Navigation

Inhaltsbereich

Incumbensa Perl concernent ils meds da la lottaria naziunala a favur dal fond da sport

Sessiun: 19.04.2005
En la lescha davart las finanzas dal chantun Grischun vegn constatà en connex cun l'art. 14 davart l'utilisaziun dals meds da la lottaria naziunala il suandant:

Da la part chantunala annuala vi dal gudogn net da la lottaria naziunala interchantunala vegnan assegnads 22 fin 27 pertschient al fond da sport. Davart l'utilisaziun dals meds or dal fond da sport decida la regenza.

Ils meds restants van en la finanziaziun speziala da la lottaria naziunala. Da quels stattan almain mintgamai dus tschintgavels a disposiziun per promover la cultura sco er per la protecziun da la natira e da la patria. Davart la summa restanta decida la regenza.

Actualmain van 22 % da la part dal gudogn da la swisslos al fond da sport. Quai fa in import annual da ca. 1'600'000. francs per il fond da sport. Quests daners vegnan impundids en moda intenziunada e fitg constructiva da la cumissiun per promover il sport dal chantun Grischun per occurrenzas sportivas, per material da sport, per edifizis da sport, per projects per promover il sport, per promover sportistas e sportists, per occurrenzas sportivas da la ARGE ALP e per contribuziuns pauschalas ad uniuns chantunalas da sport. Ultra da quai èn instradads divers projects per la promoziun dal sport.

Tranter quels èn per exempel SPORT kids, che porscha ina furmaziun fundamentala polisportiva ad uffants da 58 onns da tut il chantun, airtrack, in project per la generaziun giuvna ch'emprova cun trenament d'animaziun da motivar uffants en la vegliadetgna da scolina per la gimnastica artistica, u il biketeam.gr, che unescha la generaziun giuvna talentada en il biketeam dal Grischun e porscha a quella uschia cundiziuns da basa en moda professiunala.

Spezialmain sto però vegnir menziunà er in project da la federaziun grischuna da skis, grazia al qual dus giuvens talentads da Sursaissa pon frequentar l'emprendissadi da sportist. Tut quests exempels mussan che la promoziun dal sport n'è en il Grischun betg mo ina floscla vida, ma ch'ella chatta adina dapli accoglientscha.

Cun quests daners da la lottaria naziunala na vegn però betg mo promovì il sport en il chantun cun success e senza engrevgiar il pajataglia. Anzi, quai è er ina constribuziun preziusa a la promoziun da la sanadad ed a la prevenziun da donns da la sanadad posteriurs (ch'è però bler pli chara). Da l'effect integrativ dal sport e da l'impurtanza da quel per il cumportament social e per la furmaziun dal caracter gnanc da discurrer. Spezialmain ston ins impedir che uffants e giuvenils daventian adina pli e pli corpulents. Blers dals projects numnads e da las investiziuns en l'infrastructura han precis quest intent.

Per tals projects, per ulteriuras activitads sportivas e per che las uniuns possian investar vinavant en lur infrastructura e quai en moda anc pli generusa che fin qua èsi necessari da trair a niz cumplainamain las pussaivladas finanzialas. Nus dumandain perquai la regenza d'auzar ils 22 % menziunads qua survart a 27 % e da trair a niz cumplainamain il spazi finanzial a favur dal sport. Uschia vegn pussibilità e garantì cuntinuadamain il svilup dals projects da sport senza che auters secturs stoppian qua tras trair la curta.

La ONU ha proclamà quest onn sco onn dal sport: Mettai in accent e gidai che noss uffants e giuvenils possian avair sper in spiert saun er in corp saun.

Cuira, ils 19 d'avrigl 2005

Name: Perl, Gredig, Parpan, Augustin, Bachmann, Bär, Bischoff, Bleiker, Bucher-Brini, Bühler, Bundi, Büsser, Butzerin, Casanova (Vignogn), Casanova (Cuira), Casty, Caviezel (Pitasch), Caviezel-Sutter (Tusaun), Christ, Crapp, Dermont, Donatsch, Dudli, Fallet, Feltscher, Fleischhauer, Giacometti, Giovannini, Hanimann, Hartmann (Champfèr), Hess, Hübscher, Janom Steiner, Jeker, Jenny, Kessler, Koch, Krättli-Lori, Lemm, Märchy-Michel, Marti, Meyer-Grass (Claustra) Michel, Montalta, Noi, Parolini, Pfister, Quinter, Ratti, Rizzi, Sax, Stiffler, Thomann, Tomaschett, Tramèr, Tremp, Tuor, Vetsch, Zanolari, Zarn, Zegg, Bezzola, Campell, Florin-Caluori, Gubelmann, Hartmann (Cuira), Nay, Pool, Raselli, Toschini, Zehnder

