Navigation

Inhaltsbereich

Dumonda da la cumissiun per giustia e segirezza concernent ina politica chantunala da militar (emprim sutsegnader)

Sessiun: 14.02.2007
La politica da militar e da segirezza è sin via da sa midar. Il Grischun ha stuì sentir ils ultims onns fitg ferm las tendenzas da centralisaziun che han cumenzà cun ina reducziun considerabla da las plazzas da lavur tar ils manaschis dal militar e cun concentrar las truppas sin las differentas plazzas d'armas. La regenza è s'exprimida l'ultim temp repetidamain per il Grischun sco lieu per l'armada, ella ha dentant er annunzià en cunvegnientscha cun las vischnancas ch'ils lieus che han actualmain ina infrastructura militara vegnian examinads.

La regenza vegn en quest connex supplitgada da prender posiziun tar las suandantas dumondas:

1. Tge finamiras a curta ed a lunga vista èn la basa da la politica da militar da la regenza?

2. Co giuditgescha la regenza la relaziun actuala tranter il chantun Grischun ed il chau dal DDPS/da l'armada areguard ina collavuraziun communabla cooperativa, e co sa laschass quella eventualmain meglierar?

3. Tge avantatg primar e secundar (resguardond las expensas directas ed indirectas) porta la preschientscha da las truppas annualmain al chantun ed a las vischnancas en il Grischun?

4. Exista da la vart da l'armada in concept d'utilisaziun a lunga vista che resguarda ils stabiliments dal militar en il chantun? Sche gea, co vesa quel ora e tge pussaivladads da cogestiun han il chantun e las vischnancas en quest connex?

5. Tge lieus cun infrastructura militara han tenor la regenza in avegnir en il Grischun e co prevesa ella da garantir u da realisar quels. En quest connex duai er vegnir mussà, sche l'idea discutabla, da dischlocar la plazza d'exercizi per las truppas da Cuira/Rossboden en in auter lieu dal chantun (p.ex. en Valragn), è realisabla dal puntg da vista militar e politic.

6. È la regenza pronta da far sforzs concrets per recumandar ad ura (gia oz) il Grischun sco lieu pussaivel per il sectur da novs geners da truppas, da novs commandos (commandos d'instrucziun u auters) u d'unitads administrativas militaras che pon vegnir manadas decentralmain?

Cuira, ils 14 da favrer 2007

Rathgeb, Sax, Menge, Bezzola (Zernez), Bondolfi, Casutt, Christoffel-Casty, Hartmann (Champfèr), Keller

Resposta da la regenza

La regenza respunda las dumondas sco suonda:

1. La regenza prenda posiziun per in'armada ferma e moderna che sto però avair sias ragischs en la populaziun, e quai sco organisaziun collianta da noss stadi federal. A medem temp emprova la regenza da cuntanscher las suandantas finamiras cun sia politica militara:
- Il manaschi da plazzas d'armas e da tir tras l'armada s'accorda cun ils interess da las vischnancas pertutgadas.
- Per las vischnancas da staziunament da plazzas d'armas e da tir resulta in niz per l'economia publica.
- Tar midadas da persunal e tar l'occupaziun da plazzas da cader resguarda l'armada, sche las candidatas e sch'ils candidats èn francads en la regiun.

2. La relaziun po vegnir caracterisada oz en general sco buna. A chaschun d'in discurs cun il cumandant da corp Christophe Keckeis il favrer passà è vegnida creada ina basa impurtanta per ina collavuraziun collectiva cun nominar ina gruppa da lavur che sa cumpona da represchentantas e da represchentants da la confederaziun, dal chantun e da las vischnancas pertutgadas. Questa gruppa da lavur accumpogna l'adattaziun dals concepts d'utilisaziun da la plazza d'armas e da tir da Cuira / Rossboden e da la plazza da tir da Valragn.

3. Las indicaziuns da l'armada qua sutvart sa refereschan a l'entir chantun, perquai ch'i na dat naginas retschertgas tenor vischnancas.

<> 

 

Gener d'expensas

 expensas 2006
en milliuns francs
(pajadas)		 expensas 2007
en milliuns francs
(prognosa)

salaris nets (senza indemnisaziun da las spesas) a lavurantas ed a lavurants dal DDPS cun lieu da servetsch en il chantun Grischun
 14.8 14.4

expensas dal DDPS mantegnair immobiglias en il chantun Grischun
 0.9 0.5

expensas dal DDPS per investiziuns en immobiglias en il chantun Grischun
 8.8 14.6

ulteriuras expensas en il chantun Grischun (contribu¬ziuns per energia, tschains da locaziun, surdada da lavurs a persunas, indemnisaziuns al chantun, a vischnancas, a persunas privatas)
 4.0 4.0

persunal militar en il chantun Grischun
(dis d'occupaziun 2006: 350'882 / prognosa 2007: 352'000)
Ø expensas per di d'occupaziun ca. 23.– francs
 8.0 8.1

expensas da las schuldadas e dals schuldads en sortida: emnas da servetsch
prestadas: 2006: 58'480 / 2007: 58'745 (stimaziun)
2 x sortida/ emna
Ø per sortida: 35.– francs (basa: retschertga tar recr.)
 4.0 4.1

total (arrundà)

 40 45

4. Il concept da staziunament da l'armada ch'è vegnì communitgà il fanadur 2005 definescha, tgenins lieus da staziunament che vegnan utilisads vinavant tras l'armada e tgenins che vegnan bandunads

Per ils lieus da staziunament che l'armada vul trair a niz er en il futur vegnan elavurads actualmain concepts d'utilisaziun regiunals, e quai en il senn d'in perfecziunament dal concept da staziunament. Il schef da l'armada è sa declerà pront d'examinar detagliada-main ils giavischs dal chantun e da las vischnancas, particularmain pertutgant il concept d'utilisaziun da Cuira ed il concept d'utilisaziun previs per Valragn. Per quest intent è ve-gnida nominada la gruppa da lavur ch'è vegnida menziunada sut la cifra 2. Igl è previs da reglar las eventualas differenzas tranter la confederaziun ed il chantun sco er tranter las vischnancas a chaschun d'ina ulteriura reuniun cun il schef da l'armada, sch'ellas na pon betg vegnir eliminadas da la gruppa da lavur. La reuniun vegn ad avair lieu anc avant las vacanzas da stad. Suenter han il chantun e las vischnancas l'occasiun da prender posiziun en il rom da l'adattaziun dal plan secturial "militar".

5. Da princip ha in avegnir ord vista da la regenza mintga plazza d'exercizi per las truppas, sch'ella vegn purtada da la populaziun da las vischnancas pertutgadas. Entaifer il chantun èsi pia en emprima lingia chaussa da las vischnancas da staziunament, sch'ina plazza d'exercizi per las truppas po vegnir mantegnida a vista pli lunga u sch'ina tala vegn eventualmain realisada da nov. Il chantun ha mo ina pitschna influenza sin quai. Quai vala er per in'eventuala dischlocaziun da la plazza d'exercizi per las truppas dal Rossboden en Valragn. Sch'ina tala dischlocaziun è imaginabla ord vista militara, na po la regenza betg respunder, perquai ch'i resultan ulteriuras midadas en l'armada cun il pass da svilup 08/11.

6. Gea, en moda ch'i sto vegnir renvià al fatg ch'il concept davart il staziunament da l'armada definescha, tge lieus da staziunament che vegnan duvrads ils proxims onns. La regenza è ultra da quai mo en il cas da far recumandaziuns en il senn previs, sch'ina vischnanca ha in interess da staziunar stabiliments militars ed infrastructuras militaras.

7 da matg 2007