Navigation

Inhaltsbereich

Incumbensa Donatsch concernent l'installaziun d'in forum dad IPM tras la regenza

Sessiun: 08.12.2004
Las chargias e las pretensiuns administrativas sco er las proceduras da permissiuns che custan savens bler temp engrevgeschan pli e pli las interpresas, malgrà tut las empermischuns cuntrarias. Tar l'elavuraziun da novas disposiziuns e prescripziuns daventi adina pli necessari d'examinar usche baud sco pussaivel quanta lavur supplementara che quellas han per consequenza per IPM; plinavant duai vegnir examinà en avegnir tar las acziuns administratrivas tge consequenzas e retardaziuns administrativas che quellas han gì per las partidas.
Las sutsegnadras ed ils sutsegnaders proponan perquai d'installar in forum dad IPM sin plaun chantunal. Sin plaun federal è in forum correspundent vegnì installà gia l'onn 1998. Quel è er sch'el ha in pau in'autra incumbensa sa cumprovà fitg bain.
L'incumbensa principala dal nov forum duai esser d'examinar tar l'elavuraziun da novas leschas ed ordinaziuns detagliadamain tge consequenzas administrativas ch'il proceder planisà avess per las interpresas dal chantun e da prender posiziun davart questa dumonda per mauns da las referendarias e dals referendaris sco er da las autoritads legislativas.
Plinavant duai il forum examinar sco "post da mediaziun" sin rinviament da participadas, da participads, da pertutgadas e da pertutgads, sch'in act administrativ avess dal puntg da vista da l'economia da manaschi e da l'economia publica pudì vegnir relaschà en moda pli effizienta, pli sperta e pli raziunala.
Las experientschas che resultan al permettan da render attent a l'administraziun da simplifitgar las prescripziuns existentas.
En quest senn po il nov forum er esser in lieu da barat d'ideas tranter l'economia e l'administraziun.
Il forum duai vegnir furmà da la regenza or dal ravugl da represchentantas e da represchentants extraparlamentars ch'èn politicamain libers da branschas impurtantas e da secturs economics. Las federaziuns dals represchentants duain er sa participar adequatammain als custs. Las incumbensas, las maniera da lavurar e lascumpetenzas vegnan medemamain regladas da las federaziuns.
En quest senn vegn la regenza incumbensada da crear las premissas per in tal forum dad IPM.

Cuira, ils 8 da december 2004

Name: Donatsch, Wettstein, Hanimann, Bachmann, Bär, Barandun, Berther (Mustér), Bleiker, Brüesch, Brunold, Bühler-Flury, Casanova (Cuira), Casty, Caviezel (Pitasch), Cavigelli, Christ, Claus, Conrad, Crapp, Dudli, Federspiel, Feltscher, Giacometti, Göpfert, Gredig, Hartmann, Hess, Jeker, Jenny, Kessler, Krättli-Lori, Maissen, Märchy-Michel, Marti, Montalta, Parpan, Perl, Rizzi, Stiffler, Thomann, Vetsch, Zegg, Gunzinger, Jecklin-Jegen, Toschini, Züst

Session: 8.12.2004
Vorstoss: rg Auftrag


Resposta da la regenza

La finamira da la distgargia administrativa dad IPM è incontestada e vegn sustegnida da tut las varts. Il departament da l'intern e da l'economia publica (DIEP) vesa da princip duas direcziuns, numnadamain d'impedir preventivamain chargias administrativas supplementaras e d'eliminar reactivamain las chargias administrativas existentas.

Sco basa per evitar chargias administrativas supplementaras duai servir l'instrument da la valitaziun da las consequenzas da la regulaziun. Per quai vegn skizzà in catalog sistematic da dumondas. Quellas dumondas ston vegnir respundidas da l'autoritad cumpetenta spezialisada. En quest connex ston ins sclerir la necessitad da la regulaziun, las consequenzas per l'economia publica e quant che las IPM èn pertutgadas . Ils resultats da questa valitaziun da las consequenzas da la regulaziun duain vegnir examinads dal DIEP e vegnir integrads en il process da la legislaziun. In gremi intern accumpogna questa procedura d'examinar e po tenor basegn pretender in uschenumnà test dad IPM. Igl è previs ch'en quest gremi sajan represchentads il center da las IPM da la scola auta da tecnica ed economia (SATE) e las federaziuns economicas. Davart quest concept per valitar las consequenzas da la regulaziun vegn probablamain fatga l'avrigl ina consultaziun tar ils posts pertutgads.

Areguard la sminuziun da las chargias existentas vegn fatga per il mument ina vasta consultaziun da l'economia dal Grischun. En collavuraziun cun las federaziuns economicas ed il center da las IPM da la SATE duain vegnir analisads ils resultats e definida la problematica; quests fatgs duain vegnir elavurads ed uschia cuntanschids meglieraments.

La regenza è da l'avis ch'in forum dad IMP en il senn d'in barat d'ideas tranter l'economia e l'administraziun na saja betg necessari. En il rom da las mesiras da spargn è vegnida abolida la cumissiun consultativa per dumondas economicas. Ils contacts existents tranter l'administraziun resp. la regenza e las interpresas, las federaziuns economicas u il forum economic dal Grischun duessan bastar. Areguard la chargia adiministrativa duai percunter vegnir furmà in gremi agil sco menziunà qua survart. Las activitads da quel sa restrenschan ad accumpagnar la valitaziun da las consequenzas da la regulaziun e las mesiras en il senn da sminuir las chargias administrativas existentas. Il gremi duai er surpigliar la funcziun d'in post da mediaziun cun dar la pussaivladad a las federaziuns economicas ed al center da las IPM da la SATE d'integrar en quest gremi accumpagnant propostas da las interpresas e da discutar quellas cun il chantun. Uschia pon ins ademplir la finamira da l'incumbensa. Crear in post da mediaziun independent n'è betg inditgà. I duain vegnir stgaffidas structuras agilas che sa basan sin instituziuns existentas (center da las IPM da la SATE, federaziuns economicas). En quest connex ston ins er resguardar che la gronda part da la regulaziun economica relevanta sa basa sin la legislaziun federala e ch'il secretariat dal DIEP è vegnì fixà l'onn 1996 sco post da consultaziun per la deregulaziun. Las IPM n'han dentant fin ussa strusch fatg diever da questa pussaivladad.

La regenza è pronta d'elavurar vinavant sia proposta areguard la valitaziun da las consequenzas da la regulaziun ed areguard la sminuziun da las chargias existentas per las IPM e d'acceptar l'incumbensa en il senn da questas explicaziuns.

Datum: 16 da mars 2005