Dumonda Pfenninger concernent il retardament en connex cun spustar il "traffic pesant da vitgira che traversa las Alps"
Sessiun: 16.06.2005
Il spustament dal traffic pesant da vitgira che traversa las Alps sin la viafier è in element impurtant da la politica da traffic da la Svizra. La populaziun dal Grischun ha sustegnì questa politica en differentas votaziuns (protecziun da las Alps, NVTA, TTPDP).
La prolungaziun dal termin da l'onn 2004 a l'onn 2009 quest termin ch'è fixà en la constituziun federala tras l'artitgel per la protecziun da las Alps è vegnida acceptada pli u main tacitamain dal puntg da vista dal Grischun. Sco quai ch'ins ha pudì intervegnir da differentas medias, vul l'uffizi federal da traffic uss prolungar danovamain quest termin, e quai a l'onn 2018 u schizunt a l'onn 2023. Quai signifitgass ch'i passassan bunamain trenta onns tranter l'acceptaziun da l'iniziativa da las Alps l'onn 1994 fin a sia realisaziun.
Ina lescha federala correspundenta davart il traffic da vitgira sin la viafier e davart il spustament dal traffic pesant da vitgira da la via sin la viafier vegn preparada e duai vegnir tramessa en la consultaziun il settember.
Perquai supplitgain nus la regenza da respunder las suandantas dumondas:
1. È la regenza infurmada da quai che l'uffizi federal da traffic vul retardar il spustament dal traffic pesant da vitgira che traversa las Alps sin la viafier fin a l'onn 2018 u schizunt fin a l'onn 2023?
2. Co giuditgescha la regenza questa intenziun ed il retardament massiv che vegn chaschunà en quest connex tar la realisaziun da la finamira dal spustament?
3. Cun tge consequenzas stuess ins far quint en il Grischun areguard il volumen dal traffic, areguard la qualitad da l'aria ed areguard la segirezza dal traffic?
4. Cun tge mesiras ha la regenza l'intenziun da far valair sia influenza sin la lescha federala planisada davart il traffic da vitgira per uschia impedir quests retardaments massivs?
5. Ina bursa dal transit da las Alps sco instrument d'ina politica da spustament effectiva e favuraivla pudess gidar ad observar ils termins per cuntanscher las finamiras dal spustament. Sustegna la regenza questa idea e cun tge meds contribuescha ella a sia realisaziun?
Cuira, ils 16 da zercladur 2005
Name: Pfenninger, Bucher, Arquint, Baselgia-Brunner, Frigg, Jaag, Jäger, Meyer Persili (Cuira), Noi, Peyer, Pfiffner, Schütz, Trepp, Zindel, Brasser, Caviezel (Cuira), Gartmann, Monigatti
Session: 16.06.2005
Vorstoss: rg Anfrage
Resposta da la regenza
Er la regenza è da l'avis ch'il spustament dal traffic pesant da vitgira che traversa las Alps sin la viafier saja ina pretensiun impurtanta da la politica da traffic da la Svizra.
Las singulas dumondas pon vegnir respundidas sco suonda:
1. Fin uss n'è la regenza betg vegnida infurmada ch'il spustament dal traffic pesant da vitgira che traversa las Alps sin la viafier duess vegnir retardà fin l'onn 2023. En ina communicaziun dal DATEC dals 19 da matg 2005 a las medias pon ins leger che la lescha davart il traffic da vitgira, che duai remplazzar la lescha davart il transferiment dal traffic il pli tard l'onn 2011, vegn actualmain elavurada tar l'uffizi federal da traffic (UFT) e deliberada previsiblamain quest atun dal cussegl federal per la consultaziun.
2. Dapi l'onn 2001 èn visibels emprims resultats positivs dal spustament dal traffic da vitgira da la via sin la viafier. En cumparegliaziun cun l'onn da referenza 2000 è sa reducì il dumber dals vehichels da vitgira che traversan las Alps per bundant 10 pertschient. Per l'emprima giada è s'augmentada l'onn 2004 la part da la viafier vi dal traffic total en cumparegliaziun cun l'onn precedent, e quai da 63 sin 65 pertschient. Ma senza stentas supplementaras dastgassan las mesiras da fin uss probablamain betg bastar per cuntanscher l'onn 2009 la finamira dal spustament cun ina grondezza avisada da 650'000 viadis per onn. Mesiras supplementaras vegnan ad esser necessarias per cuntanscher in'ulteriura reducziun essenziala dal traffic pesant da vitgira che traversa las Alps. Quant enavant che la stagnaziun ch'è vegnida cuntanschida en connex cun ils viadis da camiuns po vegnir attribuida a l'augment da la limita dal pais ed a la recessiun economica, na sa lascha betg respunder cleramain. Senza bunas mesiras supplementaras na dastgassi tenor l'avis da la regenza gnanc ina giada reussir da franar l'augment da vitgira che traversa las Alps sin camiuns che vegn chaschunà pervi d'in progress economic.
3. Actualmain èsi difficil da far indicaziuns segiras davart il volumen da traffic che po vegnir spetgà en il Grischun en l'avegnir. En quest reguard vegni er ad esser decisiv cun tge mesiras che la confederaziun vegn a cuntinuar cun sia politica da spustament. En quest connex vegn pir la concepziun da la lescha davart il transferiment da vitgira a dar scleriment, cun tge mesiras ch'ins po cuntanscher tge effects. Per il Grischun sto tuttina vegnir menziunà ch'ins ha en mira da meglierar la segirezza cun intensivar la controlla dal traffic pesant che traversa las Alps. Tras quai pon ins plinavant spetgar in effect da spustament.
4. La regenza vegn a sa participar a la procedura da consultaziun tar ina lescha davart il traffic da vitgira. Spezialmain vegn ella a s'engaschar che la finamira dal spustament vegnia cuntanschida pass per pass cun bunas mesiras supplementaras.
5. Tenor il stadi d'enconuschientscha actual vegn considerada la bursa dal transit da las Alps sco in instrument tecnicamain realisabel, effizient ed effectiv da la politica da traffic. Però premetta ella ch'il traffic che traversa las Alps stuess vegnir contingentà en tut il territori alpin. Per pudair giuditgar definitivamain l'opportunitad e l'abilitad d'ina tala soluziun da contingent ston l'emprim esser enconuschentas las consequenzas per il traffic naziunal, la problematica da rutas da sviament alternativas ed er la necessitad da spazis da staziunament e da spetga per lung dals pass sur las Alps.
Datum: 14 da settember 2005