Dumonda Hardegger concernent la participaziun da las vischnancas als meds finanzials che vegnan libers cun il rembursament resp. cun la transfurmaziun da chapital da dotaziun da la banca chantunala grischuna
Sessiun: 13.02.2006
En connex cun la reducziun da las reservas d'aur da la banca naziunala e cun il pajament respectiv als chantuns n'han las vischnancas grischunas fatg naginas pretensiuns envers ina participaziun. Il cussegl grond è stà d'accord che l'entira part dal chantun Grischun da 436,2 milliuns francs vegnia messa a disposiziun al chantun per rembursar debits. Auters chantuns han laschà participar las vischnancas a quests imports extraordinaris.
Tenor ina communicaziun a las medias da la banca chantunala grischuna vegnan transferids al chantun - ensemen cun la part dal gudogn - la primavaira 2006 per reducir l'agen chapital 20 milliuns francs chapital da dotaziun plus agio (pretsch supplementar correspundentamain a las reservas avertas e zuppadas da la banca chantunala grischuna) da 100 milliuns francs.
Ina segunda transacziun da chapital cun transfurmar ulteriurs 20 milliuns francs chapital da dotaziun en certificats da participaziun è previsa per il segund quartal da l'onn 2006. Ils novs certificats da participaziun en possess dal chantun vegnan plazzads cun agid d'in emprest convertibel da la banca chantunala grischuna. Sch'il certificat da parizipaziun da la BCG sa sviluppa bain, duain resultar per il chantun en questa moda ulteriurs 180 milliuns francs ils proxims onns.
La banca chantunala grischuna è - cuntrariamain als auters instituts da daners en il chantun - liberada da pajar la taglia supplementara. La pussaivladad da furmar reservas sto tranter auter er vegnir attribuida a questa liberaziun factica da taglia sin plaun communal. Il sutsegnà è da l'avis che las vischnancas duajan perquai sa participar als meds finanzials che vegnan libers cun schliar las reservas zuppadas.
El supplitgescha perquai la regenza da respunder las suandantas dumondas:
1. Èsi vaira che la banca chantunala grischuna è liberada da pajar la taglia supplementara e che uschia saja tranter auter er stà pussaivel a la banca chantunala grischuna d'augmentar reservas considerablas il passà?
2. En tge dimensiun pon circa vegnir numnadas en cifras las perditas fiscalas ch'èn resultadas per las vischnancas.
3. È la regenza da princip er da l'avis ch'i saja inditgà da laschar participar las vischnancas a questa "abundanza da daners" da circa 300 milliuns francs en ina furma adequata?
4. Tge pussaivladads vesa la regenza per laschar participar tut las vischnancas dal chantun - evitond il princip d'ina repartiziun eguala - a quests meds finanzials che vegnan a resultar extraordinariamain.
Cuira, ils 13 da favrer 2006
Name: Hardegger
Session: 13.02.2006
Vorstoss: rg Auftrag
Resposta da la regenza
Cun il consentiment dal cussegl grond è la part chantunala dal retgav ord la vendita da las reservas d'aur da la banca naziunala svizra che n'eran betg pli necessarias per intents monetars vegnida duvrada per amortisar cumplettamain il debit da la cassa da pensiun, per reducir il debit sin las vias e per amortisar cumplettamain las contribuziuns a las investiziuns activadas.
L'agio da stgars 100 milliuns francs ch'è cumbinà cun il rembursament da chapital da dotaziun da la banca chantunala grischuna (BCG) duai vegnir impundì per tschintg projects innovativs e persistents che van a favur da l'entir chantun e da las vischnancas. En il fratemp ha la regenza designà ils projects ed elavurà la basa necessaria; ella ha discutà questa basa cun la cumissiun per economia, taxas e politica da stadi (CETPS) e l'ha la finala repassada sin fundament da las propostas da la CETPS. Quests tschintg projects vegnan suttamess al cussegl grond per la deliberaziun, e quai la sessiun da zercladur 2006 en il rom da la missiva tar il quint statal 2005.
