En vista al fatg che adina dapli giuvenils ed adina dapli persunas giuvnas creschidas s'indebiteschan pli e pli fitg parta la regenza la preoccupaziun che vegn exprimida en la dumonda. Il medem mument è ella dentant conscienta ch'i dat cunfins stretgs per las pussaivladads d'influenzar intenziunadamain da dador il fenomen dal "indebitament" che tutga tar mintga societad da consum.

D'educar ils umans giuvens a conburgaisas ed a conburgais che consumeschan gugent, dentant mo uschè bler sco ch'ellas e sco ch'els pon sa prestar è fitg difficil. Il cumportament da consum concret da mintga singul uman na vegn betg mo dirigì da sia savida, mabain oravant tut er dals meds finanzials che al stattan a disposiziun sco er da sia tenuta envers la vita. Al svilup da questa tenuta èn dentant participadas instanzas fitg differentas (chasa dals geniturs, scola, giuvenils da la medema vegliadetgna, reclama, medias).

La regenza è da l'idea ch'i saja impurtant da persequitar parallelamain duas vias en connex cun l'indebitament da giuvenils sin tut ils plauns: D'ina vart sa tracti d'educar uschè blers umans sco pussaivel en il decurs da lur temp sco uffants pitschens e da lur temp en la scola populara a burgaisas ed a burgais maiorens, e quai cun intermediar las enconuschientschas e las tenutas correspundentas, per ch'ellas e per ch'els sajan tranter auter en cas d'accordar lur basegns da consum individuals cun lur pussaivladads individualas. Perquai che quai è pussaivel mo per part en ina societad da consum ston da l'autra vart vegnir mess a disposiziun a quels giuvenils ch'èn gia crudads en la trapla da debits purschidas intenziunadas che als gidan da puspè bandunar lur indebitament e da trair a niz la schanza d'in cumenzament nov.

Las trais dumondas concretas da l'intervenziun respunda la regenza sco suonda:

1. Ni la statistica svizra d'agid social ni l'enquista chantunala na cuntegnan cifras represchentativas davart l'indebitament d'umans giuvens avant lur 25avel onn da vegliadetgna. Ina retschertga parziala tar il post da cussegliaziun per giuvenils dal servetsch social regiunal da Cuira mussa che circa la mesadad dals giuvenils che vegnan assistids en la chapitala grischuna (q.v.d. ca. 60 persunas) basegna ina cussegliaziun da debits.
En il rom da las cussegliaziuns socialas che vegnan purschidas dals servetschs socials regiunals vegnan ils giuvenils cussegliads en dumondas dal preventiv. La finamira da quai è tranter auter d'evitar l'agid social. En quest connex po vegnir constatà che quests giuvenils na derivan betg stringentamain da famiglias cun entradas pitschnas u da relaziuns socialas difficilas. Els imiteschan però savens il cumportament che lur geniturs han envers debits. Traplas tipicas per far debits èn ils handys, las cartas da credit sco er las cumpras da products da consum e da moda via internet.
Concernent il studi naziunal che vegn menziunà en la dumonda qua avant maun sa basa la regenza sin il fatg ch'ils resultats ch'èn publitgads en quest studi constattan per gronda part er per il Grischun.

2. Sut il titel "uman ed ambient" vegnan tematisads il diever da daners ed il cumportament da consum en il plan d'instrucziun per il stgalim superiur. Ils differents temas vegnan tractads detagliadamain en ils chapitels "economia da chasa" ed "instrucziun economica". Er en ils uschenumnads "secturs d'instrucziun che n'èn betg liads vi d'in rom" che tutgan tar la part integrala obligatorica dal stgalim superiur da la scola populara vegn questa tematica tractada en la part da l'educaziun da sanadad ("bainstar spiertal-psichic" e "bainstar social") ed en la scienza da las medias.

3. En quai che concerna la tematica "daners e consum" stattan a disposiziun a las scolas las publicaziuns las pli differentas tant sin il martgà da meds d'instrucziun sco er en l'internet. Perquai che las persunas d'instrucziun èn libras d'eleger ils meds d'instrucziun per quest sectur, han ellas la pussaivladad d'accordar ils meds d'instrucziun e las materialias d'instrucziun cun la vegliadetgna e cun la situaziun concreta da lur scolaras e da lur scolars.

Datum: 26 d'october 2007