Navigation

Inhaltsbereich

Dumonda Beck concernent las pussaivladads da finanziar ina punt auta davent da la storta d'Araschgen fin al Brandacker a Maladers

Sessiun: 25.04.2006
Tenor l'incumbensa Casty, ch'è vegnida inoltrada la sessiun d'avust 2005, examinescha la regenza la realisaziun dal project d'ina punt auta davent da la storta d'Araschgen fin al Brandacker a Maladers sco alternativa tar la cumplettaziun da la via chantunala tranter Cuira Obertor e Maladers. Quest project era vegnì concludì dal cussegl grond l'onn 1974.

Malgrà la decisiun davart las variantas vegnan ad esser necessaris meds finanzials en la dimensiun da 40 milliuns francs per schliar il problem da traffic en la regiun da la citad da Cuira fin Maladers. Entant ch'ils problems centrals per la citad da Cuira concernan la tecnica da traffic (mesiraziuns en il champ da Calfreisen l'onn 1993: fin passa 5000 vehichels per di), è il problem dal Scanvetg e d'Arosa quel che lur cuntanschibladad è restrenschida. Sin basa da viadis da test da la polizia chantunala dal Grischun n'èsi per motivs da segirezza betg responsà da laschar charrar ils vehichels usitads ozendi (camiuns e bus fin 2.55 m ladezza) sin la via da Scanvetg. Il basegn d'investiziun per schliar il problem pertutga fin ca. 90 % sin il traject Cuira- Maladers e pudess vegnir schlià d'in mument a l'auter p.ex. cun ina punt auta.

Ozendi n'è Arosa betg cuntanschibel cun cars normals. L'entir segment dal car va a perder al lieu da vacanzas Arosa, quai che reducescha considerablamain la gastronomia, oravant tut en la stagiun da stad. L'experientscha mussa che las interpresas da car na transporteschan betg lur clientella tar la viafier, mabain ch'ellas elegian destinaziuns ch'ellas pon cuntanscher directamain. Quai ch'è la Porta Alpina per la Surselva è la punt auta per la regiun Scanvetg/Arosa.

Nus ans drizzain perquai a la regenza cun las suandantas dumondas:

- È la regenza er da l'avis ch'il problem da traffic menziunà na po betg vegnir schlià cun ils credits da construcziun regulars per las vias da colliaziun?

- Tge pussaivladads vesa la regenza per la finanziaziun extraordinaria da quest giavisch urgent?

- È la regenza pronta da prevair ils meds finanzials necessaris en il rom dal plan da finanzas successiv, dentant il pli tard en la proxima perioda dal plan da finanzas?

Cuira, ils 25 d'avrigl 2006

Name: Beck, Casty, Jenny, Bachmann, Bär, Barandun, Berther (Sedrun), Bleiker, Brüesch, Brunold, Bundi, Butzerin, Casanova (Cuira), Castelberg-Fleischhauer, Christ, Christoffel-Casty, Conrad, Donatsch, Dudli, Fallet, Göpfert, Gredig-Hug, Hardegger, Heinz, Hübscher Janom Steiner, Jeker, Kessler, Mani-Heldstab, Marti, Meyer-Grass (Claustra), Mengotti, Parolini, Plozza, Portner, Rizzi, Stiffler, Stoffel, Tremp, Wettstein, Zanetti, Cattaneo, Davaz, Mainetti

Session: 25.04.2006
Vorstoss: rg Anfrage


Resposta da la regenza

La dumonda sa fatschenta cun il tema d'avrir il Scanvetg en moda effizienta ed a lunga vista. Las sutsegnadras ed ils sutsegnaders menziuneschan l'impurtanza generala da la cuntanschibladad per il svilup economic d'ina vallada. Questa impurtanza na stat betg en discussiun. Ellas ed els vesan la punt auta davent da la storta d'Araschgen fin al Brandacker a Maladers sco ina varianta d'avertura ch'è orientada al futur e che ha il grond avantatg ch'i po vegnir desistì bunamain dal tuttafatg d'adattar la via chantunala sin il traject tranter l'Obertor e Maladers. Per il resultat dals scleriments tecnics ed economics d'ina tala varianta d'avertura vegn renvià al rapport en connex cun l'incumbensa dal deputà Casty (PCG 2005/2006, paginas 418 ss.).

Las sutsegnadras ed ils sutsegnaders s'infurmeschan gia oz ed en moda preventiva davart las pussaivladads da finanziar il project da la punt auta. Ellas ed els fan quai en in mument, nua ch'i n'èn avant maun anc naginas indicaziuns seriusas davart ils custs da realisaziun da quest project ipotetic.

Las singulas dumondas sa laschan respunder sco suonda:

1. Igl è vair ch'ina finanziaziun ord ils credits da construcziun regulars per las vias da colliaziun (actualmain 20 milliuns francs per tut il chantun) n'è betg pussaivla.

2. Actualmain elavura la confederaziun il plan secturial "traffic". Sco resultat da quai vegn a suandar il conclus dal parlament federal davart la rait da vias, cun il qual las vias vegnan attribuidas en moda lianta a la rait fundamentala resp. a la rait cumplementara. Quai na vegn dentant betg ad esser avant l'onn 2008. Il plan secturial programmatic prevesa d'augmentar la classificaziun da la via da Scanvetg e da la classifitgar en la rait cumplementara (che ha il dretg da subvenziuns), quai che augmenta en general tendenzialmain la libertad finanziala d'agir areguard la construcziun da vias principalas.

Ultra da quai è la regenza da l'avis ch'il project da la punt auta adempleschia las premissas per pudair far valair meds finanzials or dal fond d'infrastructura da la confederaziun per schliar il traffic d'aglomeraziun da Cuira e dals conturns.

Anc ina giada sto vegnir punctuà ch'il chantun na vegn betg ad esser en il cas da finanziar cun agens meds supplementarmain tar ils projects da construcziun da vias ch'èn gia vegnids concludids u empermess in project cun custs presumtivs da passa 40 milliuns francs.

3. Premess ch'i sa mussa ch'il project saja tecnicamain realisabel, cunvegnent e persistent, è la regenza pronta da porscher maun a la projectaziun da la punt auta cun las ovras da colliaziun necessarias fin al project d'exposiziun e da metter a disposiziun ils meds finanzials per la projectaziun respectiva en la proxima perioda dal plan da finanzas.

Datum: 11 da fanadur 2006