrit las iniziativas en questiun- per ina propaganda encunter la persvasiun da questas persunas.
E tut quest en in temp, nua ch'il pled-clav è 'spargnar'e nua vegnan sacrifitgads sin l'altar da quel las valurs ed il spiert da solidaritad.
Perquai dumond jau la regenza:
- Ha noss chantun mess a disposiziun meds finanzials per la propaganda encunter las iniziativas federalas dal pievel dals 18 da matg passà?
- Sche la resposta è schi , quant importa la summa ch'è vegnida duvrada per quai?
Cuira, ils 14 da zercladur 2003
Name: Noi
Session: 14.06.2003
Vorstoss: rg Interpellation
Resposta da la regenza
La regenza po punctuar cleramain ch'ella n'ha mess a disposiziun nagins meds finanzials per la campagna da votaziun encunter las iniziativas dal pievel, da las qualas è vegnì votà ils 18 da matg 2003 sin livel federal ("Gea a locaziuns gistas", "Iniziativa per las dumengias“, "Iniziativa da sanadad", "Medems dretgs per impedids“, "Electricitad senza implants nuclears", "Moratori plus“, "Iniziativa da plazzas d'emprendissadi“). Sco che las retschertgas internas han ultra da quai mussà, vala il medem er per ils departaments ed ils uffizis da l'administraziun chantunala.
En il connex preschent ston ins anc rinviar al fatg che l'admissibladad da l'intervenziun d'in chantun en il cumbat electoral tar votaziuns federalas è giuridicamain contestada. Ina part da la scienza resguarda però malgrà tut ina tala sco acceptabla per il cas ch'in chantun è pertutgà d'in project da votaziun da la confederaziun incumparablamain pli ferm ch'ils auters chantuns. La regenza pretenda per sai d'intervegnir alura cur ch'interess vitals dal chantun Grischun èn tangads.
Datum: 12 d'avust 2003