Navigation

Inhaltsbereich

Dumonda Trepp concernent ils projects d'integraziun

Sessiun: 19.10.2004
Sin basa da la lescha federala davart la dimora ed il domicil dals esters (CS 142.20) e da sia ordinaziun stattan a disposiziun dapi ils 13 da settember 2003 cun ina participaziun finanziala dals chantuns da 50 % daners per projects d'integraziun. Fin ussa èn vegnids pajads ca. 34 milliuns francs a ca. 585 projects. La confederaziun recumonda d'accumpagnar tals projects. Quels han cumenzà en differents chantuns gia dapi var trais onns.
Diversas votaziuns en la Svizra tudestga ed en il chantun Grischun han mussà, ch'igl exista er tar nus in basegn ed ina dumonda, uschenavant che la pussaivladad per tals projects è insumma vegnida rendida enconuschenta. Quests projects duain servir ad ina meglra integraziun da la populaziun estra che viva e lavura gia tar nus.
Pervi da la tenuta bain in pau reservada da la regenza che ha installà pir ils 28 da settember 2004 ina cumissiun per quest intent, sa tschentan bain in pèr dumondas:

1. Pertge n'ha la regenza betg agì pli baud?

2. Èn gia prevesidas contribuziuns per projects l'onn 2005? Sche gea, per tgenins? Sche na, pertge betg?

3. È questa cumissiun gia vegnida convocada ad ina sesida? Sche na, per cura è quai prevesì?

4. Tenor tge criteris è il schef da la polizia d'esters vegnì numnà il president da questa cumissiun? Sia cumpetenza professiunala en il sectur da la polizia d'esters na stat qua betg en discussiun, ma l'integraziun da persunas estras na tutga segir betg tar la "incumbensa centrala" da ses uffizi.

5. Na pudessan betg nascher tscherts conflicts d'interess, sche la medema persuna ch'è responsabla per fatgs da la polizia (expulsiun da persunas estras) e per l'integraziun, ha la direcziun sin plaun chantunal? Na datti èn il chantun betg autras persunas directivas che possedan ina cumpetenza professiunala e dal fatg correspundenta en quai che reguarda il sectur cumplex da l'integraziun?

6. Tge quinta la regenza da far per ch'i possian vegnir cuntanschids progress concrets en l'avegnir en il sectur da l'integraziun?

Cuira, ils 19 d'october 2004

Name: Trepp, Bucher, Pfiffner, Augustin, Baselgia, Frigg, Jaag, Jäger, Meyer-Grass (Claustra), Meyer Persili (Cuira), Mengotti, Michel, Noi, Pfenninger, Schütz, Tomaschett, Zindel, Candinas, Caviezel, Monigatti

Session: 19.10.2004
Vorstoss: rg Anfrage


Resposta da la regenza

La regenza grischuna ha adina sustegnì las stentas per integrar la populaziun estra che viva legalmain e permanentamain en il Grischun. Uschia ha il departament da giustia, polizia e sanitad pajà da 1990 fin 2002 contribuziuns annualas da ca. 20'000. francs a la cuminanza grischuna da lavur per l'assistenza dals lavurants esters. Dapi lura dispona l'uffizi da polizia d'ina posiziun d'expensas per contribuziuns a projects per integrar persunas estras (3125.3650). Dals 63'000. francs budgetads èn vegnids pajads 18'000. francs l'onn 2003 e 33'000. francs l'onn 2004. Plinavant porscha l'uffizi da lavur dapi in lung temp differents moduls dal curs "tudestg per persunas da lingua estra" ch'èn vegnids frequentads da 340 persunas l'onn 2003. En il sectur da scola sa stenta ultra da quai l'uffizi per la scola populara ed il sport dapi passa 10 onns da promover e da sustegnair l'integraziun d'uffants d'autras culturas en las scolinas ed en las scolas popularas. Pia na pon ins gnanca da dir discurrer d'ina tenuta reservada.

1. Il chantun Grischun ha fin ussa pudì sustegnair en il rom dal preventiv projects per integrar persunas estras. L'art. 38 da la lescha davart las finanzas dal chantun Grischun ch'è entrada en vigur il 1. da schaner 1999 pretenda ch'i stoppian vegnir stgaffidas las premissas necessarias per expensas senza basa legala, e quai tschintg onns suenter l'entrada en vigur da questa lescha. Cas cuntrari n'è ina cuntinuaziun betg pli permessa. Per pudair conceder il sustegn en il rom d'enfin ussa è vegnida stgaffida cun l'art. 16a da l'ordinaziun executiva tar la legislaziun federala davart ils esters ed ils fatgs d'asil (OECGtLEA) la basa legala per il 1. da schaner 2004. Uschia hai er pudì vegnir garantì che contribuziuns da la confederaziun sa basond sin l'art. 25a da la lescha federala davart la dimora ed il domicil dals esters (LDDE; CS 142.20) possian vegnir liberadas.

2. En il preventiv 2005 ed en il plan da finanzas per ils onns 2006 2009 èn previs per projects d'integraziun mintgamai 40'000. francs. Per l'onn 2005 è avant maun ina dumonda concreta. I vegn però anc fatg quint sco l'onn 2004 cun duas fin trais dumondas.

3. La cumissiun fa sia emprima sesida ils 22 da december 2004.

4. Sin plaun federal è l'uffizi federal d'immigraziun, d'integraziun e d'emigraziun (IMES) resp. a partir dal 1. da schaner 2005 l'uffizi federal da migraziun cumpetent per las dumondas d'integraziun. Cun surdar il presidi da la cumissiun al schef da l'uffizi da polizia dal chantun Grischun ha la regenza mo surpiglià l'urden da cumpetenzas da la confederaziun e delegà ina incumbensa d'integraziun impurtanta er al manader dal post da servetsch ch'è responsabel per l'execuziun dal dretg d'esters en il chantun Grischun.

5. La cumissiun ch'è vegnida installada da la regenza sto examinar dumondas per sustegnair projects d'integraziun e sto proponer en spezial a la regenza da sustegnair projects degns da vegnir promovids sco er d'attribuir ils meds finanzials a quests projects (art. 16a al. 2 OECGtLEA). I n'è però betg l'incumbensa da la cumissiun d'elavurar sezza quests projects u d'instradar mesiras d'integraziun. Ina proposta da minoritad correspundenta da conceder a la cumissiun er ina funcziun consultativa e coordinativa è vegnida refusada cleramain dal cussegl grond. La decisiun definitiva davart la promoziun da projects sco er davart la dimensiun dal sustegn respectiv sto prender la regenza. Areguard la chaussa vegn alura concedì in sustegn mo, sche la confederaziun, las vischnancas u terzas persunas sa participeschan commensuradamain als singuls projects.

6. La regenza grischuna ha punctuà repetidamain che l'integraziun da persunas estras na possia betg vegnir ordinada, mabain sin il pli sustegnida e facilitada. L'iniziativa e la stenta da s'integrar ston dentant vegnir principalmain da las persunas estras sezzas. La promoziun (d'integraziun) dal stadi po perquai mo avair in caracter subsidiar. Ina promoziun d'integraziun dal stadi effizienta e per l'entir chantun n'è betg mo impussibla per motivs finanzials, ella resta er per motivs objectivs ina illusiun. La regenza sa restrenscha perquai er en l'avegnir da sustegnair projects d'integraziun punctuals en il rom sco fin ussa.

Datum: 20 da december 2004