Navigation

Inhaltsbereich

Incumbensa Parolini concernent la survista e las prioritads en connex cun la construcziun da vias

Sessiun: 05.12.2006
La construcziun ed il mantegniment da las vias dovra en noss chantun extendì cun ses 163 km vias naziunalas, cun ses 590 km vias principalas e cun ses 878 km vias da colliaziun blers meds finanzials.

Cun concentrar ils meds finanzials en il sectur da las vias principalas sin ils dus projects gronds dals sviaments da Claustra e da Flem èn restads ils ultims onns relativamain paucs meds per auters projects urgents. Perquai che la nova concepziun da la gulivaziun da finanzas tranter la confederaziun ed ils chantuns (NGF), vegn probablamain realisada l'onn 2008, na permetta la confederaziun per il mument nagins novs projects en il sectur da las vias principalas. Tras las mesiras da spargn è la summa d'investiziun annuala en il sectur da las vias da colliaziun vegnida reducida per in terz. Percunter han ils meds finanzials per il mantegniment da las vias chantunalas pudì vegnir auzads levamain. Igl è però in fatg che differents trajects da vias en il chantun sa chattan en in stadi desolat e che singuls abitadis ston anc adina supportar in grond traffic da transit. Perquai fai basegn d'agir.

Cun l'introducziun da la NGF decida mo pli il chantun quants meds che vegnan investids per construir e per mantgnair las vias chantunalas. La discussiun politica en il cussegl grond vegn perquai a vegnir pli e pli impurtanta. Per ch'il cussegl grond possia s'immaginar il basegn d'agir en connex cun la construcziun da las vias èsi absolutamain necessari da survegnir ina survista generala da tut ils projects da construcziun e da sanaziun da las vias chantunalas, che mussa a tgenins projects che la regenza vul dar la prioritad.
La regenza vegn incumbensada da suttametter al parlament ina survista da tut ils projects da construcziun e da sanaziun en il chantun, e quai cun ina glista da prioritads correspundenta.

Cuira, ils 5 da december 2006

Name: Parolini, Berther (Sedrun), Berni, Bleiker, Brandenburger, Brüesch, Buchli, Butzerin, Caduff, Campell, Candinas, Castelberg-Fleischhauer, Casty, Casutt, Christoffel-Casty, Conrad, Darms-Landolt, Dermont, Dudli, Fasani, Federspiel, Felix, Geisseler, Giovanoli, Hardegger, Hasler, Heinz, Kleis-Kümin, Koch, Kollegger, Loepfe, Mani-Heldstab, Märchy-Michel, Mengotti, Möhr, Montalta, Noi-Togni, Parpan, Pedrini, Pfister, Plozza, Portner, Quinter, Ratti, Righetti, Sax, Stiffler Stoffel, Tenchio, Thurner-Steier, Troncana-Sauer, Tscholl, Vetsch (Claustra), Zanetti, Grass, Grendelmeier, Rischatsch

Session: 05.12.2006
Vorstoss: rg Auftrag


Resposta da la regenza

Las duas incumbensas tractan da princip la medema tematica cunquai ch'ellas pretendan d'enumerar ils criteris e las prioritads, tenor ils quals resp. tenor las qualas il chantun cumplettescha e mantegna sia rait da vias. Pervia da quai èsi materialmain giustifitgà d'unir questas duas incumbensas e da las respunder ensemen.

1. a) Ils princips davart l'infrastructura da traffic da noss chantun èn francads en il plan directiv chantunal, relaschà da la regenza ils 19 da november 2002. Là vegnan d'ina vart circumscrittas las incumbensas da la rait da vias, da l'autra vart vegnan formuladas las ponderaziuns generalas per construir e per mantegnair las vias. Ils puncts principals da la politica da l'infrastructura da traffic pon pia vegnir resumads sco suonda:
- garantir l'accessibladad e la cuntanschibladad,
- mantegnair la funcziunalitad da l'infrastructura da traffic per la societad e per l'economia,
- stgaffir ina relaziun favuraivla tranter ils custs ed il niz,
- meglierar la qualitad da las colliaziuns,
- far ch'il traffic saja segir,
- reducir las grevezzas per l'ambient sco er avair quità da las resursas,
- sustegnair il svilup d'abitadi.

b) Al cussegl grond èn vegnidas rendidas enconuschentas fin ussa mintga dus onns las lavurs da projectaziun e da construcziun, e quai en colliaziun cun il preventiv che cuntegna il program da construcziun da vias. Cun il preventiv vegnan declerads mintga onn ils custs currents decisivs e las expensas d'investiziun da la finanziaziun speziala "vias" er s'orientond als objects.

c) Per fixar las prioritads ed ils standards da cumplettaziun serva a la regenza in program da computer ch'è vegnì stgaffì da l'uffizi da construcziun bassa per registrar en moda structurada il stadi da las vias e che cumpiglia ultra dal stadi architectonic sco tal da las vias er aspects funcziunals sco la funcziun da rait, il traffic en media, la quota dal traffic pesant, pussaivladads da colliaziun alternativas, l'utilisaziun tras il traffic public, l'impurtanza economica e turistica da la via e.u.v. Da questas infurmaziuns deducescha il chantun alura ses program da construcziun da vias ch'el vul realisar a vista mesauna.

2. Igl è correct che las premissas per finanziar la construcziun da vias en il chantun Grischun vegnan a sa midar da vart da la confederaziun, e quai pervia da la nova concepziun da la gulivaziun da finanzas (NGF). Per l'ina vegn il chantun distgargià tar la confinanziaziun da la construcziun da las vias naziunalas, da l'autra vart vegn el a pudair profitar da nov da contribuziuns globalas che n'èn dentant betg liadas vi da tscherts objects per construir, per mantegnair e per manar las vias principalas. Questa moda da finanziar vegn senz'auter ad engrondir las libertads politicas d'agir. Il fatg quai mo sco remartga a l'ur che la confederaziun vegn a pajar er en l'avegnir contribuziuns per las vias principalas chaschuna ch'il chantun na po betg renunziar da classifitgar sias vias sco vias principalas resp. sco vias da colliaziun.

3. Il resultat è che la regenza è pronta da suttametter al cussegl grond ensemen cun il program da la regenza 2009 fin 2012 ina survista dals projects da construcziun da vias ch'èn previs a vista mesauna. Questa preschentaziun generala duai gidar a fixar las prioritads per construir las vias sco er il standard da construcziun da vias en emprima lingia tenor il niz total e da render chapiblas las ponderaziuns che resguardan la politica regiunala. En in proxim pass duai ina tala preschentaziun dals projects da construcziun da vias servir sco basa per elavurar il plan d'incumbensas e da finanzas integrà (PIFI) per il sectur d'investiziun. En il senn da las explicaziuns ch'èn vegnidas fatgas qua survart è la regenza pronta d'acceptar las incumbensas.

Datum: 5 da mars 2007