1. Avant la nova orientaziun è organisaziun da la viafier retica en la periferia stada caracterisada d'unitads da vendita fitg localas e per gronda part fitg pitschnas. Sin fundament d'in profil detaglià concernent las staziuns èn vegnidas controlladas tut las staziuns areguard la distribuziun ed areguard il marketing. Sin basa da quai ha la viafier retica decidì da betg pli occupar las staziuns da Küblis, da Tavau Vitg, da Schlarigna e da Zuoz cun agen persunal, mabain da tschertgar soluziuns da cooperaziun cun terzas persunas u cun terzas organisaziuns. Per quest intent maina la viafier retica actualmain tractativas contractualas intensivas cun partenarias e cun partenaris pussaivels. Envers la clientella duain las prestaziuns da servetsch esser garantidas en il rom actual. Tar las staziuns da Langwies e da l'Ospizio Bernina percunter duai il persunal da staziun vegnir reducì cumplettamain. Grazia a novs automats da bigliets vegnan las passagieras ed ils passagiers a disponer d'in pli grond sortiment da prestaziuns da servetsch che fin ussa al spurtegl servì. Cun serrar questas staziuns è terminà process da raziunalisaziun en la periferia. Ulteriuras mesiras che pertutgan directamain las passagieras ed ils passagiers n'èn betg planisadas.

2. Tant la regenza sco er la viafier retica èn conscientas dal fatg che plazzas da lavur van a perder tras quai. Sche la viafier retica vul dentant segirar ses avegnir sco viafier chantunala grischuna, è in process da raziunalisaziun inevitabel. La reducziun da plazzas ha la finala lieu sin tut ils stgalims ierarchics e succeda en ina moda ch'è ord vista sociala uschè raschunaivla sco pussaivel. En emprima lingia vegn la viafier retica ad exequir quest pass tras pensiunaments anticipads e tras fluctuaziuns natiralas.

3. Sut "service public" en il sectur dal traffic public dastga vegnir chapida in'avertura dal Grischun cun la viafier, cun l'auto da posta e cun telefericas che resguarda l'entir territori e ch'è attractiva per las passagieras e per ils passagiers. Las prestaziuns da servetsch dal "service public" (purschida e distribuziun) ston vegnir furnidas en moda uschè effizienta sco pussaivel, e quai en vista als meds finanzials publics che ston vegnir impundids per quai. Quai includa cooperaziuns per realisar las prestaziuns en moda effizienta. Impurtant è che las prestaziuns da servetsch envers la clientella possian sche pussaivel vegnir garantidas en la qualitad giavischada.

4. La viafier retica è conscienta da las sensibilitads. Per las staziuns pertutgadas tschertga ella perquai soluziuns da cooperaziun cun partenarias e cun partenaris locals sco chau-staziuns externs. I sto vegnir menziunà che la nova orientaziun duai segirar l'avegnir da la viafier chantunala grischuna e metter las bundant 1200 plazzas da lavur sin in fundament anc pli ferm. Senza dar ina cuntrapaisa consequenta avessan novas cundiziuns dal martgà, la dependenza dal maun public e svilups interns dals custs mess en dumonda l'avegnir da la viafier retica en sia furma actuala. En connex cun sias mesiras ha la viafier retica guardà che la preschientscha saja adattada a las pretensiuns, e quai cun manar er vinavant en mintga regiun almain ina staziun che vegn servida da l'agen persunal.

5. La reducziun da plazzas tar il persunal da staziun na duai tenor l'avis da la regenza betg esser colliada cun ina reducziun d'ulteriuras prestaziuns. La purschida da trens actuala duai da princip vegnir mantegnida en tut las regiuns. Il chantun spetga er en l'avegnir ch'il provediment saja garantì dapertut. Quai na vul betg dir che tut las prestaziuns da servetsch da las staziuns stoppian vegnir furnidas obligatoricamain da la viafier retica. Empè da quai duain vegnir tschertgadas pli savens pussaivladads da collavurar cun partenarias e cun partenaris locals.

Datum: 8 da matg 2007