Navigation

Inhaltsbereich

Dumonda Trepp concernent l'uffizi chantunal per industria, mastergn e lavur (UCIML), adina in attestat da la media u dal medi

Sessiun: 05.12.2006

Il UCIML pretenda en ina directiva per las collavuraturas e per ils collavuraturs che exequeschan la lescha davart l'assicuranza cunter la dischoccupaziun, ch'ellas ed els stoppian en cas da malsogna adina da mussar in attestat da la media u dal medi. Sch'in tal attestat n'è betg avant maun, na vegn la schurnada per quel di betg pajada da la cassa da dischoccupaziun.
Percunter statti en la circulara dal secretariat da stadi per l'economia (SECO) davart las "mesiras per il martgà da lavur" (schaner 2006) sut punct A37: "... I dastga vegnir renunzià ad in attestat da la media u dal medi, sche l'impediment da lavur n'ha betg durà pli ditg che trais dis. A partir dal quart di sto en mintga cas vegnir preschentà in attestat da la media u dal medi. Sch'i dat dubis motivads en connex cun l'impediment da lavur da la persuna assicurada, po excepziunalmain vegnir pretendì in attestat da la media u dal medi gia a partir da l'emprim di."
En cas da malsogna vegn per regla pretendì er en la pratica da l'economia in attestat d'incapacitad da lavurar suttascrit d'ina media u d'in medi pir a partir dal terz di. Il contract collectiv da lavur naziunal per la gastronomia oblighescha las collavuraturas ed ils collavuraturs per exempel da preschentar in attestat da la media u dal medi pir a partir dal quart di d'impediment da lavur.
Sch'i vegn ussa pretendì per mintga absenza d'in mez di in attestat d'ina media u d'in medi, producescha il UCIML d'ina vart custs administrativs considerabels e da l'autra vart custs sproporziunads e malnizs da medias e da medis. Senza consultaziun e senza controlla medicinala na po ina media u in medi betg constatar ina incapacitad da lavurar.
Las pli bleras absenzas èn mo da curta durada e na pretendan betg u mo pauc tractament medicinal.
Segir che questa mesira promova la svieuta da las medias e dals medis, ma ella demussa er ina disfidanza generala visavi persunas dischoccupadas. Quellas vegnan dischavantagiadas supplementarmain, per cas ch'ellas èn uschigliò saunas e betg permanentamain en tractament medicinal. Fin a la franschisa tschernida (almain 300 francs) ston ellas pajar sezzas ils custs da la media u dal medi tar ina consultaziun pervia d'ina curta grippa.

Tar las dumondas:

1. Co motivescha il UCIML ch'el divergescha da las directivas dal SECO e co declera el sia regulaziun fitg stretga, ch'è economicamain ed administrativamain chara?

2. Per regla sa tracti da las absenzas causa malsogna da quellas persunas dischoccupadas che sa participeschan activamain ad ina mesira da reintegraziun en il martgà professiunal. Tgi che na sa participescha betg ad ina mesira, na vegn betg e na po per il solit er betg vegnir controllà. Co garantescha il UCIML l'egualitad giuridica da las persunas pertutgadas?

3. È la regenza pronta d'evaluar e da reponderar la nova regulaziun e da returnar eventualmain a la soluziun tenor la circulara dal SECO?

Cuira, ils 5 da december 2006

Trepp, Peyer, Pfiffner-Bearth, Bachmann, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Pfenninger, Thomann, Thöny, Wettstein, Grendelmeier, Locher

Session: 05.12.2006
Vorstoss: rg Auftrag



Resposta da la regenza

1. I constat che l'uffizi chantunal per industria, mastergn e lavur (UCIML) pretenda da persunas assicuradas che tschertgan ina plazza e che sa participeschan a praticums u a mesiras da furmaziun u d'occupaziun in attestat da la media u dal medi gia a partir da l'emprim di ch'ellas èn absentas pervia da malsogna. Ina pratica correspundenta vala er en cas, nua che persunas assicuradas che na cumparan betg al di d'infurmaziun u a discurs da cussegliaziun, s'exculpeschan cun malsogna. Questa pratica ch'è cumpareglià cun las directivas dal SECO pli severa sa basa sin l'experientscha che bleras absenzas tar las mesiras per il martgà da lavur, tar occurrenzas d'infurmaziun e tar discurs da cussegliaziun vegnan motivadas cun malsogna. Cun exequir consequentamain questa pratica severa han pudì vegnir reducidas las absenzas en il rom da las mesiras per il martgà da lavur sco er tar occurrenzas d'infurmaziun e tar discurs da cussegliaziun per circa 70% en proporziun cun il dumber dals dis d'absenza.

Tenor l'infurmaziun dal servetsch giuridic dal SECO pon decider las autoritads executivas chantunalas, sch'ellas vulan pretender areguard la necessitad d'in attestat da la media u dal medi directivas pli restrictivas che divergeschan da quellas dal SECO. Consequentamain n'è la pratica dal UCIML tuttavia betg illegala

In'enquista mussa ch'er auters chantuns da la Svizra orientala divergeschan da las directivas dal SECO. Per exempel pretenda il chantun Turgovia l'attestat da la media u dal medi a partir dal segund di da malsogna. Auters chantuns suondan las directivas dal SECO tar in'emprima absenza pervia da malsogna. En cas d'ulteriuras absenzas pervia da malsogna vegn pretendì l'attestat da la media u dal medi a partir da l'emprim di da malsogna.

2. Il fatg ch'ins ha facticamain differentas pussaivladads da controlla n'ha betg da far cun il princip dal stadi da dretg da tractar tut las persunas en moda giuridicamain eguala. Igl è evident ch'ins bada immediatamain, sch'ina participanta u sch'in participant dischoccupà n'è betg preschent al curs, entant che nagin che na fa stim, sch'ina persuna dischoccupada che n'è betg declerada sco incapabla da lavurar pervia da malsogna è a chasa en letg.

Il princip dal tractament egual na vegn dentant betg tangà e quai er per in auter motiv. Cuntrari a las persunas dischoccupadas che survegnan mintga mais lur daner da dischoccupaziun, chaschunan persunas che tschertgan ina plazza e che sa participeschan a las mesiras per il martgà da lavur ultra da la schurnada anc custs supplementars. L'onn passà èsi vegnì duvrà en il Grischun ultra da la schurnada 8,3 milliuns francs per 4'563 persunas ch'èn sa participadas a las mesiras per il martgà da lavur. En media dat quai consequentamain custs supplementars da 1'820. francs per mintga persuna che sa participescha ad ina mesira per il martgà da lavur. En vista a quests custs considerabels per mesiras da furmaziun, d'occupaziun e d'integraziun èsi en mintga cas giustifitgà da tractar differentamain quellas persunas che sa participeschan a questas mesiras e quellas persunas dischoccupadas, per las qualas quests custs na ston betg vegnir impundids.

3. La finamira da questa pratica ch'è cumpareglià cun las directivas dal SECO pli severa n'è betg da schicanar las persunas pertutgadas che tschertgan ina plazza, mabain d'impunder ils meds che stattan a disposiziun uschè utilmain sco pussaivel. En vista a questa finamira ed en vista al fatg che la disciplina da participaziun è cumprovadamain sa meglierada, è la regenza da l'avis ch'i saja adequat e raschunaivel da mantegnair la pratica che stat en discussiun.

Datum: 6 da favrer 2007