Navigation

Inhaltsbereich

Incumbensa Schütz concernent la vendita da products da tubac a giuvenils sut 16 onns e concernent l'installaziun e la gestiun d'automats da cigarettas or en il liber, en staziuns ed en restaurants

Sessiun: 17.06.2004
En il mintgadi sa lascha quai observar e retschertgas conferman la constataziun: Il consum da tubac, da cannabis e d'alcohol tras giuvenils pli e pli giuvens s'augmenta.

Fatg èsi che:

1. Ils ultims onns è il dumber da las giuvenilas fimadras e dals giuvenils fimaders s'augmentà fitg ferm. Gia scolaras e scolars da 12 onns fiman regularmain la damaun sin via da scola.

2. Pli baud ch'ins entschaiva a fimar, pli difficil ch'i daventa da pudair puspè chalar e pli gronda che la ristga è da stuair patir pli tard pervia da las consequenzas donnegiusas dal fimar.

3. Las campagnas da prevenziun che fan attent a la problematica da la dependenza ed al donn per la sanadad, na fan praticamain nagin effect sin ils giuvenils.

Ils augments marcants dal pretsch dals products da tubac valan sco med effizient per limitar il consum da tubac tar uffants, giuvenils e creschids.

Il scumond da la vendita da cigarettas a giuvenils sut 16 onns, il scumond d'automats da cigarettas u la restricziun da l'access a tals automats per giuvenils, vegnan menziunads sco ulteriuras mesiras da prevenziun e vegnan examinads da l'uffizi federal da sanitad. (Cumpareglia tranter auter il program naziunal 2001 2005 pertutgant la prevenziun dal tubachissem da l'uffizi federal da sanitad).

Per resumar vulain nus constatar, ch'ils donns da sanadad chaschunads tras il consum da tubac e tras il consum excessiv d'alcohol sco er ils custs che resultan da quai per il sectur da sanadad e per il bainstar social èn enconuschents.

Tenor la sentenzia dal tribunal federal dals 28-3-2002 (sentenzia 2P.2007/2000) davart in recurs da dretg public cunter la “lescha da publicitad” relaschada dal cussegl grond dal chantun Genevra il zercladur 2000 èsi cler, ch'ils chantuns che relaschan leschas, las qualas accentueschan la protecziun dals giuvenils e la prevenziun, na cuntrafan betg al dretg federal superiur.

Ils sutsegnads supplitgeschan la regenza d'acceptar questa incumbensa e da suttametter al cussegl grond in project da lescha che scumonda la vendita directa da products da tubac a persunas minorennas dentant er quella tras automats da cigarettas.

Cuira, ils 17 da zercladur 2004

Name: Schütz, Jäger, Pfiffner, Baselgia-Brunner, Bucher-Brini, Bundi, Caviezel (Tusaun), Frigg, Jaag, Koch, Märchy-Michel, Meyer-Persili (Cuira), Mengotti, Noi, Peyer, Pfenninger, Trepp, Zindel, Brasser, Caviezel (Cuira).

Session: 17.06.2004
Vorstoss: rg Auftrag


Resposta da la regenza

Tenor il program naziunal pertutgant la prevenziun dal tubachissem 2001 2005 ha la quota da las fimadras e dals fimaders cuntanschì in maximum en la Svizra dals onns 70 (50.6 pertschient da la populaziun) ed è sa diminuida suenter fin la mesadad dals onns 80 a 30.9 pertschient. Tar ils giuvenils tranter 15 e 19 onns importava la quota da fimadras e fimaders la fin dals onns 70 quasi 50 pertschient ed è sa reducida fin la fin dals onns 80 a main che 20 pertschient. Dapi alura è quest dumber puspè s'augmentà considerablamain. Tar la davosa retschertga gronda 1997/98 han 42 pertschient dals umens questiunads e 39 pertschient da las dunnas questiunadas inditgà ch'ellas resp. els fimian. La vegliadetgna, nua ch'ins entschaiva a fimar, è sa sbassada cuntinuadamain durant plirs onns ed è oz tar circa 16 onns. La vendita totala annuala sa mova dapi 1974 cuntinuadamain tranter 15 e 17 milliardas cigarettas. La vendita annuala per persuna fimadra regredescha dentant ed importa actualmain var 2'500 cigarettas.

Las experientschas dals davos onns mussan che singulas mesiras dal stadi, sco per exempel augmentar il pretsch da las cigarettas, na pon betg influenzar il consum da giuvenils e creschids en la moda e maniera giavischada. Plitost èsi da partir dal fatg che la dumonda, sche giuvenils fiman, dependa da l'uschenumnà "life style" ch'è mintgamai en moda, q.v.d. da las furmas da viver e da pensar che valan en las differentas gruppas. Correspundentamain emprovan ils giuvenils da s'orientar en la vita da mintgadi al stil da viver dals creschids, e quai tras praticas simbolicas e tras cumportaments visibels. Sch'il fimar è pia "trendy", alura na reussescha er in scumond da vendita per products da tubac a giuvenils betg d'impedir quels da sa procurar cigarettas. Scumonds spezialmain per giuvenils vegnan plitost a stimular d'als surpassar. Uschia na vegni strusch pli ad esser in problem per in giuvenil da 14 onns da chattar in tal da 17 onns che va a cumprar cigarettas per el.

Sco che l'uffizi federal da sanitad constatescha en ses program pertutgant la prevenziun dal tubachissem 2001 2005 èn il cumenzament e la cuntinuaziun dal consum da tubac colliads cun fenomens multifuncziunals. Qua sa tracti en emprima lingia da squitsch da gruppa, da pauca conscienza da sasez, da problems en scola e/u a chasa, da temas e da depressiuns u da l'ambient socio-economic. Correspundentamain parta l'uffizi federal da sanitad dal fatg che mo la realisaziun d'in pachet da mesiras coordinà cuntanschia la finamira da prevegnir giuvenils e creschids dal fimar resp. d'als far chalar da fimar. Sin fundament da questa situaziun da partenza è l'uffizi federal da sanitad actualmain vidlonder da far in pachet da mesiras ch'è destinà per mauns dal parlament federal en il rom dal program da legislatura 2003 2007. Quest pachet vegn a cuntegnair, ultra d'ina prevenziun pli intensiva ed ultra da purschidas per chalar da fimar, er scumonds legals, sco in scumond da publicitad per products da tubac ed in scumond federal da vendita da products da tubac a giuvenils.

En vista al fatg ch'i vegn elavurà actualmain in pachet da mesiras cumplessiv sin plaun federal, pari a la regenza ch'i saja pauc opportun da statuir sin plaun chantunal, en il senn d'ina mesira punctuala, in scumond da vendita da products da tubac a giuvenils. Ella propona perquai da refusar l'incumbensa.

Datum: 7 da settember 2004