Incumbensa da fracziun da la PS Meyer Persili concernent la realisaziun da la lescha federala davart ils supplements da famiglia sin plaun chantunal
Sessiun: 04.12.2006
Il fatg che la lescha federala davart ils supplements da famiglia è vegnida acceptada en moda uschè clera ha mussà che la populaziun svizra vul sustegnair pli fitg las famiglias e ch'ella vul ch'il sistem da supplements daventia pli simpel. Quest giavisch sto vegnir ademplì cun far bainbaud ina revisiun da la basa legala chantunala.
Tar questa adattaziun sto la libertad d'agir che la lescha federala conceda vegnir duvrada per introducir supplements per uffants e per scolaziun er per persunas cun activitad da gudogn independenta.
A partir da l'emprim di dal quart mais suenter che la lescha è vegnida acceptada en la votaziun dal pievel (1. da mars 2007) entran en vigur ils artitgels 17 e 26 da la lescha federala, pia quellas disposiziuns che reglan las cumpetenzas dals chantuns e las prescripziuns per ils chantuns. En quest connex sa tracti en emprima lingia da la surveglianza e da l'organisaziun da las cassas da cumpensaziun per famiglias che vegnan manadas da la mastergnanza e dal chantun. Er qua sto vegnir ademplì il giavisch da la populaziun che quels puncts vegnian simplifitgads. Ultra da quai sto la surveglianza da las cassas vegnir rinforzada. Ils chantuns sco autoritads da surveglianza ston garantir che las cassas privatas cunfineschan en moda netta las differentas activitads per che mintga finanziaziun traversala possia vegnir exclusa. Er las reservas ston vegnir reducidas ad ina dimensiun raschunaivla cun la finamira che las contribuziuns da las patrunas e dals patruns na ston betg vegnir augmentadas.
I sto vegnir renunzià al fatg che las lavurantas e ch'ils lavurants sa participeschan a la finanziaziun dals supplements. Uschiglio stuessan las structuras da las cassas vegnir midadas uschia ch'ils cussegls da surveglianza èn cumponids en moda paritetica (patrunas e patruns, lavurantas e lavurants, chantun).
La regenza vegn envidada da prender svelt per mauns la revisiun ch'è necessaria per adattar la basa legala chantunala en connex cun la nova lescha federala davart ils supplements da famiglia, per che quella possia entrar en vigur il 1. da schaner 2008. En quest connex duain er vegnir introducids supplements per uffants e per scolaziun per persunas cun activitad da gudogn independenta.
Cuira, ils 4 da december 2006
Name: Meyer Persili (Cuira), Bucher-Brini, Menge, Arquint, Baselgia-Brunner, Frigg-Walt, Gartmann-Albin, Jaag, Jäger, Peyer, Pfenninger, Pfiffner-Bearth, Thöny, Trepp, Locher Benguerel
Session: 04.12.2006
Vorstoss: rg Auftrag
Resposta da la regenza
Cun sia incumbensa da fracziun ch'ella ha inoltrà durant la sessiun dal cussegl grond dal december 2006 envida la PS la regenza da prender per mauns uschè svelt sco pussaivel la revisiun ch'è necessaria per adattar la basa legala chantunala en connex cun la nova lescha federala davart ils supplements da famiglia (LSFam), per che quella possia entrar en vigur il 1. da schaner 2008.
La nova lescha davart ils supplements da famiglia è vegnida acceptada dal pievel svizzer en la votaziun da referendum dals 26 da november 2006. La particularitad da questa lescha è d'ina vart ch'ella sto vegnir exequida dals chantuns, che quels ston da l'autra vart er reglar secturs impurtants en lur legislaziun. En quest connex ston els dentant observar tschertas directivas da la confederaziun. Per preparar l'execuziun ston ussa daventar activs tant la confederaziun sco er ils chantuns.
Pervia da las disposiziuns transitoricas da la lescha (artitgel 29 alinea 3 LSFam) èn ils chantuns obligads d'adattar lur urdens da supplements da famiglia. Quels ston esser vegnids mess en vigur cun l'entrada en vigur da la LSFam. Quai duai vegnir fatg il pli tard per il 1. da schaner 2009. En il rom da la procedura da consultaziun tar l'ordinaziun executiva pon ils chantuns er s'exprimer davart la data, cur che la LSFam duai entrar en vigur.
La premissa per realisar la lescha federala sin plaun chantunal è che l'ordinaziun executiva, ch'è vegnida deliberada dal cussegl federal e che duai garantir che la lescha vegnia exequida en moda unitara, saja avant maun. Fin la mesadad da l'onn 2007 gira sin plaun federal previsiblamain la procedura da consultaziun davart l'ordinaziun executiva. I vegn fatg quint che l'ordinaziun executiva vegnia approvada dal cussegl federal fin la fin da november 2007. Pervia da quest urari n'èsi betg pussaivel da reveder la lescha chantunala davart ils supplements da famiglia per il 1. da schaner 2008, e quai simplamain perquai che la basa manca, respectivamain perquai ch'ella n'è anc betg definida. Quai è il motiv che la confederaziun vul dar temp als chantuns fin il 1. da schaner 2009 per far las adattaziuns da la legislaziun ch'èn necessarias e per preparar la realisaziun. Sin basa da la legislaziun federala ston ils chantuns reglar en spezial ils suandants secturs fin a quel termin. Els
- fixeschan las tariffas dals supplements per uffants e per la scolaziun; en quest connex pon els surpassar las tariffas minimalas da la LSFam;
- pon introducir supplements da naschientscha e d'adopziun;
- reglan l'organisaziun e la finanziaziun e surveglian las cassas da cumpensaziun per famiglias;
- reglan l'organisaziun e la finanziaziun dals supplements da famiglia per persunas che n'han nagina activitad da gudogn; els pon surpassar qua il standard minimal da la LSFam (limita d'entrada) ed engrondir il circul da las persunas che han in dretg da quests supplements;
- mantegnan lur cumpetenza d'introducir u da mantegnair supplements da famiglia per persunas che han in'activitad da gudogn independenta; en quest connex na fa la LSFam naginas prescripziuns.
En ils giavischs materials che vegnan menziunads en l'incumbensa da fracziun da la PS n'entra la regenza betg per il mument. Quels vegnan examinads e giuditgads, cur che la revisiun da la basa legala vegn fatga. Sco cumprovà qua survart n'èsi betg pussaivel da reveder la basa legala fin il 1. da schaner 2008. La regenza propona perquai da refusar l'incumbensa da fracziun.
Datum: 19 da favrer 2007