Navigation

Inhaltsbereich

Incumbensa Hanimann concernent il futur da las scolas medias professiunalas cun attestat da maturitad spezialisada en connex cun la revisiun da la legislaziun da scola media

Sessiun: 13.06.2007
Igl è enconuschent ch'ins ha cumenzà cun la revisiun da la lescha davart las scolas medias e che quella vegn bainbaud suttamessa al parlament.

En quest connex na ston betg mo vegnir discutadas las dumondas davart la scolaziun gimnasiala, mabain er la tematica da la scolaziun en scolas medias professiunalas e da las purschidas da scolaziun che sa basan sin talas. Tenor l'art. 7bis da la lescha davart las scolas medias vegn definida la finamira da l'uschenumnada scola media da diplom. En quest connex po la regenza reglar l'acquisiziun da la maturitad da la scola auta professiunala.
Actualmain regna ina tschert
a malsegirezza co che la maturitad da la scola auta professiunala po vegnir cuntanschida en noss chantun. La consequenza da quai è che l'attractivitad da questa purschida da scolaziun va a perder. Uschia èsi enconuschent en general ch'ina scolaziun gimnasiala maina sur la maturitad ad ina scola auta universitara e che la via da la scola media professiunala maina sur la maturitad professiunala a la scola auta professiunala. Tge pussaivladads ch'ins ha, sch'ins terminescha cun success la scola media da diplom resp. la scola media professiunala n'è dentant betg cler, perquai che concepziuns correspundentas mancan. Quai degradescha correspundentamain la maturitad spezialisada. Auters chantuns han reglà cleramain la purschida da lur scola media professiunala.

Pervia da quai ston er vegnir integradas ponderaziuns concepziunalas correspundentas en la revisiun.
Per quests motivs incumbenseschan las sutsegnadas ed ils sutsegnads la regenza da preschentar al cussegl grond in concept per l'acquisiziun da la maturitad da la scola auta professiunala en ils secturs da las professiuns socialas e pedagogicas sco er da las professiuns medicinalas auxiliaras. Quest concept resguarda las explicaziuns e las directivas da la CDEP e garantescha uschia che questa purschida da furmaziun correspunda als basegns actuals. La tematica da la maturitad spezialisada sto alura vegnir integrada en la revisiun da la lescha davart las scolas medias en il chantun Grischun.

Cuira, ils 13 da zercladur 2007

Name: Hanimann, Berther (Mustér), Mani-Heldstab, Arquint, Augustin, Bischoff, Blumenthal, Bundi, Caduff, Casparis-Nigg, Casutt, Caviezel (Pitasch), Clavadetscher, Darms-Landolt, Geisseler, Hartmann (Cuira), Hartmann (Champfèr), Kessler, Kleis-Kümin, Kunz (Cuira), Marti, Mengotti, Meyer-Grass (Claustra), Nick, Niederer, Parpan, Perl, Pfäffli, Pfister, Portner, Ragettli, Rathgeb, Rizzi, Sax, Thomann, Troncana-Sauer, Kunz (Fläsch), Joos, Hauser

