Navigation

Inhaltsbereich

Incumbensa Cavigelli concernent la promoziun da las prestaziuns d'assistenza e da tgira che vegnan purschidas da confamigliaras e da confamigliars a favur da persunas che basegnan tgira

Sessiun: 18.10.2006
Persunas attempadas che basegnan fitg blera tgira sco er persunas cun impediments che basegnan fitg blera tgira pon survegnir sustegn en differentas modas e manieras tras prestaziuns da la sanadad publica e dal stadi social, e quai en il sectur ambulant (p.ex. spitex) sco er en instituziuns staziunaras (p.ex. chasas da dimora). Per regla na vegnan questas prestaziuns betg furnidas gratuitamain; la persuna che retira las prestaziuns sto surpigliar almain ina part dals custs restants, e quai è da princip en urden uschia. Dentant: En ina furma u l'autra va la gronda part dals custs la finala adina directamain u indirectamain a quint da la generalitad (p.ex. sur premias pli charas da la cassa da malsauns, sche l'assicuranza da malsauns paja; sur taglias pli autas, sch'il maun public paja u subvenziunescha directamain prestaziuns da sustegn; u sur contribuziuns da sanaziun a las ulteriuras assicuranzas socialas, sche quellas pajan).

Ditg cun auters pleds exista in interess public considerabel che betg mintga persuna, che ha da princip in dretg da retrair prestaziuns da la sanadad publica e dal stadi social, na retiria er effectivamain questas prestaziuns. Almain exista dentant in interess che quellas persunas, che desistan da retrair prestaziuns da la sanadad publica e dal stadi social malgrà ch'ellas han il dretg sin quellas, na vegnian facticamain betg tuttina sfurzadas da las retrair pervia d'in "sistem fauss". Il cuntrari: Ina tala tenuta che po vegnir attribuida a motivs fitg differents duess schizunt vegnir remunerada activamain tras impuls, uschenavant che quai è giustifitgabel sin basa d'ina valitaziun da la politica da sanadad, da la politica sociala e da la politica da finanzas.

Ozendi èsi anc adina fitg derasà che confamigliaras e che confamigliars ubain che terzas persunas che stattan en ina stretga relaziun cun las persunas tgiradas han quità u tgiran perfin persunas che basegnan tgira, cunzunt persunas attempadas sco er persunas cun in impediment spiertal, corporal u psichic. Saja quai tras quai che la persuna che basegna tgira survegn dimora a chasa tar la persuna tgiranta, saja quai tras quai che l'assistenza e/u che la tgira vegn prestada en l'abitaziun da la persuna che basegna tgira. Quai ha en emprima lingia l'avantatg che la persuna che basegna tgira po sa metter en la dependenza da persunas ch'ella enconuscha. En moda betg main impurtanta chaschuna quai dentant plinavant ch'i vegnan spargnads custs a favur da la persuna pertutgada che basegna tgira sco er a favur da sias confamigliaras e da ses confamigliars che la stuessan uschiglio eventualmain sustegnair finanzialmain. Almain la part dals custs restants, che stuess vegnir surpigliada da la persuna che retschaiva las prestaziuns, croda davent tar questa persuna.

Dal puntg da vista da la generalitad ha quai l'effect secundar favuraivel ch'er ella spargna custs. Il diever da prestaziuns da la spitex u da prestaziuns sumegliantas vegn restrenschì; u tut tenor vegn in'entrada en ina chasa da dimora u en ina instituziun staziunara sumeglianta schizunt suspendida per adina u almain per in tschert temp. Las pussaivladads ch'existan tenor la lescha vertenta per promover la tgira da persunas malsaunas (p.ex. la cunvegna da prestaziuns da basa) vegnan plinavant cumplettadas en moda zunt impurtanta per indemnisar la lavur da las confamigliaras e dals confamigliars. Pertge che quellas pussaivladads èn modestas tant areguard il temp sco er areguard il cuntegn (4 uras per emna tenor il catalog da prestaziuns da la spitex) e n'expriman betg la valur e la dimensiun effectiva da la prestaziun. Sche las persunas benefiziadas che basegnan tgira na pajan betg (na pon betg pajar) u pajan (pon pajar) mo parzialmain las prestaziuns che vegnan furnidas a lur favur, furneschan las persunas da tgira e d'assistenza pia prestaziuns che distgargian considerablamain la societad e per las qualas ellas na survegnan ni renconuschientschas finanzialas adequatas ni autras renconuschientschas adequatas d'ina valur da daners. Quai correspunda ad in "sistem fauss". Quai è objectivamain malgist, disfavurisescha tendenzialmain en moda unilaterala las dunnas che adempleschan talas incumbensas sco mammas, sco figlias u sco brits e ch'èn perquai restrenschidas en lur autras activitads (professiunalas), e metta la finala impuls che tiran en la faussa direcziun, numnadamain sin la fugia en il diever da prestaziuns (charas) che vegnan pajadas u subvenziunadas dal stadi.

