Navigation

Inhaltsbereich

Incumbensa da fracziun da la PLD Hanimann concernent la strategia da proprietari dal chantun per la viafier retica

Sessiun: 13.02.2006
En blers reguards stat la viafier retica davant incumbensas captivantas. Per l'avegnir è ella sa suttamessa ad in process strategic, cun il qual ella emprova d'impunder uschè bain sco pussaivel las resursas finanzialas stgarsas.
Il basegn finanzial da la viafier retica sa manifestescha tranter auter sin basa dals suandants secturs:
1. basegn da chapital pervi da la posiziun en il martgà
2. basegn da chapital pervi da stentas generalas da spargnar da vart da la confederaziun
3. basegn da chapital pervi d'in basegn da cumpensaziun parzial tar las investiziuns en il material rullant (traffic da persunas) ed en las construcziuns d'infrastructura (tunnels, punts e.u.v.)
4. basegn da chapital pervi da la decisiun positiva dal pievel per la Porta Alpina
Sin basa da questa situaziun da partenza e betg sco ultim er en vista a la situaziun finanziala dal chantun sto il chantun Grischun sco cumproprietari da la viafier retica esser conscient davart ses engaschament futur, e quai cun la necessitad da metter prioritads.
Las deputadas sutsegnadras ed ils deputads sutsegnaders da la PLD tschentan perquai las suandantas dumondas:
1. È la regenza er da l'avis ch'il basegn d'investiziuns da la viafier retica saja cumprovà?
2. Quant grond valitescha ella il basegn per ils onns vegnints?
3. È quest basegn gia vegnì resguardà en la planisaziun?
4. Quant enavant è la regenza pronta - resguardond ina clera strategia da proprietari - da metter a disposiziun ils meds necessaris per la viafier retica e da conceder en quest connex a la viafier retica ina posiziun privilegiada visavi projects ad hoc, per ch'ella possia ademplir la rolla fitg impurtanta da l'economia publica per il Grischun?
5. Co quinta la regenza da preceder en quai che reguarda la strategia da proprietari dal chantun?
Cuira, ils 13 da favrer 2006


Name: Hanimann, Bachmann, Bär, Barandun, Bischoff, Caviezel (Pitasch), Christ, Feltscher, Giacometti, Hartmann, Hess, Joos, Kesser, Marti, Meyer-Grass, Michel, Perl, Rizzi, Robustelli, Telli, Thomann, Tramèr, Toschini, Bernhard

Session: 13.02.2006
Vorstoss: rg Auftrag



Resposta da la regenza

I constat che las cundiziuns generalas che vegnan per part tematisadas en la dumonda mettan la viafier retica davant novas sfidas. Per quest intent ha la viafier retica elavurà ina nova strategia che duai garantir che l'interpresa saja abla d'agir er en l'avegnir. Cun la "strategia 2012" vul la viafier retica sa profilar sco viafier da pendularias e da pendularis, d'aventura e da rauba, e quai cun s'orientar a la clientella e cun resguardar ils princips d'interpresa. A medem temp vul ella surpigliar anc pli fitg sia funcziun da "locomotiva" en il turissem dal Grischun.

La dumonda parlamentara sa fatschenta logicamain main cun la strategia da l'interpresa che plitost cun l'engaschament futur dal chantun sco acziunari da maioritad e sco proprietari da l'interpresa. Las singulas dumondas sa laschan respunder sco suonda:

1./2. Pervi da la vegliadetgna ston vegnir fatgas ils proxims onns sanaziuns urgentas e voluminusas per pudair mantegnair la rait da viafier segira ed attractiva. En connex cun l'elavuraziun da la missiva a la confederaziun davart il 9avel credit general per contribuziuns d'investiziun ad interpresas da viafier concessiunadas ha la viafier retica stimà il basegn da sanaziun per ils onns 2007 - 2010 a totalmain 558 milliuns francs. Il basegn da sanaziun correspundent è vegnì renconuschì da represchentantas e da represchentants da l'uffizi federal da traffic sco transparent e suandabel. Per la regenza na datti nagin motiv da metter en dubi quest basegn d'investiziun. Plinavant po l'interpresa satisfar als basegns actuals e futurs da la clientella confurm al martgà mo cun far grondas investiziuns en nov material rullant. Durant ils onns 2006 - 2009 sto perquai vegnir remplazzà successivamain il material rullant antiquà. Il volumen d'acquisiziuns importa en tut 355 milliuns francs.

3. Per il chantun Grischun regla ina cunvegna da l'onn 1997 cun la confederaziun las parts chantunalas vi da l'indemnisaziun (7 %) resp. vi da las contribuziuns d'investiziun (18 %). Questa cunvegna resguarda che la viafier retica ademplescha en il chantun svizzer cun la surfatscha la pli gronda incumbensas sumegliantas per il traffic da persunas e da rauba sco las viafiers federalas en autras parts dal pajais. Ella resguarda plinavant che la viafier retica sto - sco viafier da muntogna - furnir sias prestaziuns sut cundiziuns da producziun pli difficilas. Mesirà cun il basegn prognostitgà da la viafier retica per l'onn 2007 vegn calculà in dretg d'indemnisaziun da var 125 milliuns francs. Da quai surpiglia il chantun 13.7 milliuns francs. Vitiers vegnan contribuziuns d'investiziun per l'infrastructura da totalmain 73 milliuns francs. Qua importa la part chantunala var 13 milliuns francs.

4./5. La regenza è conscienta da la gronda impurtanza da la viafier retica per l'economia publica dal chantun. Consequentamain è ella er pronta da far tut per cuntanscher cundiziuns generalas finanzialas favuraivlas da vart da la confederaziun e cunzunt da procurar che la cunvegna tranter la confederaziun ed il chantun Grischun vegnia observada. Confurm a questa cunvegna è la regenza pronta da pajar en l'avegnir la part chantunala tant a l'indemnisaziun sco er a las contribuziuns d'investiziun. Per finanziar e per renovar il material rullant ha la regenza l'intenziun da conceder a la viafier retica ina contribuziun à fonds perdu da 22 milliuns francs ord ils retgavs extraordinaris en connex cun il rembursament pendent dal chapital da dotaziun da la banca chantunala grischuna inclusiv l'agio. Per decider davart il diever dals meds finanzials è cumpetent il cussegl grond. En il rom da las pussaivladads dal chantun è la regenza ultra da quai pronta da metter a disposiziun a la viafier retica emprests chantunals per cumprar il material rullant.


Datum: 18. April 2006