Navigation

Inhaltsbereich

Dumonda Trepp concernent la serrada da centers da di per umans cun in impediment psichic (en il chantun Grischun)

Sessiun: 17.10.2006
Per la fin da l'onn 2006 vegnan serrads ils centers da di a Roveredo ed a Samedan. Il motiv da quai è il ferm regress da la clientella. Quel po vegnir attribuì principalmain al suandant fatg:
Dapi il 1. da schaner 2006 ston persunas che retiran prestaziuns da la AI e che frequentan in center da di pajar 15. francs per di. Schebain che quest import cumpiglia er il gentar, frequentan adina pli paucas clientas e pli paucs clients ils centers da di. La frequentaziun d'in center da di è facultativa. La gronda part da las persunas che han ina malsogna psichica han fadia cun in di structurà e cun occupaziuns organisadas, ed i basegna stimuls spezials per las motivar da sa participar. L'incassament d'ina taxa ha ruinà tut ils stimuls da frequentar in center da di.

Per las explicaziuns che suondan qua sutvart prendain nus il center da di "El Butt" a Roveredo sco exempel e giain curt enavos en l'onn 2000. En connex cun ils scleriments preliminars concernent l'independenza da las chasas da dimora e dals lieus da lavur dal chantun han ins rendì attent tant sin las schanzas sco er sin ils privels d'in tal pass.

Privels:

- in'orientaziun pli gronda vi dal martgà e respargns da custs pli gronds pon avair consequenzas negativas per la qualitad da las prestaziuns en il sectur da la tgira e da l'assistenza. La qualitad vegn definida sur la rentabilitad;

- l'uman malsaun na stat betg pli en il center, el vegn schizunt degradà ad in factur da custs ch'è negativ per l'economia;

- la suletta etica daventa la maximaziun dal gudogn.

Ils 10 da zercladur 2001 han las votantas ed ils votants grischuns acceptà la lescha davart l'organisaziun dals servetschs psichiatrics chantunals e da las chasas chantunalas da dimora per persunas cun impediments psichics dal chantun Grischun e l'onn 2002 èn ils servetschs psichiatrics dal Grischun (SPGR) vegnids transfurmads en ina instituziun da dretg public che sto realisar in gudogn uschè grond sco pussaivel.
Oz, 4 onns pli tard, stuain nus constatar ch'ils privels discutads èn sa realisads. e quai segiramain oravant tut pervia dal squitsch enorm da spargnar dals ultims onns.

Ils dus clients da "El Butt" ch'èn anc restads vegnan integrads il 1. da schaner 2007 en l'occupaziun organisada da la "ARBES Moesano" (lieu da lavur protegì). En la ARBES vegni producì, i dat incumbensas grondas ed i dat savens lavur a chadaina. Quai è in'occupaziun adattada per umans cun in impediment spiertal u cun in grev impediment psichic, dentant betg adina per umans che pateschan d'ina malsogna psichica. La promoziun da la qualitad da vita, da la creativitad u il sustegn cun cleras finamiras da mesiras che pussibiliteschan pli tard eventualmain ina reintegraziun mancan quasi dal tuttafatg en la ARBES, perquai ch'il persunal responsabel consista per gronda part d'expertas e d'experts da la mastergnanza, sco p.ex. ina cusunza, in scrinari u in cuschinier.

Tschertas purschidas dals centers da di (tenor l'uffizi federal d'assicuranzas socialas) sco proponer ed accumpagnar activitads individualas e cuminaivlas, sustegnair cun cleras finamiras ina moda da viver uschè autonoma sco pussaivel, activitads terapeuticas e prestaziuns da tgira che na vegnan betg ordinadas da la media u dal medi na vegnan betg menziunadas tranter las purschidas dals lieus da lavur e d'occupaziun. L'incumbensa socialpedagogica, ina purschida centrala en ils centers da di, croda davent.

Las sutsegnadras ed ils sutsegnaders supplitgeschan perquai la regenza da respunder las suandantas dumondas:

- Tge purschidas datti en il futur oravant tut er en las regiuns periferas da noss chantun per umans cun impediments che smanatschan da crudar puspè tras la rait psico-sociala, che na pon pia vegnir integrads ni en ina gruppa d'abitar ni en in lieu da lavur?

- Ils ultims 7 onns han ils centers da di contribuì bler a distgargiar las cassas da persunas malsaunas ed ils servetschs socials (bler main ospitalisaziuns). Po la regenza responsar ch'ils custs vegnan puspè adossads per gronda part a las cassas da persunas malsaunas ed als servetschs socials?

- Tge mesiras è la regenza pronta da prender per emplenir las largias ch'èn resultadas tar la purschida d'assistenza per che l'uman malsaun vegnia puspè mess en il center e per che las prestaziuns servian puspè en emprima lingia a las pazientas ed als pazients e pir en segunda lingia a ponderaziuns economicas?

