Dumonda Noi concernent la relaschada da media dr. Corina Canova da vart da l'ospital da la crusch dal Grischun
Sessiun: 14.02.2006
Sco ch'ins ha pudì leger ils ultims mais en la pressa, è vegnida relaschada ina media spezialisada en angiologia cun las meglras qualificaziuns e cumpetenzas. La media occupava la plazza da schefmedia per la medischina interna a l'ospital da la crusch a Cuira e la plazza da manadra da la partiziun d'angiologia. Ella è vegnida relaschada dal cussegl da fundaziun da l'ospital chantunal dal Grischun. I sto vegnir accentuà che la media pertutgada era particularmain bainvisa tar las pazientas e tar ils pazients e ch'ella aveva ina fitg buna relaziun cun sias collavuraturas e cun ses collavuraturs.
Perquai ch'ina organisaziun da dunnas ha dumandà ch'i vegnia numnada ina cumissiun neutrala per examinar ils motivs da questa relaschada - motivs, ch'èn tut auter che clers - e perquai che l'elecziun da dunnas en posts da responsabladad è vegnida pretendida pliras giadas en il chantun sco er perquai che la fusiun dals ospitals (che cumpiglia er l'ospital da dunnas Fontana ch'è vegnì regalà l'onn 1916 dad Anna von Planta al chantun) è vegnida decidida dal cussegl grond, fatsch jau las suandantas dumondas a la regenza:
1. Tge impedescha la regenza da s'engaschar per ina intermediaziun che ha l'intent da mantegnair al chantun ina media autamain qualifitgada sco dr. Canova?
2. Ils motivs ch'èn vegnids fatgs valair per la relaschada da dr. Canova paran d'esser da natira spirantamain subjectiva ed emoziunala. Pertge na po la regenza betg intervegnir e sustegnair, sche quai la para inditgà, da numnar ina cumissiun che duai s'occupar en moda neutrala da questa fatschenta pauc divertenta?
Cuira, ils 14 da favrer 2006
Name: Noi
Session: 14.02.2006
Vorstoss: rg Auftrag
Resposta da la regenza
Il cussegl administrativ da la societad d'ospitals da Cuira SA ha visà la fin da november da l'onn passà la relaziun da lavur cun dr. med. Corina Canova per il 31 da matg 2006, e quai pervi da la relaziun da confidenza ruinada che pregiuditgava a ses avis er il mintgadi da l'ospital. Dr. med. Corina Canova ha purtà plant tar la dretgira administrativa cunter la visada da la relaziun da lavur pronunziada da la societad d'ospitals da Cuira SA. Dr. med. Corina Canova considerescha la visada sco abusiva. Ils motivs che han intimà la societad d'ospitals da Cuira SA da pronunziar la visada da la relaziun da lavur èn object da questa procedura.
L'examinaziun tras la regenza da decisiuns concernent il persunal tratgas dals organs d'ospital che vegn prendida en mira cun la dumonda n'è betg previsa en la lescha per promover la tgira da persunas malsaunas. Tenor la lescha per promover la tgira da persunas malsaunas promova il chantun tras consultaziun, coordinaziun e concessiun da contribuziuns als ospitals in provediment medicinal, ina tgira sco er in'assistenza medicinala da persunas malsaunas, e quai confurm al basegn ed en moda adequata ed economica. Per quests secturs èn las instituziuns cun dretg da contribuziun suttamessas exclusivamain a la surveglianza da la regenza. Il dretg da surveglianza da la regenza cumpiglia en spezial il dretg da controllar la regularitad dal manaschi e da la contabilitad, uschenavant che quai è relevant per conceder contribuziuns chantunalas; el na cumpiglia dentant betg l'examinaziun da decisiuns concernent il persunal. Quai è chaussa da las instanzas giudizialas.
Per il provediment che correspunda als basegns da la populaziun èsi decisiv ch'il provediment medicinal ed en spezial angiologic en il territori cumpiglià da la societad d'ospitals da Cuira SA restia garantì er suenter la partenza da dr. med. Corina Canova. Il departament da giustia, polizia e sanitad ha envidà en quest senn il cussegl administrativ da la societad d'ospitals da Cuira SA gia la fin da l'onn passà da prender las mesiras necessarias per quest intent.
La regenza respunda las dumondas concretas sco suonda:
1. En vista a la tenuta decisa dal cussegl administrativ da la societad d'ospitals da Cuira SA na vesa la regenza nagina pussaivladad per engaschar vinavant dr. med. Corina Canova tar la societad d'ospitals da Cuira SA respectivamain tar l'ospital chantunal dal Grischun.
2. Tenor la pratica constanta ed observond las regulaziuns legalas da cumpetenza tranter il chantun ed ils purtaders d'ospitals n'intervegn la regenza betg en decisiuns concernent il persunal dals ospitals. Correspundentamain na sustegna ella er betg la nominaziun d'ina cumissiun per examinar ils motivs che han chaschunà la visada da la relaziun da lavur da dr. med. Corina Canova tras la societad d'ospitals da Cuira SA. La regenza deplorescha che suenter la visada n'è betg pli represchentada ina dunna en la direcziun da la societad d'ospitals da Cuira SA.
Datum: 2. Mai 2006