Dumonda urgenta Thöny concernent la planisaziun d'in ulteriur implant da stgaudament da biomassa a Domat
Sessiun: 11.06.2007
Dapi il schaner 2006 maina la Tegra SA in implant da stgaudament da biomassa a Domat che duai vegnir engrondì anc pli fitg en ina terza etappa. Uschia daventa l'implant da stgaudament da biomassa da la Tegra il pli grond da la Svizra. Ina dumonda decisiva per manar in implant da stgaudament da biomassa en moda raschunaivla or dal puntg da vista economic ed ecologic è la segirezza ch'el vegnia provedì cun avunda laina d'energia che deriva da la regiun.
Il furnitur il pli impurtant da laina d'energia che deriva da la regiun sto senza dubi esser la resgia gronda da la Stallinger SA che sa chatta da l'autra vart da la via. En mintga cas era quai in dals aspects centrals che ha pledà per ina domiciliaziun da la firma Stallinger a ses lieu actual.
Ussa planisescha la firma Stallinger da construir in agen implant da stgaudament da biomassa a Domat (publicaziun da la permissiun da construcziun dal 1. da zercladur 2007).
En quest connex resultan las suandantas dumondas:
Logistica per procurar la laina d'energia:
- Avess la Tegra capacitads avunda per arder tut la laina d'energia che deriva da la firma Stallinger a Domat?
- Resp. producescha la firma Stallinger schizunt avunda laina d'energia a Domat per pudair proveder tant la Tegra sco er in agen implant da stgaudament da biomassa cun material da basa?
- Sche na, quant material stuess vegnir transportà nà en tut per quests dus implants da stgaudament da biomassa e danunder derivass questa laina d'energia supplementara?
- Cun quants transports supplementars da laina d'energia resp. da rument che vegnan fatgs cun camiuns e/u cun la viafier ston ins far quint, sch'in ulteriur implant da stgaudament da biomassa vegniss construì a Domat?
- Co giuditgescha la regenza la grevezza per la Val dal Rain grischuna e per la vischnanca da Domat che vegn chaschunada da quest transports da laina supplementars?
Contaminaziun da l'aria:
- Cun tge contaminaziuns supplementaras da pulvra da lain, da pulvra fina e d'ulteriuras immissiuns stuess ins far quint?
- Sch'i vegn giuditgada la cumpatibilitad ecologica d'in implant, vegn mintgamai giuditgà mo l'implant singul u vegn fatga ina bilantscha generala per la vischnanca da staziunament, per las vischnancas vischinas, per la Val dal Rain grischuna e per la Tumleastga?
Questa dumonda è urgenta, perquai che la procedura per la permissiun da construcziun dura fin la fin da zercladur 2007. Nus supplitgain la conferenza da las presidentas e dals presidents sco er il cussegl grond da declerar questa dumonda sco urgenta.
Cuira, ils 11 da zercladur 2007
Name: Thöny, Peyer, Gartmann-Albin, Arquint, Baselgia-Brunner, Bucher-Brini, Frigg-Walt, Jaag, Jäger, Menge, Meyer Persili (Cuira), Pfenninger, Pfiffner-Bearth, Trepp
Session: 11.06.2007
Vorstoss: rg Anfrage
Resposta da la regenza
Da princip èsi raschunaivel tant dal puntg da vista ecologic sco er economic d'utilisar l'energia da laina en implants da stgaudament da biomassa (ISBM). Er il plan d'acziun cunter la pulvra fina da la confederaziun ha l'intent d'utilisar pli fitg l'energia da laina en implants gronds. Il plan da mesiras per l'igiena da l'aria actualisà, ch'è vegnì concludì da la regenza ils 15 da matg 2007, prevesa en quai che reguarda las emissiuns dad ISBM limitas severas tenor il stadi da la tecnica. Ils implants ch'èn gia en funcziun correspundan a questas pretensiuns. Per projects concernent transports da products da massa prevesa il plan da mesiras da cuntanscher che quels stoppian sche pussaivel vegnir transferids sin la viafier. L'infrastructura per quai fiss avant maun a Domat. Sch'il ISBM supplementar observa las prescripziuns correspundentas areguard la protecziun da l'ambient, vegn controllà en il rom da l'examinaziun ecologica.
