Navigation

Inhaltsbereich

Dumonda Bucher-Brini concernent la plazza d'ospitals da Cuira: in ospital, in lieu, dus edifizis cun in lift/in tunnel da colliaziun tranter l'ospital Fontana e l'ospital chantunal

Sessiun: 21.04.2004
Cun la dumonda preschenta vulan las sutsegnadas ed ils sutsegnads impedir che las persunas ch'èn responsablas per la planisaziun dals ospitals sa fixeschian en la fasa da planisaziun mo sin ina varianta che po partind d'ina "optica da la ura nulla" sa preschentar mo superfizialmain sco economicamain pli favuraivla. Las relaziuns effectivas vegnan en quest connex negligidas u almain resguardadas memia pauc.

En connex cun l'ospital da dunnas Fontana vali da punctuar ils suandants facturs:

- L'ospital da dunnas Fontana è vegnì actualisà ils ultims dus/trais onns per 12 milliuns francs senza ils indrizs tecnics. Questas investiziuns dastgassan bain esser persas tar in'utilisaziun da l'edifizi per in auter intent.

- La cuschina moderna dal Fontana producescha ultra per il provediment da l'ospital er tut ils pasts per las abitantas ed ils abitants sco er per il persunal da la clinica psichiatrica Waldhaus, perquai che quella n'ha nagina cuschina. I vegnan pia fatgas prestaziuns decisivas ch'ins stuess cumprar tar auters furniturs en cas che l'ospital Fontana vegniss liquidà, resp. ch'ins stuess far al lieu en ina cuschina che stuess vegnir construida da nov quai che fiss collià cun novs engaschaments.

- L'ospital Fontana renovà ultimamain è situà en proxima vischinanza da l'ospital chantunal. La distanza (main che 200 m) è cumparegliabla cun la distanza d'ina fin da l'ospital chantunal actual a l'autra. Ina colliaziun sutterrana da quels dus ospitals fiss pia realisabla cun custs relativamain pitschens. En Svizra existan gia en blers lieus soluziuns che han in success medicinal ed economic davart plazzas d'ospitals cun divers edifizis ch'èn colliads in cun l'auter. Sco exempel sajan menziunadas las clinicas universitaras e la maternitée Triemli a Turitg.

- Avant var 10 onns è dal rest vegnì fatg in project preliminar cun in lift/in tunnel da colliaziun tranter l'ospital Fontana e l'ospital chantunal. Ins ha desistì da questa soluziun, perquai ch'ina collavuraziun tranter las instituziuns d'ospital è bain vegnida taxada sco difficila da quel temp e perquai ch'il squitsch da las finanzas e dals custs n'è (anc) betg stà grond avunda.

- Giuvna Anna von Planta ha regalà al chantun l'immobiglia Fontana. Questa donaziun è vegnida fixada uschia che questa immobiglia ha stuì vegnir duvrada per in ospital da dunnas. I dastgass esser legalmain difficil da simplamain midar oz la destinaziun.

Sin basa da questas ponderaziuns ch'expriman mo ina part da las resalvas da las sutsegnadas e dals sutsegnads supplitgain nus la regenza da respunder las suandantas dumondas:

1. Tge summas èn vegnidas investadas ils ultims onns en l'ospital da dunnas Fontana per instruments medicinals e per la renovaziun da l'edifizi?

2. a) Quantas purziuns da pasts producescha la cuschina dal Fontana annualmain?
b) Quantas da quellas vegnan producidas per las pazientas ed ils pazients sco er per il persunal da la clinica psichiatrica Waldhaus?
c) Datti plans per la construcziun nova d'ina cuschina per la clinica psichiatrica Waldhaus?

3. Quantas plazzas da parcar sa chattan sin l'areal ed en ils conturns da l'ospital da dunnas Fontana e co pudessan ins remplazzar quests parcadis en ils conturns da l'ospital chantunal che sto vegnir construì da nov?

4. Cun tge custs ha il project preliminar dals onns 90 fatg quint per la colliaziun sutterrana da l'ospital da dunnas Fontana cun l'ospital chantunal?

5. Èsi previs da laschar examinar e calcular da vart independenta ina varianta "in ospital, in lieu, ina direcziun cun dus edifizis colliads cun in lift/in tunnel da colliaziun"?

6. È la regenza pronta d'examinar la pussaivladad da preschentar als gremis da decisiun, spezialmain al cussegl grond ed a la populaziun grischuna, pliras variantas per ina plazza d'ospitals Cuira, spezialmain quellas ch'èn vegnidas preschentadas qua, per prender la decisiun?

