Incumbensa da fracziun da la PS Menge concernent la contingentaziun da las requirentas e dals requirents d'asil che ston vegnir collocads en las vischnancas
Sessiun: 14.02.2007
L'avertura dals dus centers da requirentas e da requirents d'asil a Valbella ed a Valzeina han provocà discussiuns animadas.
Particularmain en la vischnanca da Valzeina cun ina populaziun da 137 persunas datti in'opposiziun considerabla cunter l'avertura da l'anteriura chasa da vacanzas "Flüeli" sco chasa d'asilantas e d'asilants. Per la populaziun na sa tracti betg da motivs xenofobs, mabain dal fatg, ch'i dat ina gronda disproporziun tranter la populaziun residenta ed il dumber avisà da requirentas e da requirents d'asil (tenor las indicaziuns da la regenza vegnan quai ad esser 40 50 persunas). En sia communicaziun a las medias dals 20-12-2006 ha la vischnanca constatà tranter auter cleramain: "Nossas stentas sa drizzan cunter la moda da proceder dal chantun e na sa drizzan betg cunter l'immobiglia 'Flüeli' ed er betg cunter las requirentas e cunter ils requirents d'asil, mabain per ellas e per els."
En ses e-mail a cusseglier guvernativ Schmid ha la vischnanca menziunà tranter auter: "In lieu uschè perifer, sco là nua che sa chatta il "Flüeli", na po a noss avis insumma betg promover l'integraziun. Ord nossa vista èn ils problems predestinads per las requirentas e per ils requirents d'asil sco er per la populaziun da Valzeina. Ultra da quai n'èsi betg pussaivel per la pitschna vischnanca da Valzeina d'integrar 40 u dapli requirentas e requirents d'asil. Il dumber da las requirentas e dals requirents d'asil stuess esser bainquant pli pitschen."
Ormai ch'il center d'expulsiun a Landquart vegn remplazzà tras il center a Valbella, ston ins partir dal fatg ch'il 'Flüeli' daventa in center da transit. I na po betg vegnir exclus che singulas requirentas d'asil e che singuls requirents d'asil e lur famiglias vegnan a dimorar là durant onns; mesiras d'integraziun èn absolutamain necessarias.
La vischnanca da Valzeina n'è pia betg en il cas d'integrar in dumber da requirentas e da requirents d'asil uschè grond.
Generalmain n'èsi betg prudent che vischnancas pitschnas vegnan confruntadas cun in dumber uschè grond da persunas che n'èn betg dal lieu. Ina contingentaziun en las vischnancas u almain en las regiuns daventa necessaria.
La regenza vegn envidada da crear ina basa legala per l'assegnaziun resp. per la contingentaziun da requirentas e da requirents d'asil en las vischnancas. Cun plazzar las requirentas ed ils requirents d'asil sto il chantun procurar per ina repartiziun adequata da las persunas che ston vegnir collocadas. La soluziun adequata pudess esser in'assegnaziun a las corporaziuns regiunalas, empè d'engrevgiar sproporziunadamain singulas vischnancas. Da princip stuess il chantun collocar en ina regiun resp. en ina vischnanca mo in dumber da requirentas e da requirents d'asil inferiur a 7 pertschient da la populaziun residenta.
Cuira, ils 14 da favrer 2007
Name: Menge, Trepp, Arquint, Baselgia-Brunner, Bucher-Brini, Gartmann-Albin, Jaag, Jäger, Meyer Persili (Cuira), Peyer, Thöny, Zurfluh
Session: 14.02.2007
Vorstoss: rg Anfrage
Resposta da la regenza
Tenor l'art. 27 en cumbinaziun cun l'art. 80 da la lescha d'asil (LAsil; CS 142.31) èn ils chantuns cumpetents per la collocaziun da requirentas e da requirents d'asil durant la procedura d'asil. La distribuziun da las requirentas e dals requirents d'asil sin ils chantuns succeda sin fundament da la clav da repartiziun da l'art. 21 da l'ordinaziun 1 davart l'asil (OAsil 1; CS 142.311). Il Grischun sto surpigliar, collocar ed assister 2,7% da tut las requirentas e da tut ils requirents d'asil. Durant ils ultims tschintg onns han ils centers federals d'accoglientscha assegnà al chantun Grischun annualmain tranter 685 e 242 requirentas e requirents d'asil.
