Navigation

Inhaltsbereich

Dumonda Loepfe concernent tastgas da scola nunportablas

Sessiun: 23.10.2007
En las medias stampadas naziunalas è dacurt vegnì renvià al problem da las tastgas da scola ch'èn memia grevas. Tenor quella communicaziun pateschan blers giuvenils da mal il dies pervia da questa chargia memia greva. In studi dal chantun Basilea-Citad mussa ch'in quart da tut ils giuvenils da 15 e da 16 onns patescha da mal il dies. Il motiv è ultra da la mancanza da moviment e da la moda faussa da seser oravant tut la tastga da scola. Las tastgas daventan adina pli grondas e las scolaras ed ils scolars struztgan adina dapli cudeschs e quaderns a chasa, saja quai sin cumond da las persunas d'instrucziun u saja quai pervia d'in urden persunal che n'è betg optimal.

Da mal il dies planschan las scolaras ed ils scolars savens pir sin il stgalim superiur. En blwers cas è quest problem dentant vegnì chaschunà gia en la scola primara. Il pais da la tastga da scola na duess numnadamain tenor las recumandaziuns da las medias e dals medis da scola betg importar dapli che 10% dal pais dal corp. Studis da la Germania e dals Stadis unids mussan che passa 80% da las tastgas da scola paisan da memia. En Svizra mancan las cifras correspundentas, ina statistica na dastgass dentant betg vesair ora bler meglier. Renviaments en quest connex dattan er las cifras da la federaziun svizra da fisioterapia, tenor las qualas 30% dals uffants pateschan da donns da postura, cur ch'els sortan da la scola, dentant mo 19% cur ch'els entran en scola.

Ils chantuns Turitg e Basilea han gia reagì sin questa situaziun alarmanta e redigì fegls d'infurmaziun per scolaras e per scolars, per geniturs e per las persunas d'instrucziun. La tastga da scola vida duai per exempel pasar maximalmain 1.2 kilos. Nua che quai n'è anc betg il cas, duain vegnir stgaffids caums persunals sin il stgalim superiur, per ch'i na stoppia betg vegnir struztgà a chasa material da scola che n'è betg necessari.
En quai che concerna il chantun Grischun constateschan las petentas ed ils petents che quest problem che pertutga probablamain er nus n'è strusch in tema ni sin il stgalim da las instituziuns ch'èn responsablas per la scola, ni per las vischnancas e ni per il chantun.

Pia vegnan fatgas las suandantas dumondas a la regenza:

1. È la regenza da l'avis ch'il chantun Grischun saja er pertutgà dal problem da las tastgas da scola memia grevas e ch'i resultan da quai donns per la sanadad dals uffants e dals giuvenils?

2. Enconuschan ins quest problem sin il stgalim dal chantun (uffizi da scola, inspecturat da scola) e vegnan preparadas cuntramesiras correspundentas?

3. Ha il chantun novas, sche las singulas instituziuns ch'èn responsablas per la scola enconuschan quest problem e sch'igl èn gia vegnidas prendidas mesiras sin plaun communal u regiunal? Sche gea, tge resultats han pudì vegnir obtegnids da quellas mesiras?

Cuira, ils 23 d'october 2007

Name: Loepfe, Tenchio, Florin-Caluori, Augustin, Berni, Blumenthal, Bondolfi, Caduff, Cahannes Renggli, Candinas, Cavigelli, Christoffel-Casty, Darms-Landolt, Fallet, Fasani, Gartmann-Albin, Keller, Noi-Togni, Perl, Pfister, Quinter, Thurner-Steier, Toschini, Tuor, Wettstein, Grendelmeier, Märchy-Caduff (Domat), Strimer

Session: 23.10.2007
Vorstoss: rg Anfrage


Resposta da la regenza

La regenza prenda serius rapports davart in augment dals cas da mal il dies tar uffants e tar giuvenils. En quest connex n'excluda ella betg che ultra da la mancanza da moviment, d'in nutriment malsaun e.u.v. er tastgas da scola memia grevas possian contribuir lur part als donns dal dies da la generaziun giuvna. Però pari a la regenza d'esser impurtant da considerar la dumonda da las tastgas da scola adina sco in factur da blers en il champ da tensiun tranter mesiras che donnegeschan la sanadad e mesiras che promovan la sanadad.

Sche tastgas da scola daventan nunportablas, èn mintgamai facturs fitg differents en moda cumulativa d'impurtanza: tastgas da scola pon esser construidas en moda inadattada (p.ex. or da materials memia grevs e/u cun bratschols memia stretgs). Ellas pon esser chargiadas cun memia blers meds d'instrucziun e cun memia bleras vivondas che pon er esser memia grevs u memia grevas, e/u ellas pon vegnir purtadas en moda inadequata. Sch'in turnister da scola daventa ina gronda paisa u betg, dependa la finala er da la constituziun dal corp e da la cundiziun fisica da la purtadra resp. dal purtader. Sco tar il cumportament da mangiar e da moviment n'èsi ultra da quai betg uschè facil da midar l'utilisaziun da tastgas da scola, uscheditg che soluziuns novas (p.ex. tastgas da scola sin rodas che pon vegnir tratgas suenter) na correspundan en ils egls dals giuvenils betg ad in trend modern.

En vista a la cumulaziun da raschuns fitg differentas è la soluziun per mintga singula scolara e per mintga singul scolar mintgamai in'autra. Las pussaivladads dal departament cumpetent sa restrenschan a renviaments generals per sensibilisar las persunas d'instrucziun pertutgadas, las persunas cun la pussanza dals geniturs, ils uffants ed ils giuvenils per questa problematica.

Sut quest aspect pon las trais dumondas concretas che vegnan tschentadas en l'intervenziun vegnir respundidas sco suonda:

1. La regenza n'excluda betg che turnisters da scola memia grevs contribueschan er en il Grischun lur part al svilup da donns per la sanadad dals uffants e dals giuvenils. Però resguarda ella il purtar tastgas da scola memia grevas mo sco in da numerus cumportaments che donnegeschan la sanadad, sco la mancanza da moviment u in nutriment malsaun. Pervia da quai ston mesiras per reducir resp. per eliminar tut questas ristgas vegnir prendidas en differents secturs.

2. Acziuns concretas per reducir il pais da turnisters da scola n'èn vegnidas fatgas naginas enfin ussa. Per l'avegnir èn però prevesidas infurmaziuns correspundentas: Cun ina brev infurmescha l'uffizi per la scola populara ed il sport tut las scolas e tut las autoritads da scola il cumenzament da l'onn 2008 davart questa tematica. Tar questas stentas èsi dentant impurtant che la dumonda da las tastgas da scola vegnia adina resguardada en il rom general d'ina vasta promoziun da la sanadad.

3. Quant enavant che las instituziuns ch'èn responsablas per la scola enconuschan la tematica da las tastgas da scola nunportablas, na sa la regenza betg. Ella è dentant persvadida che las instituziuns ch'èn responsablas per la scola en tut las regiuns prendan serius la promoziun da la sanadad e na tralaschan nagut per sustegnair la sanadad da lur uffants e da lur giuvenils.
Perquai che umans giuvens pon vegnir persvadids da sa cumportar en moda sauna en emprima lingia tras infurmaziuns correspundentas e tras exempels vivents, resguarda la regenza quai sco impurtant che las stentas tar la dumonda da las tastgas da scola nunportablas sa concentreschian oravant tut sin ina cussegliaziun pratica dals geniturs e da lur uffants.

Datum: 17 da december 2007