Incumbensa da cumissiun Trepp da la CSF concernent la protecziun da nunfimadras e da nunfimaders cunter il fimar passiv
Sessiun: 17.10.2005
En Svizra mora mintga di in uman pervi dal fim da tubac, malgrà ch'el n'ha mai fimà. En il decurs d'in onn vegnan malsaunas millis e millis persunas; bleras da quellas grevamain. Pertutgada è glieud da tut las vegliadetgnas. Ils custs per la sanadad e per l'economia èn immens, las suffrientschas umanas èn grondas e la restricziun da la libertad en la vita da mintgadi è considerabla per la gronda maioritad da la populaziun svizra.
En il fratemp lascha er l'industria da tubac valair ch'il fim da tubac d'autras persunas il fimar passiv fa vegnir malsaun e mazza. Er ella sustegna mesiras cunter il fimar passiv il factur il pli impurtant per l'impestaziun da l'aria en localitads. Per il fim da tubac na vegnan fixadas naginas limitas, perquai che gia quantitads fitg pitschnas chaschunan cancer.
Tras l'atgna responsabladad na pon las persunas pertutgadas 75 pertschient da la populaziun na consumescha nagins products da tubac e las instituziuns betg prevegnir al donn. Ellas èn dependentas dal fatg ch'i vegnian serradas las largias en la legislaziun existenta.
Sin basa da la situaziun da partenza qua survart vegn la regenza intimada da suttametter al cussegl grond in project per ina protecziun efficazia da las nunfimadras e dals nunfimaders a l'intern da localitads ch'èn accessiblas al public sco er a l'intern ed a l'extern da stabiliments che vegnan utilisads per la scolaziun u per activitads da temp liber d'uffants e da giuvenils.
Cuira, ils 17 d'october 2005
Name: Trepp, Augustin, Capaul, Caviezel (Pitasch), Christ, Hardegger, Märchy-Michel, Parolini, Portner, Robustelli
Session: 17.10.2005
Vorstoss: rg Auftrag
Resposta da la regenza
Il fimar passiv è in privel per la sanadad. Tar nunfimadras e tar nunfimaders po il fimar passiv chaschunar cancer dal lom, malsognas dal cor e da la circulaziun, asma ed infecziuns da las vias respiratorias. Las lavurs da perscrutaziun las pli novas mussan ch'ina exposiziun unica al fim passiv durant ina mesa ura basta per indeblir il cor da nunfimadras e da nunfimaders. La ristga d'ina apoplexia (culp dal tscharvè) tar nunfimadras e tar nunfimaders ch'èn exponids al fimar passiv è duas giadas uschè gronda sco tar persunas betg exponidas.
Stimaziuns han mussà che ca. 50'000 nunfimadras e nunfimaders moran mintga onn en ils Stadis unids en consequenza dal fimar passiv, principalmain en consequenza da malsognas dal cor e da la circulaziun. Sin basa da quests resultats mussa ina stimaziun precauta per la Svizra che plirs tschients nunfimadras e nunfimaders moran mintga onn pervi dal fimar passiv.
Nunfimadras e nunfimaders èn per regla exponids nunvoluntaramain al fimar passiv, quai vul dir ch'ellas e ch'els resentan il fimar passiv sco ina mulesta. Il fim da tubac d'autras persunas vegn resentì il pli savens sco mulesta en restaurants ed en cafés.
Sin basa da la periclitaziun cumprovada per la sanadad che resulta dal fimar passiv è la regenza da l'avis ch'i saja inditgà da proteger las nunfimadras ed ils nunfimaders tras ina regulaziun legala correspundenta cunter il fimar passiv en edifizis ed en instituziuns ch'èn accessibels per il public, e quai resguardond ils princips da la pratitgabladad e da l'acceptanza.
Sin basa da questas ponderaziuns propona la regenza d'acceptar l'incumbensa da cumissiun da la CSF concernent la protecziun da nunfimadras e da nunfimaders cunter il fimar passiv en il senn d'ina soluziun differenziada.
Datum: 13 da december 2005