Navigation

Inhaltsbereich

Dumonda concernent la situaziun da las purschidras e dals purschiders da la tgira d'uffants cumplementara a la famiglia suenter l'introducziun da la lescha davart la promoziun da la tgira d'uffants cumplementara a la famiglia en il chantun Grischun

Sessiun: 06.12.2005
Ils 15 da november 2003 è entrada en vigur la lescha davart la promoziun da la tgira d'uffants cumplementara a la famiglia en il chantun Grischun. Dapi il 1. da schaner 2004 survegnan las purschidras ed ils purschiders, sco p.ex. las canortas d'uffants pitschens, las canortas d'uffants e las uniuns da famiglias da di, contribuziuns dal chantun e da las vischnancas da domicil als custs normads renconuschids. La regenza ha laschà la tariffa da contribuziun per l'onn 2006 senza midadas sin il minimum legal da mintgamai 15 %.
La situaziun finanziala da las purschidras e dals purschiders da tgira d'uffants cumplementara a la famiglia en il chantun Grischun è fitg precara er dus onns suenter l'entrada en vigur da la lescha. Ils motivs persuenter èn cumplexs. Da la vart dals custs han en emprima lingia ils custs da persunal gronda paisa. La qualitad d'assistenza giavischada na permetta dentant betg a las purschidras ed als purschiders da reducir ils custs da persunal, tant pli che las pajas che vegnan pajadas oz èn fitg bassas. Ultra da quai vegnan las purschidras ed ils purschiders pervi da l'ordinaziun federala davart la furmaziun professiunala da basa "spezialista/spezialist d'assistenza" ch'è vegnida relaschada sin fundament da la nova lescha davart la furmaziun professiunala e ch'è entrada en vigur il 1. da fanadur 2005 a stuair far quint cun custs supplementars considerabels en quest sectur. Ellas ed els vegnan a stuair ademplir las pretensiuns da questa ordinaziun (dapli instrucziun da scola, assistenza intensiva tras spezialistas u spezialists) per pudair porscher plazzas d'emprendissadi er en il futur. Ulteriurs problems resultan tut tenor la regiun da l'occupaziun suttamessa a grondas fluctuaziuns e dals fits da locaziun fitg auts.

Da l'autra vart vegnan las purschidras ed ils purschiders sfurzads per lescha da graduar las tariffas tenor la capacitad economica dals geniturs. Quai è ina gronda distgargia per las autoritads da provediment, ma in'enorma ristga per las purschidras e per ils purschiders. Las tariffas bassas actualas na cuvran insumma betg ils custs, malgrad las contribuziuns dal chantun e da las vischnancas. Il quint da las purschidras e dals purschiders po mo ir si, sche las purschidas vegnan duvradas er da suffizientamain geniturs cun in bun gudogn. Gia oz sa lamentan dentant blers geniturs davart las tariffas memia autas e n'èn betg pronts da pajar tariffas anc pli autas.

Da differentas varts vegni plinavant crititgà che la realisaziun da la lescha chaschunia ina lavur administrativa exagerada; in fatg che augmentia puspè ils custs da persunal. En spezial è la planisaziun dal basegn prescritta da la lescha, la quala sto vegnir elavurada annualmain ensemen cun las vischnancas, fitg difficila.

Nus supplitgain la regenza da respunder pervi da quai las suandantas dumondas:

1. Tge mesiras prevesa la regenza per simplifitgar la lavur administrativa da las purschidras e dals purschiders da tgira d'uffants cumplementara a la famiglia?

2. Cura fa la regenza quint da considerar la situaziun finanziala precara da las purschidras e dals purschiders augmentond la tariffa da contribuziun, per pudair garantir ch'ils manaschis pon metter a disposiziun las plazzas d'emprendissadi fitg dumandadas da spezialistas u da spezialists d'assistenza er en il futur, e quai en in dumber suffizient ed adequat?

