Navigation

Inhaltsbereich

Incumbensa Candinas concernent il sustegn da futuras sessiuns chantunalas da giuvenils

Sessiun: 12.06.2007
Sessiun da giuvenils GR.07 sut quest titel han organisà las quatter partidas giuvnas da noss chantun (giuvna PCD, giuvna partida liberaldemocrata, GS e giuvna PPS) ensemen ils 12/13 da matg 2007 l'emprima sessiun chantunala da giuvenils en l'edifizi dal cussegl grond a Cuira. Circa 100 giuvnas e giuvens fitg motivads e fitg engaschads da tuttas trais regiuns linguisticas èn sa participads a la sessiun da giuvenils GR.07. Tschintg da las set petiziuns ch'èn vegnidas elavuradas èn vegnidas assegnadas a la regenza. Er las deputadas ed ils deputads han survegnì questas petiziuns davart ils temas "giuventetgna en la politica", "Grischun lieu da furmaziun", "Grischun lieu da lavur", "service public" sco er " Grischun turissem ed ambient" per posta.

Cun la petiziun davart il tema "giuventetgna en la politica" han ils giuvenils pretendì tranter auter: "Ulteriuras sessiuns da giuvenils: Ils giuvenils duain survegnir la pussaivladad d'organisar mintga trais onns ina sessiun dals giuvenils. Il chantun sustegna quai."

Il chantun sto avair in grond interess da promover l'interess dals giuvenils per la politica. Cun la sessiun chantunala da giuvenils po el porscher als giuvenils ina plattafurma per discussiuns e per cuntraversas politicas davart temas chantunals. Ils giuvenils pon avair in contact direct cun la politica e vegnir motivads uschia da prender part activamain a la vita politica e sociala.

La regenza vegn perquai envidada d'integrar mintga trais onns (la proxima giada l'onn 2010) in sustegn da 30'000 francs en il preventiv dal chantun. La premissa per il pajament da questa contribuziun duai esser che las partidas giuvnas fundeschian ensemen in'uniun ch'è responsabla per organisar las futuras sessiuns chantunalas da giuvenils u ch'ellas sa reuneschian mintgamai ad in comité d'organisaziun. Per che quest sustegn possia vegnir pajà duain esser almain trais partidas giuvnas commembras da l'uniun u dal comité d'organisaziun. Plinavant duai il chantun metter a disposiziun l'infrastructura sco er il servetsch da translaziuns en ina dimensiun raschunaivla, sco che quai è stà il cas quest onn.

Cuira, ils 12 da zercladur 2007

Name: Candinas, Giovanoli, Kunz (Cuira), Arquint, Augustin, Bachmann, Baselgia-Brunner, Berni, Berther (Mustèr), Berther (Sedrun), Blumenthal, Bondolfi, Brandenburger, Brüesch, Bucher-Brini, Buchli, Bundi, Caduff, Cahannes Renggli, Campell, Casparis-Nigg, Casty, Casutt, Caviezel (Pitasch), Caviezel-Sutter (Tusaun), Cavigelli, Christoffel-Casty, Claus, Clavadetscher, Conrad, Darms-Landolt, Dermont, Fallet, Farrér, Felix, Feltscher, Florin-Caluori, Frigg-Walt, Gartmann-Albin, Geisseler, Hanimann, Hartmann (Cuira), Hartmann (Champfèr), Hasler, Jaag, Jäger, Keller, Kessler, Kleis-Kümin, Koch, Kollegger, Loepfe, Märchy-Michel, Marti, Menge, Mengotti, Meyer Persili (Cuira), Meyer-Grass (Claustra), Nick, Niederer, Noi-Togni, Parolini, Parpan, Perl, Peyer, Pfäffli, Pfenninger, Pfiffner-Bearth, Pfister, Plozza, Portner, Quinter, Rathgeb, Righetti, Rizzi, Sax, Stiffler, Tenchio, Thomann, Thöny, Thurner-Steier, Toschini, Trepp, Troncana-Sauer, Tuor, Valär, Vetsch (Pragg-Jenaz), Wettstein, Zanetti, Hauser, Jecklin-Jegen, Joos, Just, Kunz (Fläsch)

Session: 12.06.2007
Vorstoss: rg Auftrag


Resposta da la regenza

Ils 12/13 da matg 2007 han organisà quatter partidas giuvnas da noss chantun (giuvna PCD, giuvens liberals, giuvens socialdemocrats e giuvna PPS) ensemen l'emprima sessiun da giuvenils GR.07. A questa sessiun han participà circa 100 giuvenils da tut las regiuns dal chantun Grischun. Il chantun ha sustegnì questa occurrenza cun ina contribuziun en furma d'ina garanzia da deficit da 5'000. francs e cun metter a disposiziun gratuitamain l'edifizi dal cussegl grond sco er il servetsch da translaziuns dal chantun. Ils custs da l'occurrenza eran budgetads cun circa 50'000. francs.

En ina petiziun ch'è vegnida deliberada per mauns da la regenza a chaschun da la sessiun da giuvenils dumondan ils giuvenils, sch'il chantun sustegnia la realisaziun d'ina sessiun da giuvenils en in turnus da trais onns. Sin basa da quai vegn la regenza supplitgada concretamain tras l'incumbensa qua avant maun d'integrar mintga trais onns (la proxima giada l'onn 2010) in sustegn da 30'000. francs en il preventiv dal chantun.

La regenza considerescha che las finamiras che vegnan aspiradas cun il project da la sessiun da giuvenils, numnadamain da metter a disposiziun ina plattafurma per discussiuns politicas davart temas chantunals e da motivar ils giuvenils da prender part activamain a la vita politica e sociala, sajan raschunaivlas. La sessiun da giuvenils è ina buna pussaivladad per promover l'interess politic dals giuvenils. Il sustegn da quest project è evidentamain d'in interess public. Per realisaziuns futuras da la sessiun da giuvenils è la regenza perquai pronta da prevair mintga trais onns, per l'emprima giada l'onn 2010, 30'000. francs en il preventiv dal chantun. Ultra da quai duai vegnir mess a disposiziun gratuitamain er en il futur l'infrastructura architectonica (edifizi dal cussegl grond) ed il servetsch da translaziuns dal chantun. La premissa per il pajament da quest sustegn e per las ulteriuras prestaziuns dal chantun duai esser che almain trais partidas giuvnas fundeschian in'uniun ch'è responsabla per organisar las futuras sessiuns da giuvenils u ch'ellas sa reuneschian mintgamai ad in comité d'organisaziun. Sco tar l'emprima sessiun na vegn il chantun er en il futur betg a sa preschentar sco conpurtader da l'occurrenza. La responsabladad per la realisaziun sa chatta dal puntg da vista da l'organisaziun e dal cuntegn sulettamain tar l'instituziun da las partidas giuvnas che organisescha la sessiun.

Tenor las explicaziuns è la regenza pronta d'acceptar l'incumbensa en il senn da questas ponderaziuns.

Datum: 7 da settember 2007