Considerond il princip "ambulant avant staziunar" sto pia vegnir prendì en mira da repassar la legislaziun en quella direcziun che la persuna benefiziada che basegna tgira vegn messa en la situaziun d'indemnisar talas prestaziuns a favur da sias confamigliaras e da ses confamigliars u a favur da terzas persunas che stattan en ina stretga relaziun cun ella (eventualmain en ina moda ch'è cumparegliabla cun l'indemnisaziun d'assistenza tenor la LAI). Plinavant sto vegnir examinà, sch'i pon vegnir concedids en moda alternativa u cumplementara auters avantatgs d'ina valur da daners a las confamigliaras ed als confamigliars resp. a las terzas persunas pertutgadas, p.ex. cun surpigliar ils custs per ina introducziun professiunala adequata en la lavur che sto vegnir fatga (curs d'in di tar instituziuns adattadas). Quai promova plinavant ch'i sto ultra da quai vegnir tegnì quint da l'aspect da qualitad, quai ch'è indispensabel.

Sut quest aspect e sin basa dal fatg ch'il cussegl grond ha tralaschà en sia sessiun d'october 2006 a chaschun da la tractativa da la revisiun parziala da la lescha chantunala da taglia d'approvar ina deducziun correspundenta per la tgira sco deducziun sociala fiscalmain relevanta, supplitgeschan las sutsegnadras ed ils sutsegnaders la regenza per il suandant:

En ils relaschs chantunals ch'èn adattads per quai stoppia vegnir stgaffida la basa legala

a) per che las persunas che basegnan tgira cunzunt las persunas attempadas che basegnan fitg blera tgira e las persunas cun impediments spiertals, corporals u psichics che basegnan fitg blera tgira che vegnan assistidas e/u tgiradas da lur confamigliaras e da lur confamigliars u da terzas persunas che stattan en ina stretga relaziun cun ellas, possian pudair laschar indemnisar quellas e quels en furma adequata per lur prestaziuns d'assistenza e da tgira (indemnisaziun finanziala; distgargias finanzialas; autras cuntraprestaziuns d'ina valur da daners); e

b) per che questa furma da l'assistenza e da la tgira a favur da persunas che basegnan tgira vegnia renconuschida en ina furma adequata, e quai ultra da l'autoprovediment, ultra da las prestaziuns da la spitex ed ultra da las prestaziuns da las instituziuns staziunaras.

Cuira, ils 18 d'october 2006

Name: Cavigelli, Nick, Koch, Bachmann, Berther (Mustér), Berther (Sedrun), Bleiker, Blumenthal, Bondolfi, Brüesch, Bundi, Cahannes, Casparis-Nigg, Castelberg-Fleischhauer, Casty, Caviezel (Pitasch), Clavadetscher, Darms-Landolt, Dermont, Fallet, Feltscher, Florin-Caluori, Geisseler, Hardegger, Hartmann (Cuira), Kessler, Kleis-Kümin, Kollegger, Kunz, Loepfe, Mani-Heldstab, Märchy-Michel (Malans), Meyer-Grass (Claustra), Michel, Niederer, Parolini, Parpan, Peer, Perl, Pfäffli, Pfister, Plozza, Portner, Sax, Tenchio, Tscholl, Märchy-Caduff (Domat)

Session: 18.10.2006
Vorstoss: rg Auftrag


Resposta da la regenza

Stimaziuns partan dal fatg che la quota da las persunas che basegnan tgira, che abitan a chasa e che han passa 65 onns importa ca. 60 pertschient. Ils ulteriurs 40 pertschient abitan en chasas da dimora. Las persunas che basegnan tgira e che abitan a chasa vegnan tgiradas ed assistidas per gronda part da confamigliaras e da confamigliars sco er da la spitex. Da las datas da l'enquista svizra davart la sanadad resulta che prestaziuns da la spitex vegnan savens purschidas en cumbinaziun cun l'agid da las confamigliaras e dals confamigliars. Quest agid da las confamigliaras e dals confamigliars e la tgira professiunala sa cumpletteschan pia.

