Navigation

Inhaltsbereich

Dumonda Thomann concernent l'amplificaziun da la via dal Güglia e concernent il sviament dals vitgs dal Surses

Sessiun: 14.06.2007
Ils ultims onns è la via dal Güglia cun excepziun d'in pèr paucs trajects vegnida amplifitgada fitg bain. Questa amplificaziun è da gronda impurtanza per il Surses ed er per l'Engiadina. Per quai essan nus engraziaivels al chantun e sperain ch'ils ultims trajects, sco p.ex. tal da las "Bovas da Rona" vegnian cumplettads ed oravant tut che las stretgas a Mulegns ed a Beiva vegnian eliminadas. Perquai che la via è daventada meglra grazia a las amplificaziuns è er s'augmentà il traffic, en spezial il traffic pesant. Perquai ch'il traffic passa en il Surses tras tut ils vitgs per lung da l'axa dal Güglia, patescha la populaziun da sias consequenzas. Ultra da quai ha il traffic da transit effects negativs per il turissem, en spezial a Savognin ed a Beiva.
Cun questa dumonda vulessan nus render attent la regenza a la problematica dal traffic en connex cun il transit dals vitgs en il Surses. Uschespert che Silvaplauna ha ses sviament, èn ils vitgs dal Surses ils unics che n'han betg anc in sviament. Pertutgadas èn las vischnancas da Cunter, da Savognin, da Tinizong-Rona, da Mulegns, da Sour e da Beiva. Tut quests sviaments èn previs èn il plan directiv chantunal. Nus supplitgain la regenza da respunder las suandantas dumondas:

1. Co giuditgescha la regenza la capacitad da la via dal Güglia en quai che concerna il transit dals vitgs?

2. Èn avant maun projects concrets per sviaments en il Surses e co vesa or il plan da termins?

3. Co ha il chantun l'intenziun da reagir a curta ed a media vista sin las consequenzas che vegnan chaschunadas da l'augment dal traffic sin la via dal Güglia e che pertutgan tant la populaziun sco er las participantas ed ils participants dal traffic?

4. Sche la via dal Güglia vegniss classifitgada sco via naziunala, tge sa midass areguard l'amplificaziun?

Cuira, ils 14 da zercladur 2007

Name: Thomann, Thurner-Steier, Buchli, Augustin, Bachmann, Barandun, Berther (Sedrun), Bezzola (Zernez), Bischoff, Bleiker, Blumenthal, Bondolfi, Brantschen, Brüesch, Caduff, Campel, Casparis-Nigg, Castelberg-Fleischhauer, Casty, Casutt, Caviezel (Pitasch), Clavadetscher, Dermont, Fallet, Farrér, Feltscher, Florin-Caluori, Geisseler, Hanimann, Hartmann (Champfèr), Hasler, Jeker, Jenny, Keller, Kessler, Kleis-Kümin, Kunz (Cuira), Marti, Menge, Mengotti, Meyer-Grass (Claustra), Michel, Montalta, Nick, Parpan, Perl, Pfäffli, Plozza, Portner, Quinter, Rathgeb, Rizzi, Sax, Stiffler, Stoffel, Tenchio, Toschini, Troncana-Sauer, Vetsch, Wettstein, Just, Kunz (Fläsch), Hauser, Joos, Pedrini (Soazza)

Session: 14.06.2007
Vorstoss: rg Anfrage



Resposta da la regenza

La regenza è conscienta da la situaziun da traffic e da las consequenzas che resultan da quai per la populaziun en il Surses, cunzunt en connex cun il transit tras ils vitgs. Per augmentar la segirezza da las abitantas e dals abitants èn er vegnids elavurads e realisads en ils ultims onns divers projects per schlargiar ils trajects entaifer il vitg. Pervia dad objecziuns localas n'ha l'intenziun dal chantun da meglierar la situaziun per pedunas e per peduns cun construir e cun extender passapes e cun eliminar las stretgas betg pudì vegnir realisada en duas vischnancas (Beiva e Mulegns). L'augment dal traffic tar il post da dumbraziun Crap Ses importa dapi l'onn 1995 stgars 3.5 %. L'onn 2006 è il traffic schizunt sa sminuì per 2.6 % en cumparegliaziun cun l'onn avant. Il traffic pesant che vegn registrà tar il post da dumbraziun sur Silvaplauna è s'augmentà durant la medema perioda (1995-2006) cunter l'avis general mo per 0.8 %. En cumparegliaziun cun la via dal Partenz u cun la via sursilvana tranter La Punt e Glion èn las frequenzas dal traffic sin la via dal Güglia duas fin trais giadas pli bassas.

En il plan directiv chantunal èn cuntegnids ils sviaments per Cunter, per Savognin e per Beiva sco opziuns. Sviaments per Tinizong Rona, per Mulegns e per Sour n'èn percunter betg integrads en il plan directiv.


Respostas a las dumondas concretas:

1. Malgrà las stretgas a Mulegns ed a Beiva vegn la capacitad da la via dal Güglia considerada actualmain sco suffizienta en quai che concerna il transit dals vitgs. La regenza è dentant conscienta ch'il traffic è ina chargia considerabla (canera, aria e.u.v.) per las abitantas e per ils abitants ed ina periclitaziun, cunzunt per las pedunas e per ils peduns. Displaschaivlamain n'han ins fin ussa betg pudì realisar las mesiras architectonicas planisadas en quests vitgs.

2. Cun excepziun da Silvaplauna n'èn avant maun nagins projects concrets per sviaments per lung da la via dal Güglia. En las vischnancas da Cunter, da Savognin e da Beiva èn vegnids fixads ils corridors en il plan directiv chantunal. Areguard l'ulteriur proceder na pon per il mument vegnir fatgas naginas indicaziuns.

3. Actualmain decida il stadi da la substanza architectonica en emprima lingia davart las prioritads da las amplificaziuns decisas er per lung da l'axa dal Güglia. Quai vul dir ch'ils trajects che n'èn anc betg vegnids cumplettads ston l'emprim vegnir mess en in stadi che correspunda a las pretensiuns dad ozendi en quai che reguarda la tecnica e la segirezza. Alura pon eventualmain resguardond las cundiziuns da basa finanzialas vegnir prendids en mira novs trassés (projects da sviament).

Cun augmentar la classificaziun da la via dal Güglia ad ina via naziunala giess la cumpetenza e la responsabladad dal tuttafatg a la confederaziun. Per consequenza giuditgass la confederaziun davart la necessitad dals divers projects per l'amplificaziun e per il mantegniment architectonic e davart la realisaziun da novs projects.

Datum: 31 d'avust 2007