En l'urden da gestiun dal cussegl grond regla l'art. 64 la moda da far votaziuns.
Cun questa iniziativa parlamentara vegn proponida la suandanta nova versiun da l'artitgel:
Art. 64
1 Avant la votaziun communitgescha il president al cussegl verbalmain las propostas fatgas ed ordinescha en tge moda ch'i duai vegnir votà. Objecziuns encunter quai vegnan liquidadas immediatamain dal cussegl.
2 Tar votaziuns finalas davart fatschentas sco er tar votaziuns davart intervenziuns parlamentaras vegnan dumbradas e protocolladas separadamain las vuschs per e las vuschs cunter sco er supplementarmain las abstenziuns da la vusch.
Motivaziun:

a) Er l'abstenziun da la vusch exprima in'opiniun. I tutga tar il dretg da mintga deputada resp. deputà che l'opiniun che vegn exprimida, vegnia dumbrada e documentada (protocols, explicaziuns per las votaziuns dal pievel).

b) La publicitad ha il dretg d'enconuscher las opiniuns ch'èn vegnidas exprimidas da las deputadas e dals deputads al cussegl grond. Sche las abstenziuns da la vusch na vegnan betg dumbradas, survegnan las burgaisas ed ils burgais in maletg fallì dal resultat da la votaziun en il cussegl. I pon resultar speculaziuns inadmissiblas. Per exempel po vegnir interpretada l'expressiun "concludì cun 78 cunter 0 vuschs" en quel senn, ch'il mument da la votaziun èn stads mo 78 deputadas e deputads preschents en la sala dal cussegl grond.

c) En la gronda part dals parlaments chantunals da la Svizra sco er en il cussegl naziunal ed en il cussegl dals chantuns vegnan las abstenziuns da la vusch dumbradas e protocolladas separadamain.

Cuira, ils 21 d'october 2004

Name: Noi, Jäger, Keller, Arquint, Augustin, Baselgia, Bucher, Büsser, Casanova (Vignogn), Cavegn, Christoffel, Crapp, Dudli, Farrér, Federspiel, Frigg, Jaag, Janom Steiner, Jenny, Kleis-Kümin, Koch, Krättli-Lori, Loepfe, Märchy-Michel, Meyer Persili (Cuira), Mengotti, Pedrini, Pfenninger, Pfiffner, Portner, Quinter, Sax, Schmid, Tremp, Trepp, Wettstein, Zanolari, Zindel, Caviezel (Cuira), Monigatti

Session: 21.10.2004
Vorstoss: rg Parlamentarische Initiative