La regenza è da l'avis ch'i saja da princip chaussa da las persunas che basegnan tgira d'indemnisar la persuna che tgira respectivamain che assista. Sch'ina persuna che basegna tgira na po pervia d'ina situaziun finanziala d'urgenza betg indemnisar las prestaziuns da tgira che vegnan purschidas a sia favur, duai questa persuna dentant survegnir il sustegn dal stadi.

A medem temp èsi er en l'interess public ch'ina persuna che basegna tgira restia a chasa uschè ditg sco pussaivel, e quai tenor il motto "ambulant avant staziunar". En quest senn han la confederaziun ed il chantun sviluppà instruments che indemniseschan la tgira e l'assistenza che vegn purschida a chasa a persunas che basegnan tgira tras lur confamigliaras e tras lur confamigliars ubain che concedan in sustegn finanzial a persunas che basegnan tgira, per che quellas possian indemnisar l'agid da las confamigliaras e dals confamigliars.

Sin plaun federal prevesan l'assicuranza per vegls e survivents (AVS) e l'assicuranza d'invaliditad (AI) bunificaziuns da tgira per persunas che assistan, en la medema chasada, parentas e parents che basegnan tgira. Las bunificaziuns da tgira n'èn betg prestaziuns finanzialas directas. Ellas vegnan messas a quint tar la calculaziun da las rentas da las confamigliaras e dals confamigliars che tgiran. Quai èn pia supplements tar l'entrada da gudogn che furma las rentas; a las confamigliaras ed als confamigliars che tgiran pussibiliteschan els da cuntanscher ina renta pli gronda, ina giada ch'ellas e ch'els èn sezs en la vegliadetgna da renta.

Ad umans che han in impediment e che abitan a chasa vegn en cas d'ina gronda inabilitad da gidar sasez pajada la dubla indemnisaziun a persunas dependentas d'agid. Uschia han els la pussaivladad da tscherner libramain tranter la dimora a chasa e la dimora en ina chasa da dimora. Tras la dubla indemnisaziun a persunas dependentas d'agid als vegn dada la pussaivladad da finanziar l'agid ch'els basegnan per far las chaussas da la vita da mintgadi.

En il rom da las prestaziuns supplementaras (PS) tar la AVS e tar la AI vegnan indemnisads a las persunas che han in dretg sin PS ils custs che resultan per l'agid, per la tgira e per l'assistenza a chasa, e quai fin ad in import maximal ch'è vegnì fixà da la confederaziun. Sco custs correspundents vegn renconuschida er l'indemnisaziun per la tgira e per l'assistenza tras confamigliaras e tras confamigliars. La premissa è che las confamigliaras e ch'ils confamigliars hajan da supportar tras la tgira e tras l'assistenza ina perdita da gudogn considerabla che dura pli ditg.

Tenor il reglament per distgargiar ed engaschar confamigliaras e confamigliars che tgiran (DG 506.110; relaschà da la regenza) exista en il chantun Grischun sin plaun chantunal la pussaivladad d'engaschar confamigliaras e confamigliars che tgiran, e quai sut tschertas cundiziuns tras l'organisaziun da la spitex, e d'indemnisar quellas persunas en il rom dal preventiv da temp ch'è fixà en l'incarica generala chantunala da prestaziuns.

Sin basa da la nova concepziun da la gulivaziun da finanzas e da las incumbensas (NGF) è il chantun cumpetent a partir dal 1. da schaner 2008 per pajar las PS e pia er per reglar l'indemnisaziun dals custs per l'agid, per la tgira e per l'assistenza a chasa inclusiv l'indemnisaziun a confamigliaras ed a confamigliars che tgiran.

Considerond l'aspect che umans che basegnan tgira duajan survegnir sustegn en relaziuns finanzialas difficultusas e sa basond sin l'interess public che persunas che basegnan tgira restian a chasa, sa declera la regenza pronta:

- d'examinar il preventiv da temp ch'è fixà en l'incarica generala chantunala da prestaziuns, per che las organisaziuns da la spitex possian engaschar confamigliaras e confamigliars che tgiran;

- da suttametter al cussegl grond sa referind a la lescha per realisar la nova concepziun da la gulivaziun da finanzas e da las incumbensas tranter la confederaziun ed ils chantuns (relasch general) ed en il rom d'ina revisiun parziala da la lescha chantunala davart las prestaziuns supplementaras ina regulaziun che va pli lunsch ch'il relasch general e che indemnisescha ils custs pervia da malsogna e pervia d'impediments per persunas che abitan a chasa.

- La regenza propona d'acceptar parzialmain questa incumbensa en il senn da las consideraziuns.

Datum: 21 da december 2006