En il rom da la reorganisaziun da l'administraziun chantunala ha la regenza transferì la collocaziun da las requirentas e dals requirents d'asil da l'uffizi dal servetsch social a l'uffizi da fatgs da polizia e da dretg civil (UPDC) ed ha uschia concentrà tut las incumbensas chantunalas dals fatgs d'asil en in post da servetsch. Sco consequenza da questa nova attribuziun da l'incumbensa d'assistenza sco er da las mesiras da spargn rigurusas da la confederaziun sin il champ d'asil ha il UPDC elavurà in nov concept da collocaziun e d'assistenza. Quest concept prevesa en emprima lingia la collocaziun da las requirentas e dals requirents d'asil en quatter geners d'alloschis collectivs tenor il stadi respectiv da lur procedura d'asil. En il center per l'emprima registraziun a Cuira vegnan recepids l'emprim tut las requirentas e tut ils requirents d'asil ch'èn vegnids assegnads al chantun. Per la durada da l'ulteriura procedura vegnan las requirentas ed ils requirents d'asil collocads en ils centers transitorics da Schluein e da Cuira. En il center d'expulsiun a Vaz vegnan collocadas actualmain persunas, da las qualas la procedura d'asil è terminada cun vigur legala. La finala vegn manà in center minimal en la Val dal Rain grischuna, en il qual vegnan collocadas en spezial persunas renitentas e persunas ch'èn daventadas chastiablas.
L'alloschi collectiv a Valzeina vegn utilisà suenter sia avertura sco center d'expulsiun e l'object a Vaz vegn midà en in center transitoric. Sin fundament da l'intent d'utilisaziun previs per l'alloschi a Valzeina sco center d'expulsiun scadan las stentas d'integraziun che vegnan fatgas valair, e per la vischnanca da staziunament na resultan er betg incumbensas correspundentas che servan a promover l'integraziun.
Tras l'assistenza chantunala da las requirentas e dals requirents d'asil che dura a partir da l'assegnaziun tras la confederaziun fin a l'expulsiun han las vischnancas pudì vegnir deliberadas ils ultims onns d'incumbensas difficilas e spinusas, sco en spezial da la tschertga da stabiliments da collocaziun adattads sco er da l'assistenza e da l'accumpagnament da famiglias e da singulas persunas dal sectur d'asil. Tras la collocaziun e tras l'assistenza centrala e coordinada èsi stà pussaivel da cuvrir ils custs che resultan, e quai cun agid da las pauschalas d'indemnisaziun da la confederaziun. Cun liquidar l'incumbensa da sustegniment cumplessiva en moda economica e simpla n'èn resultads custs supplementars ni per il chantun ni per las vischnancas. La collocaziun coordinada da las requirentas e dals requirents d'asil tras il chantun è sa cumprovada ed è stada nizzaivla per il chantun, dentant en spezial er per las vischnancas. Uschia han ins pudì evitar ina repartiziun da las requirentas e dals requirents d'asil a las vischnancas quai che fiss stà cumbinà cun gronds custs ed er las consequenzas respectivas.
Sin fundament da las experientschas ch'èn vegnidas fatgas sco er sin fundament da las remartgas da differentas represchentantas e da differents represchentants da las vischnancas refusa la regenza ina midada da sistem tar la collocaziun da las requirentas e dals requirents d'asil, pia ad in sistem che prevesess da distribuir questas persunas sin las vischnancas, a norma dal dumber d'abitantas e d'abitants e che fiss pussaivel gia oz tenor l'art. 8 OECGtLEA (DG 618.100). Sut l'aspect dal tractament egual da las vischnancas resp. da las associaziuns regiunalas fiss ina repartiziun da las requirentas e dals requirents d'asil cumbinada cun ina limitaziun numerica per mintga vischnanca resp. per mintga associaziun regiunala cun problems pratics memia gronds, sch'i fiss da resguardar tar la distribuziun tranter auter l'origin da las singulas persunas e da las famiglias, lur stadi da sanadad e lur cumportament. Vi da quest fatg na midass er l'integraziun da las associaziuns regiunalas nagut, perquai che l'adempliment da questas incumbensas dependa savens dal fatg, sch'i stattan a disposiziun locals da collocaziun adattads e sch'il persunal d'assistenza respectiv è avant maun. La regenza propona perquai da refusar l'incumbensa.
Datum: 8 da matg 2007