Navigation

Inhaltsbereich

Incumbensa Geisseler concernent in augment da las prestaziuns da la cassa per donns elementars betg assicurabels da bains immobigliars

Sessiun: 17.10.2006
La cassa per donns elementars betg assicurabels da bains immobigliars (CDE) paja contribuziuns finanzialas als custs da rumida e da reparaziun da bains immobigliars privats ch'èn vegnids donnegiads ed a l'avertura da quels. Ella è in institut independent da dretg public e vegn manada da l'assicuranza d'edifizis dal Grischun. La limita superiura da prestaziun importa 50% dal donn renconuschì; il fond svizzer per donns elementars a Berna furnescha prestaziuns supplementaras dependentas da las entradas e da la facultad fin ad in grad da la cuvrida dals custs da maximalmain 90% dals custs imputabels. Il sectur da prestaziun sa restrenscha a proprietarias ed a proprietaris privats da bains immobigliars che finanzieschan er la CDE. Lur basa legala cun il sectur da prestaziun limità e cun l'organisaziun decentrala (registraziun dals donns tras ils uffizis cirquitals) è da princip sa cumprovada. La CDE posseda oz agens meds en la dimensiun da circa 33 milliuns francs (plus 6.4 milliuns francs dal fond per agid d'urgenza).

Durant ils ultims onns ch'èn stads caracterisads da l'augment dals donns elementars vi da bains agriculs e vi d'abitadis èsi sa mussà che la restricziun legala da las contribuziuns da 50% dals custs imputabels ha chaschunà prestaziuns nunsuffizientas. Per l'ina survegn pervia da la dependenza da la facultad e da las entradas mo pli mintga segund prestaziuns supplementaras dal fond svizzer per donns elementars. Per l'autra sa chapescha il fond per donns elementars adina dapli sco instituziun da beneficenza che conceda sias prestaziuns supplementaras en moda fitg retegnida. Uschia daventa la posiziun da las retschavidras e dals retschaviders da contribuziuns pli e pli precara. La CDE n'ha naginas pussaivladads da meglierar la prontezza a la prestaziun dal fond svizzer per donns elementars. Perquai duess vegnir augmentada moderadamain per meglierar las prestaziuns en favur da las persunas donnegiadas en il chantun Grischun la limita legala da las contribuziuns d'actualmain 50%.

En vista a la buna situaziun finanziala da la CDE e da sia organisaziun solidara stuess vegnir examinada en la lescha ina limita superiura da prestaziun da per exempel 80%. La tariffa effectiva da contribuziun stuess vegnir determinada en in'ordinaziun da la regenza sco er tenor basegn e tenor pussaivladads. Ils auters quatter chantuns (BL, AR, NW e GL) che possedan ina instituziun sumeglianta han chattà ina soluziun da contribuziun da medema spezia che surpiglia en media maximalmain 80% dal donn renconuschì. Sin fundament da questa situaziun da partenza dain nus la suandanta incumbensa a la regenza:

Sin fundament da las decleraziuns qua survart vulessan las sutsegnadas ed ils sutsegnads envidar la regenza da cumenzar ad amplifitgar la cassa per donns elementars dal Grischun e da suttametter la lescha correspundenta (LIDE; DG 835.100) ad ina revisiun parziala.

Cuira, ils 17 d'october 2006

Name: Geisseler, Möhr, Hartmann (Champfèr), Bachmann, Barandun, Bondolfi, Brandenburger, Campell, Casparis-Nigg, Caviezel (Pitasch), Cavigelli, Christoffel-Casty, Clavadetscher, Dudli, Farrér, Felix, Feltscher, Florin-Caluori, Hardegger, Hartmann (Cuira), Keller, Kleis-Kümin, Loepfe, Niederer, Nigg, Parolini, Parpan, Peer, Plozza, Portner, Ratti, Righetti, Rizzi, Stiffler, Tenchio, Thomann, Vetsch (Claustra) Wettstein, Capeder

