Navigation

Inhaltsbereich

Dumonda Geisseler concernent la stgaudada dal clima e sias implicaziuns per il chantun Grischun

Sessiun: 18.04.2007
"La smanatscha tras la stgaudada dal clima vegn pli e pli concreta", sa clamavan quest mais las lingias grossas d'ina gronda gasetta svizra dal di. La raschun per quest titel è stà il nov rapport da l'ONU davart il clima; quest rapport sa fatschenta cun las consequenzas da la stgaudada globala. La debatta davart la midada dal clima ha pia ina virulenza enorma. In tema che na fatschenta betg mo la politica, mabain er tut nossa societad globala. Ina tema che chaschuna temas e gronda malsegirezza. La politica da clima vegn ad esser orientada vers l'avegnir ed ha gia oz ina gronda impurtanza. Tant sin plaun global sco er sin plaun naziunal vegnan uschia examinadas e discutadas mesiras per reducir la svapur da CO2.
La midada dal clima è in fenomen mundial. Tuttina tutgan sias consequenzas las regiuns da quest mund en moda fitg differenta. Noss interess spezial sa drizza sin las consequenzas, sin las ristgas, ma er sin eventualas schanzas e pussaivladads che resultan da la midada dal clima per il chantun Grischun. En il context da la stgaudada globala discuta l'economia adina da schanzas e da ristgas per il turissem. Pervia da questa debatta ch'è franc ina debatta impurtanta è l'economia dentant periclitada da perder or dals egls las consequenzas che la midada dal clima po avair sin l'infrastructura e sin il provediment da basa.

Perquai resultan las suandantas dumondas a la regenza:
1. S'occupa la regenza er da la dumonda, quant enavant che infrastructuras e ch'il provediment da basa èn pertutgads da la stgaudada dal clima?
2. Sche gea, examinescha la regenza mesiras da gener preventiv?
3. Co giuditgescha la regenza en general las ristgas da la midada dal clima per il chantun Grischun?

Cuira, ils 18 d'avrigl 2007

Name: Geisseler, Meyer-Grass (Claustra), Augustin, Bachmann, Barandun, Berni, Berther (Mustér), Bezzola (Samedan), Blumenthal, Bondolfi, Brandenburger, Brantschen, Bucher-Brini, Buchli, Bundi, Caduff, Cahannes, Cavigelli, Christoffel-Casty, Clavadetscher, Conrad, Darms-Landolt, Dermont, Donatsch, Farrér, Fasani, Federspiel, Feltscher, Hanimann, Hardegger, Hartmann (Cuira), Keller, Kleis-Kümin, Kollegger, Krättli-Lori, Kunz, Loepfe, Märchy-Michel, Möhr, Niederer, Parolini, Parpan, Peer, Perl, Pfäffli, Pfenninger, Pfiffner-Bearth, Pfister, Portner, Quinter, Rathgeb, Ritzi, Sax, Stiffler, Stoffel, Tenchio, Thomann, Thöny, Vetsch (Pragg-Jenaz), Zanetti, Candinas (Mustér), Locher Benguerel, Mainetti

Session: 18.04.2007
Vorstoss: rg Anfrage


Resposta da la regenza

La problematica da la stgaudada dal clima è ina realitad che na sa ferma er betg davant ils cunfins da noss chantun. Sin basa da quai che las temperaturas creschan sin l'entir mund e sin basa da las experientschas ch'èn vegnidas fatgas en quest connex ils ultims onns, pon ins partir dal fatg ch'il dumber da precipitaziuns extremas e da periodas da sitgira intensiva vegnia a s'augmentar cun gronda probabilitad. Quest svilup vegn confermà er tras differents models dal clima.

Tar las singulas dumondas:
1. In'analisa generala e cunzunt ils eveniments dals ultims onns mussan ch'i vegn probablamain a dar midadas considerablas cun consequenzas directas er per il Grischun pervia da la stgaudada dal clima. Per quest motiv vegn questa tematica er ad esser in element da las finamiras da la regenza 2009 2012. La regenza ha ultra da quai incumbensà l'uffizi forestal dal Grischun da skizzar eventualas consequenzas da la stgaudada dal clima per la situaziun dals privels da la natira en il Grischun. Per ils secturs da las schanzas e da las ristgas, dal manaschament da las ristgas e dal diever da las resursas sto il basegn d'agir en il chantun vegnir sclerì svelt.

2. Gia oz vegnan observads, mesirads e registrads en il chantun differents eveniments, e quai cun la finamira da focusar questas activitads per constatar a temp midadas relevantas. Ultra da quai ha la regenza l'intenziun d'introducir gia a curta vista in monitoring da l'ambient. Ils scleriments e las preparaziuns en chaussa vegnan actualmain elavurads e duain mussar il basegn d'agir resp. la necessitad d'ulteriuras mesiras.

3. Las ristgas che vegnan chaschunadas tras il fatg che auras extremas daventan pli probablas èn fitg grondas per l'infrastructura (abitadis, vias da traffic, provediment) d'in chantun muntagnard sco il Grischun e s'augmentan en vista a la midada dal clima. Spustaments tar ils privels da la natira vegnan a sa far valair en vista al territori ed al temp. Uschia pon s'augmentar tant la frequenza sco er la fermezza d'urizis locals e da precipitaziuns. I vegn pia a dar pli savens eveniments d'aua gronda che vegnan ad esser pussaivels tant la fin da l'atun sco er la fin da l'enviern. Eventuals effects pervia dals glatschers che lieuan, en cumbinaziun cun precipitaziuns pli e pli fermas, ma er cun lungas periodas sitgas, dastgassan avair consequenzas massivas er per il chantun Grischun.

Datum: 29 da zercladur 2007