Navigation

Inhaltsbereich

Dumonda Casanova concernent l'imposiziun da taglias sin il fit per l'atgna utilisaziun

Sessiun: 21.10.2003
En la sessiun d'avust 2003 è il cussegl grond sa fatschentà cun il referendum dals chantuns cunter il pachet da taglia 2001 da la confederaziun svizra ed ha approvà quel. Entant èsi enconuschent ch'il referendum è reussì. Tenor il cussegl federal duai vegnir introducì tranter auter en il sectur da l'imposiziun da taglia sin la proprietad d'abitar in nov urden tras quai che l'imposiziun da taglias sin il fit per l'atgna utilisaziun da fin uss croda; ils proprietaris novs duain a medem temp però tuttina pudair deducir durant diesch onns ils tschains da debits. L'imposiziun da taglias sin il fit per l'atgna utilisaziun è adina puspè in object per cuntraversas. L'argument che vegn fatg valair encunter quest sistem è surtut quel che proprietaris da bains immobigliars vegnissan disfavurisads areguard la taglia. Effectivamain ha l'imposiziun da taglias sin il fit per l'atgna utilisaziun consequenzas negativas considerablas per la generaziun pli veglia. Persunas pensiunadas ch'han acquistà avant pli che 40 onns ina immobiglia e che n'han nagina grevezza ipotecara sin quella, sentan las consequenzas fiscalas a moda considerabla. La chargia fiscala supplementara visavi ina persuna pensiunada cun in'entrada medem auta (senza proprietad da bains immobigliars) po importar fin a 100 %. In tal tractament inegual pretenda in'adattaziun da la lescha. Perencunter profiteschan per ordinari persunas pli giuvnas da la schliaziun actuala. Ina famiglia da quatter persunas ch'ha cumprà a Cuira cun in agen chapital da 200'000. fr. in'abitaziun da proprietad da 550'000. fr. vegn cun in'entrada brutta dal consort da ca. 7'000. fr. il mais engrevgiada cun taglias da totalmain ca. 5'000. fr., entant che la medema famiglia cun ina facultad da 200'000. fr. senza abitaziun da proprietad stuess pagar taglias da ca. 8'000. fr. Bler puncts rinvian al fatg che cunzunt la classa mesauna profitescha da la schliaziun actuala.
Igl è grev da sa far in maletg objectiv da las consequenzas fiscalas ch'il sistem actual ha per differentas gruppas da la populaziun. Jau ma driz perquai cun suandantas dumondas a la regenza:

1. Per tge gruppas da la populaziun ha il sistem da l'imposiziun da taglias sin il fit per l'atgna utilisaziun consequenzas fitg negativas?

2. Ha la regenza l'intenziun da prender mesiras legalas en quest sectur?

3. Tge gruppas da la populaziun profiteschan dal sistem actual?

4. Tge consequenzas sin la taglia avessi da desister da l'imposiziun da taglias sin il fit per l'atgna utilisaziun?

Cuira, ils 21 d'october 2003

Name: Casanova (Cuira), Pedrini, Cavegn-Kaiser, Bachmann, Bischoff, Bleiker, Caviezel (Pitasch), Cavigelli, Claus, Federspiel, Hanimann, Hardegger, Hartmann, Jaag, Jäger, Jenny, Kessler, Luzio, Mani-Heldstab, Marti, Parpan, Peyer, Pfenninger, Pfiffner, Righetti, Rizzi, Thomann, Wettstein, Zindel, Furrer, Valär, Toschini, Caviezel (Cuira), Godly, Gubelmann

Session: 21.10.2003
Vorstoss: rg Anfrage


Resposta da la regenza

Il matg da l'onn proxim vegn il suveran a votar davart il pachet da taglia 2001. Ultra da distgargias en il sectur da l'imposiziun da taglia sin famiglias cuntegna il project cunzunt er midadas fundamentalas areguard l'imposiziun da taglias sin il fit per l'atgna utilisaziun. La dumonda vul in scleriment da las consequenzas concretas tar l'imposiziun da taglias sin il fit per l'atgna utilisaziun. Latiers vegnan fatgas differentas dumondas che duain vegnir respundidas suenter ina curta introducziun.