Session: 13.06.2007
Vorstoss: rg Auftrag


Resposta da la regenza

En las explicaziuns davart l'incumbensa vegni punctuà che auters chantuns hajan cuntrari al chantun Grischun reglà cleramain la purschida da lur scolas medias professiunalas. Questa deposiziun sto vegnir relativada. En quest connex sa basa la regenza sin il bulletin dal fanadur 2007 da la conferenza svizra da las directuras e dals directurs chantunals da l'educaziun publica (CDEP). Sut il tema central "scolas medias professiunalas en Svizra: situaziun actuala e perspectivas da svilup" infurmescha quest bulletin tranter auter davart la situaziun da las lavurs da realisaziun en tut la Svizra. Tenor questa contribuziun appartegna il Grischun tar quels 16 chantuns, dals quals ils certificats d'ina scola media professiunala vegnan renconuschids da la CDEP sco valaivels per tut la Svizra e che han in concept da scolaziun correspundent. In purtret dal tuttafatg auter sa preschenta en Svizra en connex cun la maturitad spezialisada che sto s'orientar vi da profils prescrits. Tenor las explicaziuns en il bulletin da la CDEP menziunà qua survart ha actualmain mo il chantun Genevra ina renconuschientscha naziunala da sia maturitad spezialisada per ils profils da scolaziun "sanadad", "lavur sociala" ed "art". Per titularas e per titulars d'in certificat d'ina scola media professiunala datti en Svizra dentant la difficultad ch'ellas e ch'els sa vesan confruntads cun situaziuns differentas en reguard a las prestaziuns supplementaras ch'ellas e ch'els ston furnir, tut tenor il chantun e tut tenor la scola auta professiunala resp. tut tenor il studi en ina scola auta professiunala; er sch'ellas e sch'els adempleschan las pretensiuns en il sectur da las prestaziuns supplementaras, saja quai en in chantun u saja quai areguard las pretensiuns d'in studi, n'han ellas ed els nagina garanzia da pudair entrar senza examen d'admissiun en ina scola auta professiunala d'in auter chantun resp. da cumenzar cun in studi en in auter chantun.

Resguardond la situaziun en Svizra cun las intschertezzas menziunadas qua survart e sa basond sin la posiziun da la regenza ha l'uffizi per la furmaziun media-superiura infurmà las direcziuns da las scolas medias en il Grischun per mauns da las persunas cun la pussanza dals geniturs sco er per mauns da las scolaras e dals scolars en quai che concerna las maturitads spezialisadas sco suonda:

Il Grischun renunzia per il mument ad ina maturitad spezialisada en pedagogia. Actualmain ston ins far quint che la maturitad spezialisada en pedagogia na garanteschia betg il dretg d'access a tut las scolas autas da pedagogia (SAP). Partind da questa situaziun vegni recumandà a las interessentas ed als interessents da s'infurmar ad ura davart las cundiziuns d'admissiun da quel chantun, en il qual ellas ed els vulan frequentar la SAP. Per il chantun Grischun vul quai dir ch'il curs preliminar d'in onn a la scola media evangelica da Schiers stoppia vegnir frequentà cun success per pudair cumenzar cun la scolaziun per la persuna d'instrucziun da la scola primara.
Concernent la maturitad spezialisada en lavur sociala datti la suandanta regulaziun transitorica fin il favrer 2010: scolaras e scolars cun maturitad spezialisada pon far il studi en lavur sociala, en pedagogia sociala u en animaziun socioculturala, sch'ellas e sch'els han fatg il diplom da la scola media professiunala ed han in'experientscha professiunala d'almain 40 emnas. Da quellas ston almain dudesch emnas vegnir absolvidas sco praticum preliminar qualifitgà tar in'organisaziun da lavur sociala. Il chantun Grischun ha fatg cunvegnas d'admissiun cun las scolas autas professiunalas per lavur sociala da Turitg e da Son Gagl.

Concernent la maturitad spezialisada en sanadad exista l'intenziun ch'ina unica scola media duai porscher la maturitad spezialisada en sanadad per tut il chantun, e quai en collavuraziun cun il center da furmaziun per la sanadad ed ils fatgs socials (CSS). Ina coordinaziun centrala en il sectur da las scolaziuns da sanadad è necessaria pervia dal dumber limità da plazzas da praticum, pervia da las refurmas ch'èn vegnidas implementadas en la scolaziun da sanadad e per garantir ch'ils diploms vegnian renconuschids da la confederaziun.

Questas explicaziuns mussan ch'il chantun concepescha e sviluppescha vinavant activamain la scolaziun en las scolas medias professiunalas dal Grischun, e quai resguardond la situaziun en tut la Svizra ed a favur da las persunas che vegnan scoladas. La regenza propona al cussegl grond da refusar questa incumbensa.

Datum: 7 da settember 2007