Navigation

Inhaltsbereich

Dumonda Gartmann concernent la surpigliada dals custs da l'emna cumpacta en franzos sco rom d'elecziun al stgalim superiur da la scola populara

Sessiun: 10.02.2004
Da princip è mintga purtader da scola dal stgalim superiur en il chantun Grischun obligà da porscher franzos sco rom d'elecziun, er sche mo in sulet scolar vul far diever da questa instrucziun. Cunquai ch'igl è en bleras scolas – per motivs da l'urari – fitg difficil d'integrar en quel trais lecziuns franzos per emna, fan ins savens diever da la purschida da las emnas cumpactas.
Cun il conclus da la regenza dals 19 da zercladur 2002 è vegnì fixà che las scolaras ed ils scolars dal stgalim superiur da la scola populara vegnian sustegnids da vart dal chantun cun ina pauschala da 500.– francs per emna cumpacta.
Tenor l'art. 5 da la lescha davart las scolas popularas dal chantun Grischun (lescha da scola) è l'instrucziun en la scola populara gratuita.
Sin basa da questa situaziun da partenza supplitgesch jau pia la regenza da respunder las suandantas dumondas:
1. Constatti ch'ils custs per las emnas cumpactas ston – suenter la deducziun da la contribuziun dal chantun – vegnir surpigliads dals purtaders da scola, cunquai che l'instrucziun en la scola populara è – sco gia menziunà – gratuita per las scolaras ed ils scolars resp. per lur persunas autorisadas d'educar.
2. Sche gea – cura ed en tge furma èn vegnidas infurmadas u vegnan infurmadas las autoritads da scola ch'ellas hajan da purtar ils custs restants da las emnas cumpactas?
3. Controllescha il chantun che la surpigliada dals custs restants vegnia respectada?

Cuira, ils 10 da favrer 2004

Name: Gartmann, Caviezel (Cuira), Arquint, Baselgia, Bucher, Caviezel (Tusaun), Frigg-Walt, Jaag, Jäger, Joos-Buchli, Koch, Meyer-Grass (Claustra), Meyer Persili (Cuira), Mengotti, Michel, Noi, Peyer, Pfenninger, Pfiffner, Schütz, Zindel, Mainetti

Session: 10.02.2004
Vorstoss: rg Anfrage


Resposta da la regenza

La dumonda sa referescha a l'instrucziun da franzos che vegn purschida en il rom dal plan d'instrucziun da la scola secundara e reala sco er da las classas pitschnas correspundentas. Las suandantas respostas a las dumondas valan en general per tut las linguas naziunalas che na vegnan betg purschidas sco roms obligatoris en la scola dal stgalim superiur correspundenta.

1. Ils custs per emnas intensivas resp. cumpactas, che vegnan realisadas sin il stgalim superiur da la scola populara en il rom dal franzos sco rom d'elecziun, van a donn e cust dals purtaders da scola. Il chantun sa participescha latiers cun subvenziuns u cun contribuziuns spezialas. Per las scolaras ed il scolars è l'instrucziun en franzos sco rom d'elecziun gratuita (art. 5 da la lescha da scola), e quai independentamain da la dumonda sch'ella vegnia purschida dals purtaders da scola cumpetents en furma da lecziuns d'emna ed/u en furma d'emnas intensivas resp. cumpactas.

Tenor ils art. 16, 16bis al. 5 e 19 al. 4 da l'ordinaziun executiva tar la lescha da scola ston vegnir purschids – sin il stgalim superiur da la scola populara – curs da lingua adattads per quellas linguas naziunalas che na vegnan betg purschidas sco roms obligatoris, e quai independentamain dal dumber da participantas e participants. Il spazi da temp per franzos sco rom d'elecziun è fixà en l'urari actual cun 3 lecziuns per emna ed onn (7avel ed 8avel onn da scola) resp. cun 3 – 5 lecziuns per emna ed onn (9avel onn da scola). Per organisar questa instrucziun linguistica èn previsas duas pussaivladads en l'ordinaziun executiva tar la lescha da scola:
A) Il franzos vegn instruì en furma da lecziuns sco rom d'elecziun per emna. Lur finanziaziun è part dal modus da subvenziun regular tenor l'ordinaziun davart la salarisaziun da las persunas d'instrucziun (BR 421.080).
B) Las lecziuns menziunadas en l'urari vegnan dadas dal tuttafatg u parzialmain en furma d'emnas intensivas resp. cumpactas. Sche quellas han lieu aifer il program da scola ordinari (q.v.d. durant il temp da scola), succeda il subvenziunament tras il chantun er en il rom da l'ordinaziun davart la salarisaziun da las persunas d'instrucziun. Emnas cumpactas ordaifer il program da scola ordinari (q.v.d. durant il temp da vacanzas) sustegna il chantun cun contribuziuns spezialas. Quellas vegnan fixadas da la regenza ed importan actualmain 500.– francs per scolar(a) ed emna.

2. L'uffizi cumpetent ha infurmà il favrer 2002 las autoritads da vischnanca e da scola cun ina brev davart las regulaziuns che valan a partir da l'onn da scola 2002/03 per il stgalim superiur da la scola populara. A partir dal mars 2004 stattan a disposiziun infurmaziuns detagliadas concernent emnas intensivas resp. cumpactas sin la homepage da l'uffizi. Per l'onn da scola 2004/05 è l'inspecturat da scola puspè vi da preparar ina brev d'infurmaziun correspundenta a las autoritads da scola.

3. In organ chantunal spezial che controllescha che la surpigliada dals custs restants vegnia respectada n'exista betg e n'è er betg previs.

16 da mars 2004