1 e 2. En il rom da la cumissiun internaziunala da las regenzas dal Rain alpin (CIRRA) han il principadi da Liechtenstein, il pajais federativ Vorarlberg sco er ils chantuns Son Gagl e Grischun concludì tras ina cunvegna transcunfinala da sclerir communablamain dumondas specificas impurtantas en connex cun il Rain alpin e da las coordinar en vista a lur planisaziun ed a lur realisaziun. En il center stattan las suandantas tematicas: construcziun da flums, ecologia da las auas, bilantscha da l'aua sutterrana, revitalisaziuns ed energia. En quest connex duai il Rain alpin vegnir utilisà cun mesira ed a medem temp duai sia valur ecologica vegnir augmentada. Sut las cundiziuns generalas ch'èn avant maun e sin basa da la situaziun topologica (lieu, nua ch'il Rain anteriur ed il Rain posteriur s'uneschan) è il perimeter vegnì fixà tranter La Punt e la sbuccada dal Rain en il Lai da Constanza ed è uschia vegnì limità sin il territori da la val.

3. Grazia als rempars ch'èn vegnids construids en la Tumleastga per lung dal Rain posteriur avant passa tschient onns han erosiuns dal letg pudì vegnir evitadas per la pli gronda part. Tras quai n'èsi strusch stà necessari e n'èsi er en l'avegnir strusch planisà da prender mesiras architectonicas dal puntg da vista da la protecziun cunter aua gronda per mantegnair ils rempars e per stabilisar il letg dal flum.
Da l'autra vart è l'aua dentant er in element natiral impurtant, e quai betg mo dal puntg da vista da la cuntrada e dal turissem, mabain er per l'ecologia da l'aua e da la pestga. Quai vala er per il territori dal flum tranter Tusaun e Giuvaulta. Ina revitalisaziun duess perquai vegnir examinada ed è giavischada sco contribuziun impurtanta per augmentar la valur, n'è dentant betg finanziabla tras la protecziun cunter aua gronda.

4 e 5. Da princip existan differentas pussaivladads per revitalisar il Rain posteriur ed en ina dimensiun limitada il chanal da la Nolla. I duessan vegnir prendidas en mira zonas umidas per lung dal Rain posteriur sco quai ch'ins las chatta en las ognas da Razén. Las cundiziuns generalas detagliadas per ina revitalisaziun resultan dentant da las restricziuns da la correcziun dals curs d'aua sco er da la disponibladad dal terren. La planisaziun da talas mesiras architectonicas è ina incumbensa fitg pretensiusa che premetta d'analisar en moda conscienziusa e cumpetenta las relaziuns da gera e las relaziuns idraulicas, per ch'i na resultian naginas surpraisas malempernaivlas areguard la periclitaziun tras aua gronda ed areguard ils custs futurs da mantegniment.
Il chanal da la Nolla era vegnì construì per cultivar terren agricul en la Tumleastga. Ensemen cun las vischnancas da Tusaun e da Cazas vegn actualmain sclerida la dumonda, co che quest chanal po vegnir alimentà cun aua per ademplir aspects agriculs, turistics ed ecologics. En in studi da project correspundent vegn fatg quint per quest intent cun custs da ca. 500'000 francs. La finanziaziun vegn da preschent anc sclerida.
En il rom d'in concept davart il svilup da la cuntrada da la Mantogna/Tumleastga è er gia vegnì ponderà, nua ch'ins pudess schlargiar il flum ed eventualmain co che tals schlargiaments pudessan vesair or. Eventualmain vegnan talas mesiras en dumonda sco elements pussaivels d'ina sanaziun da l'aua restanta tenor ils art. 80 ss. da la lescha federala davart la protecziun da las auas (LPA) per ils implants electrics en l'intschess dal Rain posteriur. Quai premetta dentant ina consideraziun cumplessiva positiva dals interess ecologics ed economics. Per far ils scleriments correspundents dovri dentant anc in tschert temp.

Datum: 11 da fanadur 2006