Cuira, ils 21 d'avrigl 2004

Name: Bucher-Brini, Meyer Persili (Cuira), Meyer-Grass (Claustra), Beck, Caviezel-Sutter (Tusaun), Christoffel, Dudli, Frigg, Jaag, Janom Steiner, Kleis-Kümin, Koch, Mani-Heldstab, Marti, Mengotti, Noi, Pfenninger, Pfiffner, Portner, Schütz, Zarn, Zindel

Session: 21.04.2004
Vorstoss: rg Anfrage


Resposta da la regenza

1. En ses plan da mesiras per l'examinaziun da las structuras e da las prestaziuns per sanar las finanzas dal chantun ha la regenza tranter auter prendì en vista l'onn passà da serrar l'ospital da dunnas Fontana e da surdar il medem mument l'incarica da prestaziun per il provediment central en assistenza al part ed en ginecologia als ospitals da Cuira SA (mesira 319). Cumplettond questa mesira ch'è vegnida prendida en vista da la regenza han ils ospitals da Cuira SA ch'èn responsabels dapi prest in onn per la gestiun operativa dals trais ospitals publics a Cuira (ospital chantunal e regiunal retic a Cuira, ospital da dunnas Fontana ed ospital da la crusch a Cuira) recumandà la fin da schaner da quest onn als purtaders dals ospitals da serrar ils manaschis da l'ospital da dunnas Fontana e da l'ospital da la crusch a Cuira e d'integrar ils dus ospitals en l'ospital chantunal e regiunal retic a Cuira (varianta 5).

2. La cumissiun per sanadad e fatgs socials dal cussegl grond ha a chaschun da sia sesida dals 15 da mars 2004 da princip e sut tschertas cundiziuns sustegnì la varianta 5.

3. La varianta 5 che persvada dal puntg da vista da la qualitad e da la rentabilitad sco er las duas autras variantas che vegnan recumandadas subsidiarmain dals ospitals da Cuira SA numnadamain las variantas 3d (ospital da la crusch en ina construcziun nova da l'ospital chantunal) e 4b (cumplettaziun dal center da l'ospital da la crusch, ospital Fontana en ina construcziun nova da l'ospital chantunal) pon vegnir realisadas mo, sch'i vegnan resguardads ultra dals interess dal chantun e da las vischnancas ils interess dals purtaders da l'ospital chantunal e regiunal retic a Cuira e da l'ospital da la crusch a Cuira. Cun il conclus dals 6 d'avrigl 2004 ha la regenza incaricà en quest senn ina gruppa directiva cun l'incumbensa d'elavurar per mauns dal chantun, da la corporaziun da vischnancas "regiun d'ospital da la Val dal Rain" e dals purtaders dals ospitals ina basa da decisiun en connex cun las trais variantas recumandadas dals ospitals da Cuira SA per realisar la plazza d'ospitals Cuira.

4. La colliaziun cun in lift/in tunnel tranter l'ospital Fontana e l'ospital chantunal che vegn tematisada en la dumonda qua avant maun è ina sutvarianta da la varianta 3d.

La regenza respunda las dumondas sco suonda:

1. Per la sanaziun da l'ospital da dunnas Fontana, terminada l'onn 2002, èn vegnids impundids tenor il rendaquint da construcziun 12.8 milliuns francs. Per l'acquisiziun d'instruments medicinals èn vegnids impundids 2.8 milliuns francs durant ils ultims tschintg onns. Ils instruments medicinals pon vegnir dischlocads en cas ch'il scenari 5 vegniss realisà.

2.a) La cuschina da l'ospital da dunnas Fontana producescha mintg'onn 248'600 pasts (stadi da l'onn 2003). En quest dumber èn cumprids ils pasts per pazientas e pazients, per abitantas ed abitants, per il persunal, per visitadras e visitaders sco er per ulteriuras persunas.
2.b) Per las pazientas ed ils pazients sco er per il persunal da la clinica psichiatrica Waldhaus vegnan producids 166'575 pasts.
2.c) Ils servetschs psichiatrics dal Grischun sa fatschentan dapi dus onns cun in nov project d'alimentaziun per la clinica Waldhaus. Examinadas pli detagliadamain vegnan las variantas "atgna cuschina", "cuschina da satellit" e "furniziun da products mezcuschinads" sco er "furniziun dals pasts". In'atgna cuschina en la clinica Waldhaus na vegn fitg probablamain betg en dumonda pervi dals gronds custs d'investiziun.

3. Sin l'areal da l'ospital da dunnas Fontana sa chattan 107 plazzas da parcar; duas da quellas èn reservadas per persunas impedidas. Sche la varianta 5 u 4a dals ospitals da Cuira SA vegniss realisada, vegnissan questas plazzas da parcar remplazzadas uschia, che la chasa da parcar da l'ospital chantunal e regiunal retic vegniss extendida e ch'i vegnissan construidas per il persunal surfatschas da parcar sin dus plauns en la part da l'edifizi "provediment e dismessa". Il dumber variescha tut tenor il scenari. Il scenari 5 prevesa 160 ulteriuras plazzas da parcar en il stadi da project actual.

4. L'onn 1994 èn vegnidas elavuradas differentas variantas. La varianta la pli favuraivla (construcziun sut tschiel avert) custava 9.1 milliuns francs, la varianta la pli chara (micro-pitgas) 16.2 milliuns francs.

5. La calculaziun da la rentabilitad d'ina colliaziun cun in lift/in tunnel tranter l'ospital Fontana e l'ospital chantunal è da princip gia succedida. Ulteriurs scleriments succedan en il rom da la planisaziun da detagl e vegnan integrads en la procedura da decisiun.

6. La regenza vegn a preschentar al cussegl grond ina basa da decisiun per tut las trais variantas recumandadas dals ospitals da Cuira SA. Areguard la varianta "plazza d'ospitals Cuira in ospital, in lieu, dus edifizis cun in lift/in tunnel da colliaziun tranter l'ospital Fontana e l'ospital chantunal" rinviescha ella a la resposta da la dumonda 5.

Datum: 6 da fanadur 2004