Sco quai ch'ils catasters da canera en il sectur da la via naziunala A 13 da la Val dal Rain grischuna mussan, èn tenor las directivas da l'ordinaziun federala davart la protecziun cunter canera mesiras necessarias unicamain en la regiun da Trimmis e da Cuira nord. L'exposiziun publica dals plans en il cas da Cuira è succedida e las paraids da protecziun cunter la canera vegnan realisadas en quest cas ils proxims onns. Oriundamain ha previs il program da sanaziun cunter la canera da la A13 per la vischnanca da Trimmis ina paraid da protecziun cunter la canera mo en la regiun da "Strässli", perquai che las limitas da canera decisivas vegnan surpassadas là mo tar singuls bains immobigliars. En il decurs dals scleriments da detagl han ins percurschì ch'i saja raschunaivel da prender per mauns er la renovaziun architectonica necessaria da questa part da la via naziunala. Las ponderaziuns d'optimar la dimensiun da la sanaziun, ils andaments da construcziun, ils custs sco er las emissiuns da canera e da svapurs han mussà ch'in spustament dal vial dal nord represchentia la soluziun la pli raschunaivla e che la durabilitad soziala ed ecologica saja garantida uschia il meglier. L'exposiziun publica dals plans dal project ha, cun l'approvaziun da la confederaziun, pli probabel lieu la primavaira 2004. Indicaziuns fidadas davart l'entschatta da las lavurs da construcziun na pon betg vegnir fatgas pervi da las mesiras da spargn da la confederaziun. Per la realisaziun da las paraids da protecziun cunter la canera oriundamain previsas a Trimmis stuess vegnir quintà cun custs da 2 - 3 milliuns francs, damai che tschertas lavurs d'amplificaziun e da sanaziun minimalas, sco la construcziun d'in vial da panna mo d'ina vart da la via, fissan indispensablas er tar questa soluziun.
La regenza è areguard questas circumstanzas da l'idea ch'i saja impurtant da promover la spostaziun dal vial dal nord, perquai che l'avantatg da quella soluziun è cleramain pli grond per ils vischins e la vischnanca da Trimmis. Ina construcziun da paraids da protecziun cunter la canera a curt termin per lung da la via actuala sto perquai vegnir refusada or da motivs tecnics e da procedura. Ina tala mesira reduciss decisivamain las schanzas per la soluziun globala planisada.
Areguard il traffic da viafier stoi da l'autra vart vegnir menziunà che la lescha federala davart la sanaziun cunter la canera da las viasfier ed il conclus federal correspundent davart la finanziaziun èn entrads en vigur il 1. d'october 2000. Las mesiras da spargn actualas da la confederaziun n'han pli probabel nagin effect negativ per la sanaziun cunter la canera da las viasfier. Las VFF e la VR sa basan tar la sanaziun cunter la canera primarmain sin meglieraments dals vaguns. Tar ils vaguns da persunas da las VFF duai il program esser terminà per la fin da l'onn 2004, tar ils vaguns da martganzia da las VFF e da privats per l'onn 2009. Tar la VR sto l'emprim vegnir sclerì en il rom dal project current da perscrutaziun e da svilup sche la proposta da soluziuns da las VFF è insumma adattada per ina viafier muntagnarda cun frains da vacuum.
En lieus, nua ch'ins constata er en l'avegnir surpassaments da las limitas malgrà la sanaziun dals vaguns, vegnan dads impuls per projects da construcziuns per la sanaziun cunter la canera. Sco gia communitgà l'october 2000 a tut ils vischins per lung da las lingias da viafier da las VFF, vegni cumenzà cun quellas lavurs da projectaziun per la part da las VFF en la Val dal Rain grischuna l'onn 2005. Sch'ins sto prender mesiras a Landquart e tge mesiras che quai sto esser (p.ex. sanar u remplazzar la punt d'atschal, installar fanestras che protegian cunter la canera), na po perquai per il mument anc betg vegnir ditg.
La regenza vegn a sa stentar che las mesiras menziunadas en il sectur da la via e dals binaris vegnan promovidas en moda speditiva resp. vegnan svelt prendidas per mauns, per che la populaziun pertutgada possia vegnir protegida cunter la canera sproporziunada. Cun las restricziuns correspundentas è la regenza perquai pronta d'acceptar l'incumbensa.


Datum: 2 d'october 2003