Navigation

Inhaltsbereich

Dumonda Noi-Togni concernent las mesiras da segirezza e da protecziun da l'ambient en il rom dal sviament da la part sut da la Val Mesauc

Sessiun: 14.02.2007
Il schef dal departament da construcziun, traffic e selvicultura, cusseglier guvernativ Stefan Engler, ha gia respundì en moda persvadenta las dumondas davart il sviament da la part sut da la Val Mesauc a chaschun da la sessiun d'october e da december 2006 dal cussegl grond.

Malgrà quai ma permet jau da far puspè in pèr dumondas davart quels aspects che ma stattan spezialmain a cor sco politicra, e però quels che concernan la segirezza e la sanadad betg mo da la populaziun locala.

L'aboliziun da la via naziunala A13 che maina tras il center dal vitg da Roveredo contribuescha senz'auter a la sanadad da la populaziun locala e vegn pervia da quai beneventada da tuttas e da tuts. Ina realisaziun svelta è pervia da quai la consequenza logica.

Las dumondas che vegnan tschentadas qua concernan aspects che pudessan anc vegnir meglierads, perquai che questa ovra na po betg pli vegnir midada, ina giada ch'ella è realisada. Nus tschentain las suandantas dumondas:

1. Tunnel da San Fedele

Il tunnel da San Fedele ha ina lunghezza da 2,5 km ed è in tunnel singul che ha dus vials en direcziuns oppostas (in en direcziun sid, in en direcziun nord) cun ina curva ferma e cun quatter vials ordaifer il tunnel.

N'è la regenza betg er da l'avis suenter las tragedias en tunnels (l'ultima è capitada ils 16 da settember 2006 en il tunnel da Viamala ed ha custà la vita a nov persunas) ch'i saja inditgà da sa far quitads davart eveniments sumegliants en il tunnel da San Fedele. Vul la regenza declerar en quest connex en moda concreta e precisa tge mesiras da prevenziun che vegnan prendidas cunter accidents en quest tunnel? Vul la regenza declerar en moda concreta e precisa tge mesiras da salvament che vegnan prendidas en quest tunnel? Vegn fatg per quai in plan da mesiras e sche gea, vegn quel plan publitgà ed exponì publicamain? Tgi vegn a surpigliar la responsabladad per eventuals accidents en quest tunnel? È il territori da San Fedele vegnì suttamess ad in'examinaziun geologica? Nua vegnan sviadas las svapurs nuschaivlas che vegnan producidas en il tunnel? Vegnan quellas emessas en ils conturns directs en ina concentraziun ch'è donnegianta per la sanadad?

2. Territori

L'impurtanza dal mantegniment e da la protecziun da la cuntrada, da la flora, da la fauna e da l'aua è enconuschenta sin tut il mund. Enconuschenta è er l'influenza d'in ambient saun per la sanadad da l'uman. L'enconuschientscha sa derasa adina pli fitg che l'inobservanza da talas valurs e da talas ovras da la natira pon chaschunar donns da la sanadad tar mintgin da nus, dentant er grevas catastrofas da la natira (bovas, sbuvadas, inundaziuns u mancanza dad aua). Èn pia las midadas sin il territori da las vischnancas da Grono, da Roveredo e da San Vittore en la part sut da la Val Mesauc giustifitgadas areguard la sensibilitad da l'ambient ed areguard la planisaziun dal territori?

Tge mesiras concretas per la protecziun da l'ambient vegnan prendidas? Exista in project correspundent?

Cuira, ils 14 da favrer 2007

Name: Noi-Togni, Arquint, Baselgia-Brunner, Bucher-Brini, Gartmann-Albin, Jaag, Jäger, Menge, Meyer Persili (Cuira), Pfiffner-Bearth, Thöny, Zurfluh

Session: 14.02.2007
Vorstoss: rg Anfrage

Resposta da la regenza

Per il sviament da Roveredo vegnan exequidas durant l'onn current las emprimas lavurs preparatoricas, e quai sut la direcziun da l'uffizi da construcziun bassa dal Grischun. La responsabladad per l'ulteriura projectaziun e per l'ulteriura realisaziun da las lavurs principalas vegn surdada en consequenza da l'introducziun da la nova concepziun da la gulivaziun da finanzas e da las incumbensas tranter la confederaziun ed ils chantuns a la filiala da l'uffizi federal da vias a Bellinzona.

Sa basond sin il stadi actual s'exprima la regenza sco suonda davart las singulas dumondas:

1. Il tunnel da San Fedele vegn projectà confurm a las prescripziuns tecnicas las pli novas. Previs èn tut ils indrizs da segirezza, sco indrizs d'alarm d'incendi, indrizs moderns da ventilaziun, galarias per fugir, ina illuminaziun d'orientaziun e.u.v. Il project detaglià è vegnì examinà ed approvà da l'uffizi federal da vias. En quest connex èn vegnids giuditgads tant ils fatgs tecnics sco er ils aspects da la segirezza. Accidents che vegnan chaschunads da las utilisadras e dals utilisaders pervia da sbagls da manischar na pon dentant mai vegnir exclus en in tunnel cun traffic en direcziun cuntraria. Cur ch'igl è uschè lunsch vegnan en mintga cas endrizzadas tut las plazzas d'acziun ch'èn necessarias per las organisaziuns da glisch blaua; ed avant ch'il tunnel vegn avert, han lieu exercizis. Il manaschi da quest sviament na vegn a chaschunar nagliur concentraziuns nuschaivlas da svapurs.

L'aboliziun dal trassé avert tras la vischnanca da Roveredo ha gist la finamira da proteger la populaziun directamain pertutgada da Roveredo cunter las consequenzas nuschaivlas dal traffic sin via. La qualitad da viver per ils umans ch'èn pertutgads directamain vegn augmentada er tras quai ch'il vitg che la via naziunala separa oz en duas parts po puspè vegnir reunì. Il sviament distgargia pia il territori d'abitadi e restabilescha l'unitad dal vitg. Quest giudicament correspunda er tant al resultat da l'examinaziun ecologica ch'è reglada tras la lescha e ch'è vegnida fatga sin differents stgalims sco er al giudicament tecnic spezialisà correspundent da l'uffizi per la natira e l'ambient dal Grischun e da l'uffizi federal d'ambient. Las consequenzas per l'ambient tras il diever da surfatschas (bilantscha ecologica da las surfatschas), tras substanzas nuschaivlas en l'aria e tras la grevezza da canera, sin l'aua sutterrana, sin la vegetaziun e sin la flora sco er sin il guaud e sin la cuntrada èn vegnidas tractadas en il rapport cumplessiv davart la cumpatibilitad ecologica. Quest rapport vegn a la conclusiun che naginas prescripziuns legalas na s'opponan a la realisaziun dal project, sche las mesiras per la protecziun da l'ambient ch'èn integradas en il project vegnan resguardadas. En vista al fatg che questas consequenzas èn vegnidas giuditgadas en moda positiva, na datti or dal puntg da vista da la regenza naginas raschuns per far ulteriurs scleriments da las consequenzas ch'èn colliadas cun il project dal sviament da Roveredo en la part sut da la Val Mesauc.

Datum: 8 da matg 2007