Renviond a las elecziuns dal cussegl da banca ch'èn vegnidas accumpagnadas d'intginas discussiuns ils ultims onns vulan las sutsegnadras ed ils sutsegnaders da l'incumbensa introducir cun ina revisiun da la lescha davart la banca chantunala grischuna ina limitaziun da la perioda d'uffizi ed ina limita da vegliadetgna per las cusseglieras e per ils cussegliers da banca. Domaduas pretensiuns èn vegnidas discutadas detagliadamain gia a chaschun da la debatta en il cussegl grond tar la lescha davart la banca chantunala grischuna la sessiun da matg 1998 ed èn vegnidas refusadas en la votaziun successiva. L'introducziun da la limitaziun da la perioda d'uffizi è stada l'onn 2001 anc ina giada il tema d'ina moziun. Ella è er vegnida refusada cleramain en il cussegl grond.

In sguard retrospectiv sin l'ultim temp mussa ch'ils ultims dudesch onns èn vegnids elegids otg commembers novs en il cussegl da banca. Plinavant n'èn vegnidas proponidas al cussegl grond ils ultims onns naginas candidatas e nagins candidats per il cussegl da banca ch'avessan gì surpassà il sessantatschintgavel onn da vegliadetgna. Pia sa tschenta la dumonda, sche ina chaussa che vegn pratitgada gia oz voluntarmain ed ord persvasiun, stoppia tuttina obtegnair ina reglamentaziun legala. En vista al frequent giavisch da deregular e da flexibilisar ils relaschs da lescha stuessi plitost vegnir desistì d'ina normaziun. Ultra da quai ha il cussegl grond, sco organ electoral, en maun da procurar sez per la novaziun necessaria dal cussegl da banca. Sch'el stipulescha ina limitaziun da la perioda d'uffizi ed ina limita da vegliadetgna per las commembras e per ils commembers dal cussegl da banca, sa restrenscha il cussegl grond sez en sias cumpetenzas e dat uschia la preferenza ad ina soluziun schematica e fixa empè da ad ina soluziun flexibla ch'è adattada er per situaziuns spezialas.

Sco organ strategic da la banca prenda il cussegl da banca decisiuns impurtantas che pertutgan l'orientaziun da la banca. Enconuschientschas spezialisadas ed ina gronda experientscha èn premissas impurtantas per l'uffizi d'ina cussegliera u d'in cusseglier da banca. Quest uffizi n'è betg "simplamain" in uffizi d'onur. Plitost è cumbinada ina gronda responsabladad cun l'activitad d'ina cussegliera u d'in cusseglier da banca. Da quai resulta ch'ina rotaziun per motivs da la rotaziun sto vegnir refusada.

La regenza è dentant pronta d'examinar, sche la limitaziun da la perioda d'uffizi e sche la limita da vegliadetgna per cusseglieras e per cussegliers da banca è la dretga via, per che quest gremi servia anc pli fitg als interess da la banca ed uschia al chantun. Eventualmain pudess l'introducziun d'ina limita da vegliadetgna sa mussar obsoleta, sch'ina limitaziun da la perioda d'uffizi vegniss introducida.

L'examinaziun d'ina limitaziun da la perioda d'uffizi e d'ina limita da vegliadetgna na duai dentant a l'avis da la regenza betg sa restrenscher mo sin las commembras e sin ils commembers dal cussegl da banca. La regenza è plitost da l'avis, che questas dumondas stoppian vegnir examinadas en in rom pli vast. I dat differents gremis e differentas cumissiuns (administrativas), en ils quals pon seser deputadas e deputads ed autras persunas d'ordaifer l'administraziun. Las limitaziuns correspundentas duain vegnir examinadas er per quests gremis. Plinavant po vegnir examinà en questa occasiun in redimensiunament dal cussegl da banca ed i po vegnir discutada la dumonda dal gremi electoral per il cussegl da banca. Finalmain èsi da far la dumonda, sche las premissas per l'elecziun en il cussegl da banca stoppian vegnir precisadas.

En il senn da questas explicaziuns è la regenza pronta d'acceptar l'incumbensa.

Datum: 9 da settember 2005