Independentamain dal rembursament da chapital da dotaziun è vegnida transfurmada - l'avrigl da quest onn - in'ulteriura part da chapital da dotaziun en la dimensiun da 20 milliuns francs en chapital da certificats da participaziun (chapital da CP). Quest chapital da CP duai vegnir plazzà en connex cun l'emissiun d'in emprest convertibel da la BCG sin il martgà, e quai en moda "che schanegia il curs". Las persunas emprestantas vegnan a pudair transfurmar lur participaziuns en CP fin la fin da la durada da l'emprest convertibel. L'emprest convertibel dura 8 onns e vala fin ils 8 da matg 2014. En tge dimensiun e cura che las participaziuns vegnan transfurmadas en CP, dependa dal svilup dal martgà. Oz èsi actualmain mo pussaivel da far supposiziuns da quai. Sche las relaziuns dal martgà èn bunas, pon ins dentant spetgar che da las transacziuns da 180 fin 200 milliuns francs vegnian restituidas al chantun; da quellas ston vegnir deducids 20 milliuns francs dal chapital da dotaziun.
Davart las dumondas:
1. Sco institut autonom dal dretg public è la BCG liberada da l'obligaziun da pajar taglia (art. 78 da la lescha chantunala da taglia). Questa liberaziun da taglia cumpiglia er la taglia supplementara (art. 5 da la lescha davart la gulivaziun da finanzas intercommunala). I na po betg vegnir giuditgà definitivamain, sch'igl è stà pussaivel a la banca chantunala grischuna d'augmentar reservas considerablas il passà pervi da quai. Qua duai dentant vegnir renvià al fatg che la consegna dal gudogn da la banca al chantun è s'augmentada cuntinuadamain ed en ina dimensiun allegraivla ils ultims onns. La consegna ha importà l'onn 2002 26.4 milliuns francs, l'onn 2003 38.9 milliuns francs, l'onn 2004 49.9 milliuns francs e l'onn 2005 59.8 milliuns francs (inclusiv l'indemnisaziun da la garanzia chantunala). Ina grevezza fiscala da la banca avess segiramain influenzà la dimensiun da la consegna dal gudogn.
2. Perquai che la BCG na vegn betg suttamessa a la taglia (vesair resposta 1), na vegnan ils quints annuals da l'administraziun da taglia betg controllads; quai signifitgescha ch'il gudogn decisiv tenor las directivas fiscalas na vegn betg eruì. Partind dals quints annuals publitgads (senza la controlla specifica tenor il dretg fiscal) fiss dentant resultada l'onn fiscal 2001 ina taglia supplementara da circa 7 milliuns francs, l'onn fiscal 2004 da circa 9 milliuns francs e l'onn fiscal 2005 da circa 11 milliuns francs. Da quests imports profitassan exclusivamain las vischnancas, saja quai directamain, saja quai sur la gulivaziun da finanzas intercommunala.
3. La regenza ha l'intenziun da participar las vischnancas directamain als retgavs ch'il chantun vegn ad obtegnair, e quai grazia a l'emissiun da CP cun agid d'in emprest convertibel da la BCG. Ils retgavs extraordinaris (l'agio) da la restituziun da chapital da dotaziun duain perencunter vegnir investids - sco menziunà - en intgins projects progressivs. En la sessiun da zercladur 2006 vegn il cussegl grond ad avair la pussaivladad da tractar ils projects proponids.
4. Suenter avair realisà la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) en il chantun - questas lavurs èn actualmain en curs - sto vegnir suttamessa er la gulivaziun da finanzas chantunala (revisiun da la LGF II) ad in repassament cumplessiv. Tar quest project grond sa tracti en emprima lingia d'in detretschament da las incumbensas tranter il chantun e las vischnancas, d'ina refurma da la gulivaziun da finanzas intercommunala sco er d'ina refurma da las structuras communalas.
En il rom da la proxima revisiun da la LGF II duain las vischnancas vegnir sustegnidas cun meds finanzials ord il plazzament da CP. Da quai resulta che la neutralitad concernent ils custs che vegn aspirada cun la NGF na vala betg per quest project consecutiv. La revisiun da la LGF II vegn exequida suenter avair realisà la NGF; l'affluenza dals meds finanzials da la BCG po vegnir spetgada pir ils onns successivs. L'entrada dals retgavs vegn pia ad avair lieu quasi il medem mument sco il basegn da meds finanzials.
Datum: 24. April 2006