Navigation

Inhaltsbereich

Dumonda Farrér concernent la realisaziun da l'ordinaziun davart la qualitad ecologica (OQE)

Sessiun: 06.12.2005
Tenor l'ordinaziun federala davart la promoziun regiunala da la qualitad e da la colliaziun da surfatschas da cumpensaziun ecologica en l'agricultura (OQE) sustegna la confederaziun la promoziun da la varietad natirala da las spezias. Surfatschas da cumpensaziun ecologica d'ina qualitad biologica speziala entaifer las surfatschas utilisadas da l'agricultura e da las surfatschas da colliaziun vegnan sustegnidas cun agids finanzials. Per quai conceda la confederaziun agids finanzials als chantuns per contribuziuns che quels pajan a cultivaturas ed a cultivaturs per surfatschas da cumpensaziun ecologica e per projects da colliaziun. La fixaziun da las pretensiuns per cumprovar la qualitad biologica da las surfatschas è chaussa dals chantuns.
Cun il conclus dals 9 da fanadur 2002 ha la regenza dal chantun Grischun nominà comunablamain il UAMM ed il UNA per far l'execuziun, e quai en coordinaziun cun las cultivaturas e cun ils cultivaturs. Cun il medem conclus da la regenza èn er vegnidas fixadas las contribuziuns per garantir la qualitad, las surfatschas cun in dretg da subvenziun potenzial e las pretensiuns da cultivaziun. Il conclus è limità fin ils 31 d'avust 2006.
Perquai che las finamiras da la OQE, en spezial la realisaziun dals concepts da colliaziun en il chantun Grischun, vegnan cuntanschidas mo en moda tardivanta, dumondan las sutsegnadras ed ils sutsegnaders da respunder las suandantas dumondas:

1. Co è organisada la realisaziun da projects OQE sur il DIEP / DECA? Èn mess a disposiziun avunda meds finanzials per ademplir las obligaziuns currentas?

2. En tge vischnancas dal chantun èn iniziads projects tenor la OQE, en tge vischnancas vegnan projects realisads proximamain ed en tge vischnancas po anc vegnir fatg quint cun la realisaziun da projects tenor la OQE?

3. Fa la regenza quint da prender mesiras per accelerar en moda effizienta la realisaziun da la OQE e la realisaziun da projects da colliaziun?

4. Co giuditgescha la regenza las pretensiuns da cumprovar la qualitad biologica e la colliaziun da las surfatschas? Co giuditgescha la regenza il nivel da las contribuziuns per garantir la qualitad cumpareglià cun ils auters chantuns? Èn adattaziuns inditgadas, e sche gea, tgeninas?

5. Vegnan ils meds finanzials che vegnan mess a disposiziun da la confederaziun tratgs totalmain a niz dals chantuns e vegnan ils meds finanzials per il chantun Grischun tratgs a niz dal chantun?

Cuira, ils 7 da december 2005

Name: Farrér, Barandun, Christoffel-Casty, Beck, Bischoff, Bundi, Butzerin, Capaul, Casanova (Vignogn), Christ, Dermont, Fasani, Federspiel, Fleischhauer, Heinz, Jaag, Jäger, Jenny, Joos, Kessler, Kleis-Kümin, Koch, Krättli-Lori, Luzio, Maissen, Meyer-Grass (Claustra), Mengotti, Michel, Parolini, Pfenninger, Pfister, Plozza, Portner, Quinter, Righetti, Rizzi, Sax, Schmid, Stoffel, Thomann, Tomaschett, Zanetti, Zarn, Caviezel (Cuira), Florin-Caluori, Pitsch, Toschini

Session: 6.12.2005
Vorstoss: rg Anfrage


Resposta da la regenza

Dumonda 1
La part chantunala vi da las contribuziuns tenor la OQE vegn budgetada tar l'uffizi d'agricultura, meglieraziun da structura e mesiraziun (UAMM). Il pajament da las contribuziuns vegn coordinà cun ils pajaments directs generals. L'onn 2006 è il chantun Grischun vegnì classifitgà tar ils chantuns cun ina pitschna forza finanziala e perquai surpiglia el mo pli 10 % da las contribuziuns tenor la OQE (2005: 20 %). Ins po far quint ch'ils meds finanzials dal chantun e da la confederaziun che stattan a disposiziun ils onns 2006 e 2007 bastian. Per il temp a partir da l'onn 2008 n'èsi betg pussaivel da far ina prognosa. Sco consequenza da la nova gulivaziun da finanzas tranter la confederaziun ed ils chantuns vegn il chantun a stuair surpigliar eventualmain ina part da 30 %. Ultra da quai dependa il basegn da meds finanzials per gronda part dal dumber dals contracts ch'existan alura.
Cun ils projects da colliaziun tenor la OQE vegn reglada er la protecziun da dretg privat dals inventaris tenor la lescha federala davart la protecziun da la natira e da la patria (LNP). Responsabel è l'uffizi per la natira e l'ambient (UNA) che examinescha ils projects da colliaziun regiunals. Per l'elavuraziun da quests concepts pajan il chantun e la confederaziun contribuziuns sin basa da la LNP. Las vischnancas surpiglian 50 % dals custs. Ins po far quint ch'il chantun possia metter a disposiziun avunda meds finanzials per pudair ademplir sias obligaziuns.
L'elavuraziun dals contracts da cultivaziun (tranter las cultivaturas resp. ils cultivaturs ed il UNA) succeda per incumbensa dal UNA sin donn e cust da la confederaziun e dal chantun.