Las respostas a las dumondas:
1. Dal manaschi da la resgia gronda da la Stallinger Swiss Timber SA duain resultar a partir da l'onn 2009 ca. 135'000 t restanzas da lain per onn (ca. 119'000 t scorsa e ca. 16'000 t ziplas ed astellas). Quellas duain vegnir utilisadas sco material dad arder (laina d'energia). En ils ISBM da la Tegra SA pon vegnir ars per onn ca. 140'000 t restanzas da lain da la resgia (bloc 2: 75'000 t restanzas da lain dal guaud e 50'000 t restanzas da lain da la resgia; planisà per il bloc 3: 35'000 t restanzas da lain dal guaud e 90'000 t restanzas da lain da la resgia). La firma Tegra avess pia capacitads avunda per arder tut la laina d'energia che deriva da la firma Stallinger.
2. Tar la firma Stallinger na resulta betg laina d'energia avunda per furnir material dad arder per in agen ISBM sco er per ils blocs 2 e 3 da la firma Tegra. Il ISBM planisà da la firma Stallinger basegna 90'000 t per onn per ses manaschi. Questa quantitad mancass a la firma Tegra, perquai ch'ella ha fatg quint che la firma Stallinger furneschia ad ella 90'000 t lain da la resgia e scorsa.
3. En tut stuess la firma Tegra transportar nà 90'000 t combustibels da laina. La firma Tegra fa quint dad arder restanzas da bostgs tagliads che resultan da l'utilisaziun da la laina e da la tgira dal guaud. Questas restanzas duain derivar per gronda part dals chantuns Grischun, Son Gagl e Turgovia.
4. Perquai ch'i resultan avunda scorsa, ziplas ed astellas dal manaschi da la resgia, na chaschuna il manaschi d'in ulteriur ISBM tras la firma Stallinger directamain nagins transports supplementars. En moda indirecta vegnan dentant bain chaschunads transports supplementars, perquai che la firma Tegra sto remplazzar per pudair far ir ses bloc 3 las furniziuns da laina d'energia da la firma Stallinger che crodan davent. Supponind il cas disfavuraivel ch'il material dad arder mancant vegniss transportà mintgamai per la mesadad sin via e cun la viafier, vegnissan fatgs otg viadis supplementars da camiuns per di. Tras quests viadis creschiss il traffic pesant sin la A13 per 3 promils.
5. Igl è previs d'integrar en la permissiun da manaschi dal bloc 3 dal ISBM da la firma Tegra la cundiziun da far cun la viafier ina tscherta part dals transports ch'èn necessaris per il manaschi dal bloc 3. Pervia da quests transports da viafier na ston ins strusch far quint cun immissiuns supplementaras. Ils otg viadis supplementars da camiuns per di na chaschunassan nagins surpassaments da limitas e naginas violaziuns da prescripziuns legalas.
6. Cun prescripziuns pli severas concernent las emissiuns, en spezial per la pulvra fina, vegnan preventivamain limitadas las emissiuns dals ISBM uschè fitg sco che quai è tecnicamain pussaivel. Sa referind al perimeter en dumonda (vischnancas da Domat, da Favugn e da Tumein) importan las emissiuns supplementaras dal ISBM da la firma Stallinger 4 % tar la pulvra fina e 12 % tar ils oxids da nitrogen. Il manaschi dal ISBM na chaschuna nagins surpassaments da las limitas d'immissiun da l'ordinaziun per mantegnair l'aria pura.
7. L'examinaziun da la cumpatibilitad ecologica pertutga sulettamain il project ch'è suttamess a la procedura da permissiun respectiva. En la procedura per la permissiun da construcziun per il ISBM da la firma Stallinger vegnan las emissiuns e las immissiuns dals ISBM da la firma Tegra ch'èn gia permess sco er autras funtaunas da substanzas nuschaivlas pia la situaziun da partenza resguardadas sco contaminaziun ch'exista gia. Ina prognosa d'immissiuns per tut ils implants en la regiun da Domat che l'UNA ha laschà far, garantescha che questa problematica vegnia considerada en moda cumplessiva.
Datum: 31 d'avust 2007