Navigation

Inhaltsbereich

Incumbensa da fracziun da la PS Arquint concernent las abitaziuns secundaras en il GR

Sessiun: 29.08.2007
Il cussegl federal ha cumbinà la missiva tar l'aboliziun da la lex Koller cun la pretensiun ch'ils chantuns stoppian daventar sezs activs e prender mesiras effectivas cunter il svilup exorbitant en la construcziun d'abitaziuns secundaras. Schebain che la basa legala sin plaun federal sto pir vegnir concludida, s'imponan mesiras chantunalas gia oz per il Grischun, e quai sin fundament da la situaziun actuala. La posiziun passiva da la regenza e la delegaziun da la responsabladad a las regiuns ed a las vischnancas n'èn betg cuntentaivlas per las sutsegnadas e per ils sutsegnads. In'eventuala aboliziun da la lex Koller senza ch'i vegnissan prendidas mesiras substitutivas concretas ed effizientas avess consequenzas gravantas per ils territoris pertutgads, sco p.ex.:

- in ulteriur augment dals custs d'immobiglias e da locaziun;
- in ulteriur augment da la speculaziun d'immobiglias;
- ina guntgida pli e pli intensiva da las disposiziuns cunter la lavada da daners suspectus;
- consequenzas betg scleridas per il substrat da taglia e per la planisaziun dal territori.

Gia oz n'èn las vischnancas e las regiuns en las qualas la quota d'abitaziuns secundaras surpassa per part fermamain 50% da l'entir effectiv d'abitaziuns betg ablas u prontas da prender mesiras concretas. Quai è nunacceptabel perquai che la populaziun dals territoris principalmain pertutgads ha pretendì expressivamain da restrenscher la construcziun d'abitaziuns secundaras.

Il boom da construir abitaziuns secundaras ha plinavant ina influenza per l'hotellaria. Mesiras da restructuraziun fan savens naufragi pervia da purschidas speculativas; en blers cas èn hotels vegnidas midads en edifizis d'abitaziuns secundaras. Uschia vegn disturbada sensiblamain la relaziun turistica e sociala tranter ils hotels, las abitaziuns secundaras e las abitaziuns ch'èn en possess da persunas indigenas. Questas ultimas vegnan sfurzadas da sa domiciliar a la periferia, er pervia dals tschains da locaziun creschents. La consequenza da quai èn in augment dals custs da la vita e lungas vias d'access. En cumparegliaziun cun ils hotels produceschan las abitaziuns secundaras dentant mo in quart da la valurisaziun.

Da l'autra vart sa depopuleschan entiras regiuns perquai ch'i mancan ils impuls economics. Las abitaziuns secundaras pudessan bain giugar ina rolla impurtanta per l'economia publica cun dar impuls a talas regiuns.

Mesiras d'intervenziun e da coordinaziun da vart dal chantun s'imponan pia bunamain.
In sguard en ils pajais vischins (Tirol, Vorarlberg) mussa ch'i dat senza auter vias effizientas per restrenscher la construcziun d'abitaziuns secundaras.

Nus envidain la regenza en il senn da las ponderaziuns qua survart sco er en consequenza da l'appel dal cussegl federal da proponer mesiras concretas resp. d'instradar sez talas mesiras da schliar il problem da las abitaziuns secundaras en in connex social, economic, turistic e cultural. En spezial ston vegnir examinadas mesiras sco per exempel:

il relasch da plans directivs ch'èn differenziads regiunalmain e che utiliseschan il martgà d'abitaziuns secundaras sco instrument per ina politica orientada a l'economia generala. Uschia pudess vegnir resguardà il stadi da svilup da las regiuns;

l'elavuraziun da mesiras spezialas da la planisaziun dal territori per las vischnancas e per las regiuns ch'èn pertutgadas il pli fitg dal problem, e quai per cumbatter efficaziamain la disproporziun creschenta tranter ils hotels e las abitaziuns secundaras per exempel cun crear zonas d'hotels u cun relaschar recumandaziuns chantunalas per ils contingents (dotaziun e structura degressiva);

ina differenziaziun da la noziun d'abitaziun secundara: abitaziuns secundaras che vegnan dadas en locaziun a persunas indigenas, abitaziuns secundaras che vegnan utilisadas mo da la possessura u dal possessur, abitaziuns secundaras che pon vegnir dadas en locaziun libramain, abitaziuns secundaras en cumbinaziun cun restructuraziuns d'hotels. Per tut questas categorias èn necessarias differentas mesiras che sa distinguan ultra da quai er regiunalmain. Quests puntgs pudessan vegnir integrads en ils plans directivs regiunals ed en ils concepts da svilup;

mesiras directivas dal dretg fiscal per conceder a la hotellaria meglras cundiziuns da basa en in martgà che sa mida. La hotellaria è numnadamain in sectur da valurisaziun pli impurtant che las abitaziuns secundaras;

mesiras per augmentar l'attractivitad d'abitar per las persunas indigenas en ils territoris spezialmain pertutgads, per exempel cun reservar las zonas da construcziun existentas per las persunas indigenas;

in'applicaziun consequenta da la basa legala per persequitar e per chastiar activamain la proprietad d'abitar ch'è vegnida acquistada en moda abusiva e per restrenscher l'acquist da proprietad d'abitar en furma d'investiziuns speculativas ed orientadas puramain al retgav ed a la rendita.