Session: 17.10.2006
Vorstoss: rg Auftrag


Resposta da la regenza

La regenza è er da l'avis ch'in augment moderà da la cassa per donns elementars betg assicurabels da bains immobigliars (CDE) saja giustifitgà. Ils ultims onns èsi effectivamain sa mussà che la restricziun legala vertenta da las contribuziuns sin maximalmain 50% dals custs imputabels chaschuna savens prestaziuns nunsuffizientas per las persunas donnegiadas. Il motiv è il regress da las prestaziuns supplementaras dal fond svizzer per donns elementars betg assicurabels (fond per donns elementars). Questas prestaziuns èn sco ch'igl è vegnì remartgà correctamain en l'incumbensa dependentas da la facultad e da las entradas. Tar persunas donnegiadas cun entradas suttamessas a la taglia da passa 80'000 francs u cun ina facultad da passa 800'000 francs chaschuna quai reducziuns. Sche las entradas suttamessas a la taglia surpassan 120'000 francs e sche la facultad surpassa 1.2 milliuns francs, vegnan las prestaziuns supplementaras dal fond svizzer per donns elementars reducidas dal tuttafatg. Ultra da quai sa chapescha il fond per donns elementars oz adina dapli sco instituziun da beneficenza che empermetta sias prestaziuns supplementaras en moda fitg retegnida, q.v.d. sulettamain en il senn da prestaziuns per garantir l'existenza. La posiziun da las retschavidras e dals retschaviders da contribuziuns è daventada mendra là, nua ch'i na pon betg vegnir realisads projects communabels che vegnan subvenziunads da la confederaziun e dal chantun. En vista als donns elementars che s'augmentan sin il champ da l'agricultura ed en ils abitadis daventan pia necessarias mesiras da correctura.

La basa legala vetenta da la CDE cun il sectur da prestaziun limità a proprietarias ed a proprietaris privats da bains immobigliars e cun l'organisaziun decentrala che cumpiglia ina registraziun dals donns tras ils uffizis cirquitals è da princip sa cumprovada. L'augment da las prestaziuns che duai vegnir cuntanschì a l'avis da la regenza sto perquai s'orientar a questa basa incontestada. Il medem mument duess la revisiun parziala correspundenta da la lescha davart l'indemnisaziun da donns elementars betg assicurabels (LIDE; DG 835.100) e da l'ordinaziun executiva latiers (OECGtLIDE; DG 835.110) dentant er cuntegnair singulas correcturas areguard la procedura. La finala duess a medem temp il fond per agid d'urgenza che serva ad impedir situaziuns d'urgenza senza culpa che resultan d'eveniments da la natira (art. 24 ss. LIDE) vegnir dà liber confurm al basegn per contribuziuns ad ulteriurs eveniments da la natira betg assicurabels. Il fond per agid d'urgenza dispona oz da meds finanzials en la summa da 6.4 milliuns francs. Pervia da ses sectur da prestaziun stretg pon ins actualmain far diever mo da rar dad el.

La fin da l'onn 2005 possedeva la CDE agens meds finanzials en la summa da ca. 33 milliuns francs. La finanziaziun da la cassa ch'è fixada legalmain e che succeda tras contribuziuns dad 1 rap per 1'000 francs summa d'assicuranza tenor IAE, resp. da 0.5%0 da la valur da facultad da bains immobigliars betg surbajegiads, vegn exaurida oz mo a mesadad. La finamira da la regenza è da fixar ina nova limita da prestaziuns superiura da la CDE cun mantegnair las contribuziuns ed ils princips da finanziaziun vertents. Sin fundament dal pajament solidar da la CDE e per obtegnair ulteriuras prestaziuns dal fond svizzer per donns elementars duessan las prestaziuns da la CDE dentant importar maximalmain 80% dals donns imputabels. La tariffa effectiva da contribuziun stuess alura vegnir fixada entaifer quest rom tras la regenza, e quai en in'ordinaziun, tut tenor ils basegns e las pussaivladads finanzialas.

En quest senn è la regenza pronta d'acceptar l'incumbensa e da preparar las adattaziuns necessarias da la lescha per augmentar las prestaziuns da la cassa per donns elementars betg assicurabels da bains immobigliars.

Datum: 9 da november 2006