Cuira, ils 17 d'october 2006

Name: Trepp, Bucher-Brini, Pfiffner-Bearth, Arquint, Baselgia-Brunner, Frigg-Walt, Gartmann-Albin, Jaag, Koch, Menge, Mengotti, Noi-Togni, Peyer, Pfenninger, Portner, Thöny, Troncana-Sauer, Locher Benguerel

Session: 17.10.2006
Vorstoss: rg Anfrage


Resposta da la regenza

Il center da di per persunas cun in impediment psichic "El Butt" a Roveredo è vegnì avert il 1. d'avust 1998 sco filiala dal lieu da lavur e d'occupaziun per umans cun in impediment a Giuvaulta. El ha sis plazzas. Sin basa da la purschida dubla han ils servetschs psichiatrics dal Grischun decidì d'integrar il center da di "El Butt" per il 1. da schaner 2007 en il lieu da lavur e d'occupaziun a Roveredo ch'è vegnì avert il 1. da december 2004.

La societad "plazzas da dimora e da lavur protegidas Engiadina e valladas dal sid" ha avert l'onn 1989 a Samedan in lavuratori protegì per umans cun in impediment spiertal e psichic. Sco cumplettaziun da questas duas purschidas è vegnì avert il 1. da settember 2005 in center da di cun quatter plazzas, e quai cun la finamira d'augmentar il dumber da plazzas sin otg. Pervia da la dumonda che na correspundeva betg a las aspectativas ha la societad decidì da serrar il center da di per ils 31 da december 2006.

Las purschidas dal center da di "El Butt" a Roveredo e dal center da di a Samedan vegnan surpigliadas praticamain dal tuttafatg da las chasas da dimora, dals lieus d'occupaziun a dals lavuratoris ch'existan en quellas valladas. L'acquisiziun da purschidas d'occupaziun e lur attribuziun a persunas cun in impediment psichic vegn a s'orientar vinavant er en ils lieus novs vi da la finamira da porscher a questas persunas la pussaivladad da manar lur vita en moda uschè autonoma sco pussaivel.

La taxa da di da 15. francs per l'alimentaziun e per ils ulteriurs custs che sto tenor las prescripziuns da la regenza vegnir incassada da las persunas che retiran prestaziuns da la AI e che vivan en structuras dal di n'è cuntrari a las explicaziuns en la dumonda betg il motiv che l'utilisaziun da la purschida è sa reducida. En ils dus centers da di vegnivan gia avant mess a quint ils custs per l'alimentaziun. Il motiv per incassar la taxa da 15. francs da las persunas che vegnan tgiradas en ils centers da di è quel da tractar questas persunas en moda eguala sco las persunas che vegnan tgiradas en las chasas da dimora.
Il motiv da la decisiun da serrar ils centers da di che las instituziuns ch'èn responsablas per quests dus centers da di han prendì en moda autonoma è sulettamain quel che l'utilisaziun da la purschida è sa reducida.

Resposta a las dumondas

1. En tut il chantun, pia er en las regiuns periferas (Roveredo, Scuol, Puschlav, Samedan, Trun e Rueras), datti purschidas d'abitar protegidas e structuras dal di per assister umans cun in impediment. Las structuras dal di han l'intent da motivar umans cun in impediment dad esser activs en moda individuala u ensemen cun auters umans e d'als sustegnair tar questas activitads. Cun la planisaziun dal basegn che vegn fatga mintg'onn e quai integrond las instituziuns ch'èn responsablas po vegnir reagì en moda flexibla sin ils basegns e sin la dumonda da plazzas da dimora, d'occupaziun e da lavur protegidas.

2. Tar la purschida d'assistenza n'haja dà naginas largias pervia da la serrada dals centers da di da Roveredo e da Samedan. Malgrà che quests centers da di èn vegnids serrads stattan anc a disposiziun avunda plazzas da tgira sco er purschidas per umans cun in impediment. Ils custs na vegnan pia betg spustads sin la cassa da persunas malsaunas e sin ils uffizis dal servetsch social.

3. Or dal puntg da vista da la regenza, sa basond sin las constataziuns menziunadas qua survart, na s'imponan actualmain naginas mesiras en il senn da la dumonda. Sche adattaziuns da la purschida da tgira avessan da daventar necessarias, pon quellas vegnir fatgas da tut temp en il rom da la planisaziun successiva dal basegn en il sectur dals umans cun in impediment. En il center stat en quest connex sch'i sa tracta da stgaffir purschidas il basegn e betg la rentabilitad da la purschida. La regenza s'engascha en quest senn ch'i stettian vinavant a disposiziun sche pussaivel en tut las regiuns dal chantun purschidas da tgira adequatas per umans cun in impediment spiertal, psichic u corporal, sche la dumonda resp. sche l'interess è avant maun. En quest connex sto vegnir menziunà sco cumplettaziun ch'ils servetschs psichiatrics dal Grischun han avert a San Murezzan ils 15 da november 2006 ina clinica dal di per persunas che vivan a chasa e che han ina crisa psichica.

Datum: 21 da december 2006