Session: 19.04.2005
Vorstoss: rg Auftrag


Resposta da la regenza

Dapi il cumenzament da l'onn 2004 survegnan ils chantuns per consequenza da la fusiun da la lottaria naziunala interchantunala, la SEVA associaziun da lottaria e la societad da sport-toto a l'interpresa swisslos las parts dals retgavs nets da la swisslos en ina contribuziun. La repartiziun da las quotas da gudogn entaifer il chantun sin il fond da la lottaria naziunala e sin il fond da sport succeda dapi lura tenor ina clav procentuala. Durant ils 10 onns avant l'onn 2003 èn ids en media 19.5 % dals retgavs totals a favur da la promoziun da sport. En ina soluziun transitoria fin che la lescha revedida davart las finanzas dal Grischun è entrada en vigur ha la regenza fixà il settember 2003 la procentuala a favur dal fond da sport da nov sin 22 pertschient.

La lescha davart las finanzas dal chantun Grischun dals 18 da zercladur 2004 fixescha en l'art. 14 per il fond da sport ina part en la dimensiun da 22 fin 27 pertschient da la part dal chantun. Questa disposiziun è vegnida acceptada en la lescha davart las finanzas dal chantun Grischun l'onn 2002 cun realisar l'incumbensa dal postulat Trachsel. Sco emprim ha ella gì l'effect ch'i stattan a disposiziun al fond da sport dapli meds en furma d'ina contribuziun da basa. Cun il model dal spectrum da variaziun elegì ha il legislatur ultra da quai stgaffì ina regulaziun flexibla che dat al cussegl grond il spazi d'impunder sche necessari dapli meds per il sport. I correspunda al caracter ed al spiert da la regulaziun legala ch'il spazi concepziunal dà vegnia duvrà sin fundament d'ina appreziaziun generala da tut ils aspects decisivs. Dal puntg da vista da la regenza na duess ins betg remplazzar ina regualziun flexibla cun ina regulaziun fixa gia in onn suenter sia deliberaziun, e quai senza avair fatg experientschas.

L'autezza da la part a favur dal fond da sport ha il cussegl grond da fixar annualmain entaifer la dimensiun legala en il rom dal preventiv. Per quest intent vegn cumpiglià en la finanziaziun speziala da la lottaria naziunala (rubrica 4271) da nov tut la part dal chantun vi dal gudogn net da la lottaria naziunala interchantunala e l'assegnaziun al fond da sport vegn declerada sin ina posiziun dal conto separada (conto 4271.3860 deposit en il fond da sport). En il preventiv 2005 èn cuntegnids sco l'onn passà 22 pertschient per il fond da sport.

Actualmain vegnan duvrads quels meds da la lottaria naziunala che na vegnan betg assegnadas al fond da sport per la pli gronda part per promover la cultura sco er per proteger la natira e la patria. Correspundentamain avess in augment da la quota a favur dal fond da sport senza dubi per consequenza ch'ils meds necessaris vegnissan prendids davent da la promoziun da la cultura respectivamain da la protecziun da la natira e da la patria. La regenza na vuless però betg midar generalmain l'equiliber tranter la promoziun dal sport e tranter quella da la cultura, damai ch'igl è fitg grev da survegnir contribuziuns da sponsurs per dumondas culturalas. La regulaziun legala vertenta permetta senz'auter sch'i dat in u plirs projects da sport pli gronds ch'i possia vegnir duvrà il spazi d'agir finanzial en il rom da la dimensiun inditgada a favur da la promoziun dal sport.

En vista a las circumstanzas numnadas qua survart è la regenza da l'avis da renunziar ad in augment fix da la part per il sport or dal retgav da la swisslos e da realisar la regulaziun flexibla en la furma tschernida en la legislaziun. Perquai propona la regenza da betg acceptar l'incumbensa qua avant maun.

Datum: 23 da zercladur 2005