En il dretg actual signifitgescha il fit per l'atgna utilisaziun in'entrada imponibla. Ils custs necessaris per realisar quest gudogn, q.v.d. ils tschains da debits ed ils custs per il mantegniment da l'immobiglia, pon consequentamain vegnir deducids; per ils custs per il mantegniment da l'immobiglia po vegnir pretendì ina deducziun pauschala.

Ina midada da sistem cumpigliass uss gist uschia l'eliminaziun da l'imposiziun dal fit per l'atgna utilisaziun sco la deducziun dals tschains da debits e dals custs per il mantegniment da l'immobiglia. En il project da referendum vegn bain desistì d'ina imposiziun da taglias sin il fit per l'atgna utilisaziun, la deducziun dals tschains da debits vegn però concedida vinavant a novs acquistaders. La deducziun vegn dentant limitada areguard la summa ed areguard il temp. Ultra da quai pon ils custs effectivamain impundids per il mantegniment da l'immobiglia vegnir deducids er en l'avegnir, uschenavant ch'els na surpassan betg ina summa da 4'000. francs.

Tar las singulas dumondas po vegnir menziunà il suandant:

1. Il sistem actual da l'imposiziun da taglias sin il fit per l'atgna utilisaziun ha in effect engrevgiant surtut là, nua ch'il pajataglia ha in fit per l'atgna utilisaziun relativamain aut e d'ina entrada da daners relativamain bassa. Quai è en differents cas uschia tar persunas pensiunadas, sche quellas ston vegnir a chantun cun entradas da daners modestas.

2. La regenza ha gia menziunà il fanadur 2000 en la consultaziun davart l'imposiziun da taglias sin il fit per l'atgna utilisaziun: "... pudess vegnir intercurì sch'ina distgargia duai vegnir concedida per persunas pensiunadas, tar las qualas il retgav net imponibel da la proprietad d'abitar surpassa ina tscherta part da l'entrada netta." Cun quest mecanissem da correctura pudess la mancanza menziunada da l'imposiziun actuala da taglias sin il fit per l'atgna utilisaziun vegnir eliminada a moda simpla senza gist stuair midar tut il sistem.

3. En las bancas da datas fiscalas na vegnan registradas naginas gruppas da la populaziun; questa dumonda na po betg vegnir respundida en quest senn. En general po dentant vegnir ditg che las differenzas tranter il sistem actual e la nova regulaziun proponida dependan fitg da l'autezza da las ipotecas e dals tschains ipotecars. Tar ina grevezza ipotecara usitada e tariffas da tschains da sut 4% maina il sistem actual bunamain adina ad ina grevezza fiscala pli auta. Sche las tariffas da tschains surpassan 6%, è il sistem actual pli favuraivel per in pajataglia cun in'ipoteca mesauna u auta. Sulettamain novs acquistaders che na ston betg pajar taglia per il fit per l'atgna utilisaziun, che pon però tuttina deducir ils tschains da debits durant ils emprims onns, vegnan favurisads anc pli fitg da la nova regulaziun.
Ultra da quai ha la regulaziun actuala in effect favuraivel er per in pajataglia che ha prendì si in credit da consum u in credit lombard e che po actualmain deducir ils tschains da debits scadents. Cun la nova regulaziun croda questa pussaivladad da deducziun. Gist en il sectur dals credits da consum vegn la grevezza fiscala pli auta a tutgar las classas d'entradas bassas e mesaunas.

4. Las perditas da taglia che resultassan da la nova imposiziun da taglia sin la proprietad d'abitaziun èn vegnidas preschentadas en la missiva tar il referendum dals chantuns e stimadas per il chantun e las vischnancas a 52.6 milliuns francs. Tar las calculaziuns è vegnì partì dal fatg che las perditas en il sectur d'abitaziuns secundaras pudessan vegnir cumpensadas tras la taglia sin abitaziuns secundaras. Suenter ch'il cussegl federal ha communitgà ch'il project stoppia anc vegnir curregì avant ch'el giaja en vigur, na po betg pli vegnir ditg cun segirezza, sche questa supposiziun è correcta. Sche la taglia sin abitaziuns secundaras duess anc vegnir eliminada posteriuramain, pudessan las perditas da taglia per il chantun e las vischnancas s'augmentar a 65 milliuns francs.

Datum: 8 da december 2003