Navigation

Inhaltsbereich

Dumonda Caduff concernent l'integraziun da la centrala operativa dal clom d'agid sanitar 144 a Glion en la centrala d'alarm e d'acziuns a Cuira

Sessiun: 14.02.2007
Tenor l'art. 32 da la lescha per promover la tgira da persunas malsaunas ha il chantun l'incumbensa da garantir che persunas disgraziadas, malsaunas u en privel vegnian salvadas en moda uschè optimala e svelta sco pussaivel, e quai cun coordinar, cun survegliar e cun conceder contribuziuns ad organisaziuns ed a persunas ch'èn activas en ils servetschs da salvament.

Las incumbensas per realisar il salvament da persunas en il chantun vegnan fixadas en cas da basegn tras il departament da giustia, polizia e sanitad en incaricas da prestaziun individualas e vegnan surdadas ad instituziuns renconuschidas. L'incarica da prestaziun per manar la centrala operativa dal clom d'agid sanitar 144 (CO CASA 144) è vegnida surdada a l'ospital regiunal a Glion. Tar la centrala dal clom d'agid sanitar (CASA) a Glion lavuran oz 9 collavuraturas e collavuraturs che han retschet l'onn 2005 circa 42'400 cloms. En il rapport "Evaluaziun dals exercizis d'acziun per il servetsch sanitar 2005" dals 18 da schaner 2006 giuditgescha il departament da giustia, polizia e sanitad la lavur che la CASA 144 ha prestà sco suonda:

"Las persunas d'acziun èn vegnidas clamadas da la CASA 144. Quella ha alarmà ils servetschs da salvament tras il cumond da charrar, las medias ed ils medis da servetsch per telefon sco er las sanitarias ed ils sanitaris da las colonnas sveltas da sanitad tras l'indriz dad SMT da la polizia chantunala. Il clom da las persunas d'acziun ha funcziunà perfetgamain. Er la CASA 144 e la centrala d'alarm e d'acziuns (CAA) han pudì profitar da quests exercizis e coordinar ils andaments ina cun l'autra."

Da differentas medias han ins pudì intervegnir l'october 2006 che la regenza laschia examinar d'in post spezialisà extern l'integraziun da la centrala da clom d'agid sanitar a Glion en la nova centrala d'alarm e d'acziuns tar la polizia chantunala a Cuira. En questas medias vegn cità il cusseglier guvernativ Martin Schmid sco suonda: "Igl è pli effizient da coordinar tut las organisaziuns da glisch blaua e lur acziuns d'in lieu anora."

Aspects da la politica regiunala na vegnan menziunads nagins en connex cun questa decisiun. E quai cumbain ch'il rapport che vegn cità qua survart conferma la qualitad irreproschabla da la lavur da la CASA 144 a Glion. Tras la concentraziun da tut las organisaziuns da glisch blaua a Cuira vul quai dir ina giada dapli che plazzas da lavur giajan a perder en las regiuns.

Las petentas ed ils petents supplitgeschan la regenza da respunder las suandantas dumondas:

1. Co è il stadi actual dals scleriments areguard l'integraziun da la CASA en la CAA?

2. Il servetsch da salvament ha la finamira da gidar confurm a la situaziun mintga persuna disgraziada, malsauna u en privel en moda uschè svelta sco pussaivel. Po la regenza confermar che questa finamira è ed era garantida da tut temp tras l'organisaziun actuala dal servetsch da salvament?

3. Tge potenzial (cunzunt finanzial) resulta per il chantun, sche la CASA vegn integrada en la CAA? Tge ulteriuras ponderaziuns giogan ina rolla tar l'examinaziun da questa integraziun e co vegnan quellas ponderaziuns valitadas e resguardadas tar la decisiun?

4. Tge ulteriurs servetschs da salvament duain er vegnir integrads en la CAA?

Cuira, ils 14 da favrer 2007

Name: Caduff, Montalta, Arquint, Augustin, Berni, Berther (Sedrun), Bleiker, Bondolfi, Brandenburger, Brüesch, Bucher-Brini, Buchli, Bundi, Candinas (Rabius), Casutt Renatus (Falera), Caviezel (Pitasch), Cavigelli, Christoffel-Casty, Darms-Landolt, Farrér, Felix, Hardegger, Hasler, Jenny, Kleis-Kümin, Koch, Menge, Mengotti, Meyer Persili (Cuira), Niederer, Noi-Togni, Parolini, Peer, Pfister, Sax, Tenchio, Thurner-Steier, Troncana-Sauer, Tuor, Vetsch (Claustra), Zanetti, Brunold, Candinas (Mustér), Casutt-Derungs Silvia (Falera)