Cuira, ils 6 da december 2005

Name: Robustelli, Meyer Persili (Cuira), Hardegger, Arquint, Augustin, Bachmann, Barandun, Berther (Sedrun), Bischoff, Bucher-Brini,Bühler-Flury, Cahannes, Capaul, Casanova (Cuira), Casty, Cavegn-Kaiser, Caviezel (Pitasch), Caviezel-Sutter (Tusaun), Cavigelli, Christ, Claus, Dermont, Fasani, Feltscher, Frigg-Walt, Hanimann, Hess, Jaag, Jäger, Jenny, Joos, Kessler, Kleis-Kümin, Koch, Marti, Meyer-Grass (Claustra), Mengotti, Michel, Noi-Togni, Parolini, Pedrini, Perl, Peyer, Pfenninger, Pfiffner, Rizzi, Stiffler, Thomann, Tramèr, Trepp, Blarer, Brasser, Caviezel (Cuira), Hartmann (Cuira), Pitsch, Toschini

Session: 6.12.2005
Vorstoss: rg Anfrage


Resposta da la regenza

Sin fundament da las infurmaziuns che stattan actualmain a disposiziun na sa laschan trair naginas conclusiuns liantas davart ils motivs da las difficultads finanzialas da singulas purschidras e da singuls purschiders. Per quest intent vegn fatga ussa in'analisa da l'effect da la lescha davart la promoziun da la tgira d'uffants cumplementara a la famiglia en il chantun Grischun ch'è entrada en vigur il 1. da schaner 2004. Per obtegnair datas expressivas davart las consequenzas da la lescha sin la situaziun finanziala da las purschidras e dals purschiders cumpiglia l'analisa ils onns da gestiun 2004 e 2005. Il resultat da l'analisa cun recumandaziuns d'agir stuess esser avant maun il decurs da questa stad.
Sco ch'i vegn constatà correctamain en la dumonda vegnan a s'augmentar tras l'ordinaziun davart la furmaziun professiunala da basa "spezialista d'assistenza/spezialist d'assistenza", relaschada da l'uffizi federal da furmaziun professiunala e da tecnologia ils 16 da zercladur 2005 ils custs da persunal da las purschidras e dals purschiders da plazzas d'emprendissadi. Tenor la nova ordinaziun na pon las emprendistas ed ils emprendists betg pli vegnir engaschads en la medema dimensiun e quai pervia da l'instrucziun en scola ch'è s'augmentada tar lur furmaziun. Per emprendista u per emprendist sto esser preschenta ina furmatura u in furmatur da la professiun almain a 60 pertschient. Per mintga ulteriura emprendista u per mintga ulteriur emprendist èn necessaris ulteriurs 160 pertschients da plazzas da collavuraturas u da collavuraturs qualifitgads. Ils custs da persunal augmentads sa manifesteschan en ils custs normads, als quals sa participeschan il chantun e las vischnancas cun mintgamai 15 fin 25 pertschient.

Respostas a las dumondas concretas
1. Cun in sistem da finanziaziun orientà a la prestaziun èsi indispensabel ch'i vegnian registradas tschertas datas tar las purschidras e tar ils purschiders. Quai chaschuna cunzunt l'emprim temp ina lavur administrativa relativamain gronda. Questa lavur sa reducescha en il decurs dal temp, cur ch'ils andaments èn daventads rutina.
En connex cun la planisaziun dal basegn e pia cun la coordinaziun tranter purschidras u purschiders e vischnancas pon vegnir fatgas partind da las disposiziuns legalas vertentas simplificaziuns administrativas mo limitadamain. Sche talas simplificaziuns èn pussaivlas, vegnan ellas realisadas.

2. La cumpetenza da fixar e pia er d'augmentar la tariffa actuala da contribuziun ha il cussegl grond. La regenza sto desister d'ina tala dumonda, perquai ch'i ston vegnir tratgas en emprima lingia las conclusiuns da l'analisa da l'effect ch'è vegnida incumbensada.

Datum: 2 da mars 2006