Navigation

Inhaltsbereich

Dumonda Fasani concernent la nova gestiun da las vias naziunalas

Sessiun: 04.12.2006
Pir dacurt è arrivada la communicaziun da Berna davart l'assegnaziun da las tschintg filialas da las vias naziunalas. Ina da questas filialas vegn ad avair sia sedia a partir da l'onn 2008 en la Svizra taliana, pli precisamain en la regiun da Bellinzona, e vegn ad occupar fin a 45 collavuraturas e collavuraturs.

Cun l'entrada en vigur da la nova concepziun da la gulivaziun da finanzas e da las incumbensas tranter la confederaziun ed ils chantuns vegnan delegadas tschertas cumpetenzas a l'uffizi federal da vias (UVIAS). Sco gia menziunà vegn il UVIAS ad avrir quatter autras filialas ultra da quella a Bellinzona, e quai ad Estavayer-le-Lac (Friburg), a Thun (Berna), a Zofingen (Argovia) ed a Winterthur (Turitg). Mintgina da questas filialas vegn a disponer da zonas da cumpetenza. En il cas da Bellinzona vegn quella a s'extender dal Tessin fin en il Grischun ed a cumpigliar la A13 da Chiasso fin a Maiavilla.

En las filialas vegnan a vegnir occupadas fin a 45 persunas, tranter quellas er persunal fitg qualifitgà (tecnicistas e tecnicists, inschigneras ed inschigners) che lavura per part gia oz per ils chantuns Tessin e Grischun. En ina communicaziun pon ins ultra da quai leger ch'i sa porschan dapli pussaivladads da lavurar a las interpresas tessinaisas, senza che las interpresas grischunas vegnissan dischavantagiadas tras quai.

Tegnend quint ch'il chantun Grischun aveva candidà cun Roveredo sco lieu per la filiala da la Svizra taliana e considerond la preoccupaziun da la populaziun dal Moesano supplitgain nus la regenza da s'engaschar uschè fitg sco pussaivel e la tschentain las suandantas dumondas:

1. Tge restructuraziuns concretas da las structuras actualas per il mantegniment da las vias naziunalas vegnan fatgas sin basa da las novas directivas dal UVIAS che valan a partir dal 1. da schaner 2008 e ston ins far quint cun relaschadas?

2. Tge garanzias existan per il chantun Grischun da pudair nominar persunal per las 45 plazzas da lavur ch'èn previsas a la sedia da la Svizra taliana?

3. Tgi vegn ad esser cumpetent per la realisaziun dal sviament da Roveredo en vista a las ultimas decisiuns, e quai tant areguard la construcziun sco er areguard il mantegniment futur?

Cuira, ils 4 da december 2006

Name: Fasani, Pedrini, Righetti, Berther (Sedrun), Blumenthal, Caduff, Casutt, Cavigelli, Darms-Landolt, Dermont, Giovanoli, Kleis-Kümin, Mengotti, Noi-Togni, Plozza, Portner, Quinter, Sax, Tenchio, Thurner-Steier, Toschini, Tuor, Zanetti, Cattaneo, Rischatsch

Session: 04.12.2006
Vorstoss: rg Anfrage


Resposta da la regenza

Cun l'entrada en vigur da la "nova concepziun da la gulivaziun da finanzas e da las incumbensas tranter la confederaziun ed ils chantuns" (NGF) il 1. da schaner 2008 daventan las vias naziunalas cun lur implants da princip e gratuitamain proprietad da la confederaziun. Uschia vegnan ellas suttamessas a la responsabladad unica da la confederaziun, e quai tant areguard la finanziaziun sco er areguard l'adempliment da las incumbensas. Las consequenzas che resultan tras quai per il chantun sa laschan resumar sco suonda:

1. Ina da las unitads territorialas che la confederaziun ha fixà per la gestiun da las vias naziunalas è per gronda part identica cun noss territori chantunal. La midada essenziala en cumparegliaziun cun oz è quella che l'uffizi da construcziun bassa ademplescha sias prestaziuns a favur da las vias naziunalas sin basa d'ina incarica da prestaziun concreta, e quai tant en il mantegniment dal manaschi sco er en il mantegniment architectonic che na fa betg part d'in project. Cunquai che la dimensiun da questas lavurs na vegn da princip betg midada, na sto betg vegnir fatg quint cun ina reducziun dal persunal da manaschi. Il persunal da manaschi ademplescha dal rest sia lavur da quels lieus da manaschi (basas principalas) anor che servan gia oz a medem temp er sco basas logisticas per la gestiun da las vias chantunalas.

2. Per las plazzas en la nova filiala da l'uffizi federal da vias (UVIAS) a Bellinzona pon s'annunziar tut las collavuraturas e tut ils collavuraturs da tut ils chantuns. Sin basa dals profils d'exigenzas dal persunal che vegn tschertgà ed en vista a l'agen basegn d'inschigneras e d'inschigners cumpetents sa mussi ch'i dastgassan lavurar en l'avegnir plitost paucas collavuraturas e paucs collavuraturs dal chantun Grischun a Bellinzona. Il UVIAS ha dentant in fitg grond interess da pudair engaschar collavuraturas e collavuraturs dal Grischun.

3. La direcziun da las lavurs da construcziun per realisar il sviament da Roveredo vegn surpigliada a partir dal 1. da schaner 2008 da la filiala dal UVIAS a Bellinzona. Cunter la voluntad dal chantun Grischun è er vegnì fixà ch'il mantegniment dal manaschi davent da l'access da Roveredo fin al cunfin cun il chantun Tessin duai succeder tras l'unitad territoriala dal chantun Tessin, suenter ch'il sviament da Roveredo è vegnì mess en funcziun. Quai dastgass dentant esser il cas il pli baud en circa diesch onns.

Datum: 5 da mars 2007