Navigation

Inhaltsbereich

Dumonda Augustin concernent la polizia chantunala

Sessiun: 30.08.2005
Il 1-7-2005 è la nova lescha da polizia dal chantun Grischun (LPol) entrada en vigur. Or da las medias èsi enconuschent che la polizia stat en general sut in grond squitsch dal temp. Divers corps da polizia èn pervi da quai er vegnids engrondids areguard il persunal l'ultim temp. En il Grischun è perencunter en il rom dals conclus per sanar las finanzas chantunalas vegnida sistida in'amplificaziun dal corp da polizia ch'è vegnida decidida curt avant e che n'avess dentant tuttina mai pudì vegnir realisada. La polizia da sia vart sa vesa confruntada cun sfidas che creschan ad in crescher, entant che l'effectiv dals proxims onns vegn reducì anc ina giada fermamain pervi da pensiunaments natirals. En quest senn supplitgain nus la regenza da respunder las suandantas dumondas:

1. Tgenin è l'effectiv actual precis da la polizia chantunala (senza emploiadas u emploiads civils)? Cun quants pensiunaments presumptivs ston ins far quint per ils onns 2005, 2006, 2007 e 2008?

2. Constatti che la polizia chantunala è vegnida confruntada ils ultims onns cun adina dapli novas incumbensas supplementaras e che las activitads d'enfin ussa èn daventadas pli pretensiusas pervi dal svilup da la tecnologia? Èsi pussaivel da far ina constataziun davart il svilup futur da la lavur da la polizia areguard la qualitad resp. areguard la quantitad?

3. Pertge è la planisaziun da renunzia, cun la quala è vegnì incumbensà il commando da polizia e ch'è vegnida elavurada da tal per mauns dal departament e da la regenza, vegnida chaschuttada e betg realisada? (En quest connex vegn la regenza supplitgada da dar al parlament invista da las propostas detagliadas concernent la planisaziun da renunzia, perquai ch'ina discussiun politica correspundenta è mo pussaivla sin basa da quai).

4. È la regenza pronta (ed eventualmain cura) da puspè metter sin la glista da tractandas l'augment da l'effectiv dal corp decidì pli baud ed alura sistì, e da concluder in augment?

5. Tenor la communicaziun da la federaziun grischuna da las funcziunarias e dals funcziunaris da polizia (FGFP) datti en tscherts circuls sco ch'i para l'intenziun (bain betg exprimida) da far sa basond sin l'art. 5 al. 3 da la nova LPol cun in grond dumber da vischnancas contracts analogs a quel cun Puschlav. È questa communicaziun publica dal sindicat da polizia gista u faussa?

6. È la regenza pronta da declerar al parlament ed uschia a la publicitad ed a la polizia chantunala e da garantir cun quai ch'i na dettia nagina intenziun d'introducir ina polizia unitara en il Grischun ni a curta vista ni a lunga vista ed er betg cun l'agid da l'art. 5 al. 3 LPol?

Cuira, ils 30 d'avust 2005

Name: Augustin, Barandun, Bleiker, Capaul, Casty, Caviezel-Sutter (Tusaun), Dermont, Farrér, Fasani, Hanimann, Hardegger, Portner, Righetti, Robustelli, Stiffler, Zanetti, Campell

Session: 30.08.2005
Vorstoss: rg Anfrage


Resposta da la regenza

1. Il 1. da settember 2005 aveva l'effectiv actual da la polizia chantunala 402,1 plazzas da lavur (da quellas 37 per emploiadas e per emploiads civils). Per l'onn 2005 fa la polizia chantunala quint cun totalmain 25 extradas. Per ils onns suandants parta ella da circa 20 extradas per onn. Uschia croda l'effectiv real gia en il decurs da l'onn 2006 sut l'effectiv reglamentar da 378,6 plazzas da lavur. I na vegn betg ad esser pussaivel d'ademplir l'effectiv reglamentar cun scolar mintga onn 15 aspirantas ed aspirants da polizia en la scola da polizia dals chantuns da la Svizra orientala ad Amriswil. Pervi da quai s'imponan in augment dal contingent grischun vi da la scola da polizia dals chantuns da la Svizra orientala sco er recrutaziuns supplementaras, per exempel cun midadas or dad auters corps da polizia.