Session: 14.02.2007
Vorstoss: rg Anfrage

Resposta da la regenza

1. Co è il stadi actual dals scleriments areguard l'integraziun da la CASA en la CAA?
En connex cun la construcziun da la nova centrala d'alarm e d'acziuns (CAA) a Cuira ha il schef dal departament da giustia, segirezza e sanadad incumbensà l'atun 2006 la firma AWK group, consulting ed engineering, Turitg, d'examinar la realisabladad d'ina fusiun dals posts chantunals da coordinaziun e da preschentar ils avantatgs ed ils dischavantatgs d'ina tala soluziun. Plinavant ha el incumbensà l'uffizi chantunal da construcziun auta d'examinar, sche la centrala dal clom d'agid sanitar (CASA 144) possia vegnir integrada en la CAA en quai che reguarda las localitads. En ses rapport dals 15 da favrer 2007 vegn l'uffizi da construcziun auta a la conclusiun che l'integraziun da las plazzas da lavur da la CASA 144 en la CAA saja pussaivla en quai che reguarda las localitads. En il terz plaun, directamain sut la centrala d'acziuns, stuess vegnir renunzià ad in biro pervia da la tecnica; ins partia dal fatg ch'i vegniss en cas d'ina integraziun da la CASA 144 lavurà vinavant cun las applicaziuns da fin ussa. Il studi ch'è vegnì furnì da la AWK ils 30 da mars 2007 è da l'avis ch'ina centrala communabla en las localitads da la CAA na saja betg recumandabla e propona da mantegnair il status quo, fin ch'i vegn realisada la sutvarianta "centrala communabla en novas localitads". Areguard in'eventuala fusiun n'èn fin ussa vegnidas prendidas naginas decisiuns.

2. Il servetsch da salvament ha la finamira da gidar confurm a la situaziun mintga persuna disgraziada, malsauna u en privel en moda uschè svelta sco pussaivel. Po la regenza confermar che questa finamira è ed era garantida da tut temp tras l'organisaziun actuala dal servetsch da salvament?
Dapi ch'ins ha mess en funcziun la CASA 144 e dapi ch'ins ha introducì il sistem da medias e da medis da servetsch, è s'augmentada tant l'effizienza sco er la qualitad dal servetsch da salvament en il chantun Grischun. Las forzas da salvament vegnan clamadas bunamain mo sur la CASA 144 ed il temp, fin che l'agid arriva a cas dal stgalim d'urgenza 1, importa bunamain adina main che 15 minutas; plinavant cumpara tar var 95 pertschient da questas acziuns ina sanitara u in sanitar da salvament SPS al lieu d'acziun. La situaziun actuala na pussibilitescha dentant betg da nizzegiar sinergias tranter questas duas centralas ed augmenta il privel da problems da communicaziun respectivamain engrevgescha en situaziuns da crisa il barat d'infurmaziuns en cumparegliaziun cun la varianta d'ina suletta centrala d'alarm e d'acziuns. A medem temp crititgescha il studi da la AWK il fatg che la CASA 144 è mintgatant occupada mo dad ina persuna.

3. Tge potenzial (cunzunt finanzial) resulta per il chantun, sche la CASA vegn integrada en la CAA? Tge ulteriuras ponderaziuns giogan ina rolla tar l'examinaziun da questa integraziun e co vegnan quellas ponderaziuns valitadas e resguardadas tar la decisiun?
Ina centrala communabla per differentas organisaziuns porscha a lunga vista in grond potenzial per nizzegiar sinergias tranter las organisaziuns (barat d'infurmaziuns, occupar temps da grond traffic) e meglierescha ultra da quai ils servetschs a favur da nossa populaziun e da tut las organisaziuns. A medem temp pon sinergias er gidar a spargnar custs, p.ex. tras quai che l'augment da cloms, che vegn spetgà, po vegnir cumpensà cun il medem dumber dal persunal. Che questas sinergias pon er propi vegnir cuntanschidas en la pratica, mussan las experientschas positivas ch'èn vegnidas fatgas en auters chantuns (SG, SO, TG) cun centralas che vegnan manadas sut in tetg. Ellas ston vegnir suttamessas a ponderaziuns da la politica regiunala.

4. Tge ulteriurs servetschs da salvament duain er vegnir integrads en la CAA?
La stad 2007 vegnan integrads en la CAA las manadras ed ils manaders d'acziun dal commando regiunal III dal corp da guardias da cunfin. Per l'uffizi da polizia da fieu vegnan clamads en acziun ils pumpiers da la CAA anora. A vista mesauna duain vegnir integradas en la CAA tut las sutcentralas concernent ils cloms da 118. Ulteriuras integraziuns en la CAA a Cuira n'èn actualmain betg planisadas. En mintga cas pretenda ina proxima generaziun da la CAA ch'i vegnia fatga ina planisaziun integrala, uschia che tut ils ulteriurs partenaris pussaivels pudessan vegnir integrads. Quai vala cunzunt er per la centrala d'acziuns da la polizia da la citad da Cuira, sche la citad da Cuira ha in interess d'ina CAA communabla.

Datum: 8 da matg 2007