Navigation

Inhaltsbereich

Incumbensa Meyer Persili concernent la revisiun da la lescha ils dis da paus publics (DG 520.100)

Sessiun: 13.06.2007

La lescha chantunala davart ils dis da paus publics è vegnida revedida totalmain l'ultima giada l'onn 1985. Gia tar quella revisiun sa tractavi cunzunt d'adattar la lescha, ch'era vegnida relaschada l'onn 1918, a cundiziuns midadas ed a novs basegns. La lescha era cleramain antiquada.

Dapi lura èn puspè passads passa 20 onns ed ils basegns sco er las circumstanzas da la societad èn per part puspè dal tuttafatg auters. Differentas disposiziuns duessan perquai puspè vegnir repassadas ed adattadas a las cundiziuns dad oz.

Tenor la lescha vertenta na dastgassan per exempel ils kinos atgnamain mussar nagins films a Tschuncaisma u durant auters auts firads. Differentas vischnancas, tranter quellas er la citad da Cuira, han ussa dentant chattà in tric giuridic per tuttina pudair dar ina permissiun correspundenta a las gestiunarias ed als gestiunaris dals kinos.

Tenor l'art. 5 al. 1 lit. a da la lescha davart ils dis da paus publics dal chantun Son Gagl èn permessas occurrenzas en locals serrads durant ils auts firads, sch'i n'è betg pussaivel che dapli che 500 persunas sa participeschan il medem mument a questas occurrenzas. Ina tala soluziun fiss er tar nus confurma al temp e na disturbass insumma betg la recreaziun ed il paus durant in aut firà. Plinavant pari ch'i na saja strusch pli confurm al temp, sche per exempel il carussel sto restar serrà a Cuira mintga onn a Tschuncaisma. Quest parc da divertiment a la Obere Au è lunsch davent da chasas d'abitar e da baselgias. Sch'il manaschi fiss avert a Tschuncaisma, na fiss quai segir betg in disturbi.

Ultra da quai cuntegna l'art. 4 al. 1 da la lescha grischuna davart ils dis da paus publics differentas activitads ch'èn scumandadas durant ils dis da paus publics. Ina circumscripziun generala en quel senn che activitads e che occurrenzas, las qualas disturban sproporziunadamain il paus e la recreaziun, sajan scumandadas, bastass senza dubi en quest connex.

La regenza vegn envidada da suttametter la lescha davart ils dis da paus publics ad ina revisiun parziala u totala. En quest connex sto da princip vegnir controllà, sch'ins pudess sa restrenscher en la lescha chantunala davart ils dis da paus publics a las regulaziuns ed a las circumscripziuns ch'èn absolutamain necessarias e surlaschar a las vischnancas l'ulteriura cumpetenza da permetter excepziuns dals scumonds d'occurrenzas durant ils dis da paus publics e durant ils auts firads, sco che quai è er il cas en auters chantuns. Gist en noss chantun cun centers turistics impurtants duessan tut las vischnancas pudair avair ina tscherta flexibilitad tar la permissiun d'occurrenzas durant ils dis da paus publics e durant ils auts firads.

Cuira, ils 13 da fanadur 2007

Name: Meyer Persili (Cuira), Claus, Brandenburger, Arquint, Barandun, Baselgia-Brunner, Bucher-Brini, Caduff, Casutt, Clavadetscher, Conrad, Feltscher, Frigg-Walt, Gartmann-Albin, Hanimann, Hartmann (Cuira), Jaag, Jäger, Jenny, Keller, Kessler, Koch, Kollegger, Loepfe, Menge, Mengotti, Meyer-Grass (Claustra), Michel, Noi-Togni, Perl, Peyer, Pfäffli, Pfenninger, Pfiffner-Bearth, Rathgeb, Righetti, Rizzi, Toschini, Trepp, Troncana-Sauer, Vetsch (Pragg-Jenaz), Wettstein, Pedrini (Soazza), Joos

Session: 13.06.2007
Vorstoss: rg Auftrag



Resposta da la regenza

La lescha vertenta davart ils dis da paus publics datescha oriundamain da l'onn 1918 ed è vegnida revedida totalmain l'ultima giada l'onn 1985.

La lescha davart ils dis da paus publics ha l'intent da proteger il paus e la dignitad durant ils dis da paus publics sco er da tegnair quint dals sentiments religius da mintga singula burgaisa e da mintga singul burgais. En la lescha vegni differenzià tranter dis da paus publics e tranter auts firads. Sco dis da paus publics valan las dumengias ed ils firads religius che na tutgan betg sin dumengias; il Venderdi sontg, la dumengia da Pasca, la dumengia da Tschuncaisma, il di da la rogaziun federala ed il di da Nadal vegnan designads en quest connex sco auts firads. Durant quests dis menziunads èn tenor la lescha scumandadas differentas activitads che vegnan enumeradas ina ad ina, perquai ch'ellas cuntrastassan a la protecziun dal paus public. Ultra da quai èn scumandadas occurrenzas da different gener durant ils auts firads. La finala cuntegna la lescha dentant er in catalog d'excepziuns che permetta excepziunalmain differentas lavurs er durant ils dis da paus publics.

Cun lur giavisch vulan las incumbensadras ed ils incumbensaders en emprima lingia liberalisar la lescha davart ils dis da paus publics, perquai che differentas regulaziuns en la lescha na vegnan betg pli consideradas sco confurmas al temp. Sco las incumbensadras ed ils incumbensaders è er la regenza da l'avis che la lescha vertenta davart ils dis da paus publics na satisfetschia senza dubi betg pli en mintga punct a la moda da viver ed al cumportament da temp liber d'ozendi e ch'ella stoppia pia vegnir repassada en il rom d'ina revisiun. Nua che ni il paus e l'urden ni sentiments religius vegnan periclitads u disturbads, èsi tuttavia giustifitgà da schluccar scumonds d'occurrenzas e d'activitads er durant ils dis da paus publics e durant ils auts firads. En quest connex stoi dentant vegnir tegnì quint er vinavant commensuradamain da l'intent primar da la lescha davart ils dis da paus publics, numnadamain da proteger il paus public durant ils dis da paus publics.

Sco resumaziun menziunescha la regenza ch'ella sustegnia ina revisiun da la lescha chantunala davart ils dis da paus publics e ch'ella saja pronta d'acceptar l'incumbensa en il senn da las consideraziuns.

Datum: 30 d'avust 2007