2. Sco quasi dapertut en l'administraziun ha er la polizia chantunala stuì surpigliar novas incumbensas supplementaras ils ultims onns. En quest connex pon vegnir numads l'intervenziun tar violenza a chasa, il dumogn dal traffic pesant e las mesiras da dosar tal sin la A 13. Spezialmain bler persunal dovran acziuns da la polizia che concernan la segirezza (WEF, acziuns da concordat, incumbensas per proteger persunas sco er la EURO 08 vegninta). Ultra da quai daventa la lavur da la polizia criminala adina pli pretensiusa e las pretensiuns a las retschertgas da TI s'augmentan pli e pli. Pretensiuns pli autas vegnan ozendi er fatgas a las proceduras polizialas da retschertga.

3. Las mesiras ch'èn colliadas cun la reducziun da l'effectiv reglamentar per 33 plazzas da lavur e la renunzia da la scola da polizia 2006 han lur effect pir per il 1. da schaner 2007. La planisaziun da renunzia n'è pervi da quai anc betg vegnida realisada. Pervi dal svilup da l'effectiv real sto la polizia chantunala adina puspè tschentar prioritads e far adattaziuns tar l'adempliment da las incumbensas. En la planisaziun da renunzia propona la polizia chantunala da renunziar a la controlla dals formulars d'annunzia dals hotels, a l'instrucziun da traffic, a mesiras da segirezza en il cussegl grond ed a la cussegliaziun da segirezza. Tenor l'opiniun da la polizia chantunala è imaginabla ina reducziun qualitativa per exempel tar la preschientscha e tar la prevenziun sco er tar las uras d'avertura dals spurtegls dals posts da polizia. In transferiment d'incumbensas ad auters posts da l'administraziun u a persunas privatas saja pussaivel tar accumpagnaments da transport, tar servetschs da chauffeura u da chauffeur, tar la retratga da numers d'immatriculaziun, tar consegnas, tar preschentaziuns e tar la procedura da natiralisaziun. La regenza vegn ad examinar questas propostas en il decurs da l'onn 2006 ed a realisar la planisaziun da renunzia fin il 1. da schaner 2007.

4. Pervi dals conclus da spargn dal cussegl grond vegn in augment da l'effectiv en dumonda il pli baud per il 1. da schaner 2008. Resguardond la durada da la recrutaziun e da la scolaziun da las aspirantas e dals aspirants da polizia vegn in augment da l'effectiv a mussar effect pir a partir da l'onn 2009 respectivamain 2010. Pervi da quai ha la regenza incumbensà la polizia chantunala da far in rapport fin la fin da l'onn 2005 per ina discussiun futura da l'effectiv.

5. L'art. 5 al. 3 da la lescha da polizia prevesa la pussaivladad che la regenza po sin dumonda d'ina vischnanca reglar sin basa contractuala che la polizia chantunala surpiglia permanentamain incumbensas da la polizia communala, e quai cunter ina indemnisaziun. Gia en la missiva tar la lescha da polizia ha la regenza rendì attent al fatg ed explitgà che l'indemnisaziun stoppia vegnir duvrada per engaschar ulteriuras forzas tar la polizia chantunala. La cumissiun da gestiun dal cussegl grond ha approvà quest proceder ils 9 da favrer 2005.

6. L'introducziun d'ina polizia unitara en il Grischun n'è betg planisada. In'empermischun ch'i possia vegnir renunzià ad ina tala er a lunga vista, na sa lascha dentant betg dar. L'introducziun d'ina polizia unitara en tut il chantun Grischun, sco ch'ella vegn realisada actualmain en auters chantuns (p.ex. Berna), pretendess en mintga cas ina revisiun da la lescha da polizia.

Datum: 17 d'october 2005