Dumonda 2
En 40 vischnancas èn gia realisads concepts da colliaziun: Fläsch, Maiavilla, Jenins, Malans, Trimmis, Says, Haldenstein, Favugn, Tumein, Trin, Laax, Falera, Sagogn, Schluein, Castrisch, Val S. Pieder, Tenna, Sarn, Preaz, Purtagn, Tartar, Sched, Veulden, Tràn, Tumegl, Pasqual, Roten, Pratval, Farschno, Almen, Scharàns, Seglias, Furna, Tschlin, Ramosch, Ftan, Bever, Samedan, Puschlav, Brusio.
Las suandantas 28 vischnancas han gia in concept da colliaziun regiunal; ils contracts vegnan fatgs a partir da l'onn 2006: Breil, Schlans, Sumvitg, Flond, Sursaissa, Surcuolm, Luven, Runtgaglia, Lon, Maton, Casti-Vargistagn, Pazen-Farden-Donat, Clugén, Andeer, Ziràn-Reschen, Pignieu, Lantsch, Brinzauls, Stierva, Mon, Salouf, Beiva, Sent, Scuol, Ardez, Mesauc, Soazza, Lostallo.
En 25 vischnancas vegn elavurà in concept da colliaziun regiunal resp. èsi vegnì concludì d'elavurar in tal concept. Cun l'elavuraziun dals contracts da cultivaziun po vegnir cumenzà previsiblamain l'onn 2007.

Dumonda 3
Ils custs per elavurar ils contracts da cultivaziun èn vegnids surpigliads fin ussa da la confederaziun e dal chantun (UNA). En ils auters chantuns ston er las cultivaturas ed ils cultivaturs surpigliar ina part dals custs. L'interess da las cultivaturas e dals cultivaturs da far in contract è s'augmentà zunt fitg dapi che la OQE è entrada en vigur l'onn 2001. Ils meds finanzials dal UNA n'èn betg vegnids augmentads en la medema dimensiun. En il rom dal preventiv per l'onn 2007 è la regenza pronta d'examinar in augment dals meds finanzials. En cas ch'ils meds finanzials na vegnan betg augmentads, ston ins quintar cun in temp da spetga da fin quatter onns per far contracts da cultivaziun ubain ch'il manco sto vegnir surpiglià sco en auters chantuns da las cultivaturas e dals cultivaturs.
Contracts da cultivaziun pon dal rest vegnir fatgs mo là, nua che las datas da mesiraziun èn rectifitgadas.

Dumonda 4
Las pretensiuns minimalas a la qualitad dals prads cun dretg da contribuziun èn definidas en la OQE. Il chantun Grischun ha augmentà levamain questas pretensiuns, perquai che las consequenzas finanzialas n'han betg pudì vegnir valitadas gia ordavant. En il fratemp èsi sa mussà ch'i na chaschunass betg custs bler pli gronds, sch'i vegnissan surpigliadas las pretensiuns da la OQE.
Tar il grad da specificaziun dals concepts da colliaziun ha il chantun Grischun chattà ina soluziun che porscha anc ina libertad fitg gronda da contractar cun las cultivaturas e cun ils cultivaturs durant l'elavuraziun dals contracts. Quai è sa cumprovà.
Sche las contribuziuns da cultivaziun vegnissan augmentadas, stuess vegnir augmentà il preventiv da la LNP. Tar ils prads cun flurs raras n'èn las contribuziuns da qualitad da la OQE perencunter anc betg vegnidas tratgas a niz cumplainamain fin ussa.

Dumonda 5
Ils meds finanzials da la confederaziun per il chantun Grischun sco er ils meds finanzials dal chantun èn vegnids tratgs a niz l'onn 2005 per 70 %. La regenza n'enconuscha betg la situaziun en ils ulteriurs chantuns.

Datum: 13 da mars 2006