Cuira, ils 29 d'avust 2007

Name: Arquint, Peyer, Jaag, Baselgia-Brunner, Bucher-Brini, Frigg-Walt, Gartmann-Albin, Jäger, Menge, Meyer Persili (Cuira), Pfenninger, Pfiffner, Thöny, Trepp

Session: 29.08.2007
Vorstoss: rg Auftrag


Resposta da la regenza

Igl è in fatg incontestà che abitaziuns secundaras pon avair er noschas consequenzas, sco per exempel in consum da terren memia grond, ina pregiudicaziun dal maletg dal vitg, l'atmosfera d'in lieu da spierts, l'access pli difficil al martgà d'abitaziuns per las persunas indigenas. Cunzunt abitaziuns cun in'occupaziun annuala minimala (uschenumnads letgs fraids) èn problematicas, perquai ch'ellas na gidan betg ad occupar las infrastructuras turisticas localas sco per exempel las telefericas. Da l'autra vart èn las abitaziuns secundaras in factur economic impurtant en ils chantuns da turissem sco il Grischun. 50% da las pernottaziuns annualas en noss chantun vegnan generadas d'abitaziuns secundaras. Ellas chaschunan uschia er valurisaziun ed occupaziun en emprima lingia en la branscha da construcziun, d'immobiglias e da turissem. Perquai duai esser ina finamira principala da mintga destinaziun turistica da crear uschè bleras abitaziuns sco pussaivel che vegnan duvradas commerzialmain, da crear pia letgs chauds, per cuntanscher in'occupaziun intensiva. Per quest intent ston vegnir prendidas cunzunt en ils centers turistics mesiras concretas per restrenscher il dumber da letgs fraids respectivamain per promover il dumber da letgs chauds. En vista a las relaziuns ed als basegns fitg differents da las singulas vischnancas ed en accordanza cun in conclus ch'il cussegl grond ha relaschà dacurt en il rom da la revisiun da la lescha chantunala davart la planisaziun dal territorir è la regenza adina s'exprimida en quel senn che las prescripziuns correspundentas che pertutgan directamain la proprietad fin ussa prevalevan regulaziuns da natira da la planisaziun dal territori stoppian vegnir relaschadas da las vischnancas pertutgadas sezzas e betg dal chantun. Quai duai vegnir mantegnì. Il chantun è dapi adina conscient da la problematica ed ha sustegnì en diversas modas las vischnancas a dumagnar lur incumbensa difficila, saja quai cun metter a disposiziun agids d'execuziun, models da prescripziuns e cun organisar dietas u saja quai a chaschun da l'examinaziun preliminara e da l'approvaziun dals decrets da la planisaziun locala. Degn da vegnir menziunà è tranter auter il studi "Construcziun d'abitaziuns secundaras en il chantun Grischun" ch'è vegnì edì l'onn 1997. En quest studi èn vegnids preschentads tut ils instruments ch'eran pussaivels quella giada. Grazia a tut questas activitads han las vischnancas fatg la finala reglamentaziuns ch'èn confurmas al basegn. Pensar ston ins qua per exempel a las emprimas prescripziuns davart la quota d'emprimas abitaziuns, cun las qualas ha pudì vegnir stabilisà l'augment dal dumber d'abitaziuns secundaras da l'onn 1980 fin l'onn 2000, a la politica da terren e d'abitaziuns activa da las vischnancas sco er a las prescripziuns da contingentaziun vertentas ch'èn gia vegnidas relaschadas en bleras vischnancas turisticas (tranter auter en l'Engiadin'ota, a Vaz) u che vegnan examinadas actualmain (tranter auter a Tavau, a Claustra).

Necessaria è ina politica d'abitaziuns secundaras che resguarda ils differents basegns locals e ch'è chantunala e persistenta. En quest punct vegni ad esser necessari d'augmentar l'engaschament. Per quest intent ha il departament cumpetent lantschà gia avant che l'incumbensa qua avant maun saja vegnida inoltrada ina cumplettaziun dal plan directiv chantunal (PDChant) che tegna quint en il senn d'in ulteriur svilup dal sectur "abitadi" ed independentamain da l'ulteriur destin da la lex Koller specificamain da la tematica da las abitaziuns secundaras. Questa cumplettaziun dal PDChant vegn er ad esser l'occasiun per examinar pli detagliadamain las mesiras che vegnan menziunadas en l'incumbensa qua avant maun. En general sa tracti da sviluppar criteris generals per eruir il basegn d'agir sco er da definir prescripziuns instrumentalas e temporalas per las vischnancas, ch'èn er liantas per las autoritads. Il medem mument vegnan curregids ils instruments vertents ed examinadas novas mesiras (p.ex. taxa directiva sin abitaziuns secundaras a favur d'ina sminuziun dals effects negativs u per promover l'infrastructura turistica sco er la construcziun d'emprimas abitaziuns; sistems d'impuls per augmentar l'occupaziun d'abitaziuns secundaras existentas). I vegn elavurada ina chascha d'instruments, da la quala las vischnancas pon duvrar ils differents elements tut tenor lur problems specifics ed en diversas cumbinaziuns. Ina tala cumplettaziun dal PDChant po er vegnir chapida en vista a la pretensiun ch'è vegnida menziunada sco premissa per abolir la lex Koller da metter a disposiziun mesiras accumpagnantas.

En quest senn po vegnir acceptada l'incumbensa da fracziun qua avant maun, cun la quala la regenza vegn envidada d'examinar mesiras per schliar il problem da las abitaziuns secundaras.

Datum: 31 d'october 2007