Navigation

Inhaltsbereich

Incumbensa da fracziun da la PLD Nick concernent la promoziun da l'economia en il Grischun

Sessiun: 23.10.2007
En connex cun la decisiun negativa davart il lieu per construir la fabrica da semiconducturs Espors Photonics SA è la regenza s'occupada tenor la communicaziun da la regenza da la critica davart la moda e maniera da lavurar dal chantun durant la concurrenza per il lieu da staziunament.

Tenor l'avis da la regenza duain vegnir reponderads las proceduras, las pussaivladads ed ils cunfins da la promoziun da l'economia en il Grischun per domiciliar novs manaschis. Plinavant duai vegnir examinada la tgira da manaschis che lavuran gia en il Grischun. Questa reponderaziun ed examinaziun duai vegnir fatga d'in expert extern che examinescha tant il cas concret da la Espros Photonics SA sco er la direcziun da la promoziun da l'economia en il Grischun.

Questa retschertga è bainvegnida. Ils resultats ston vegnir preschentads a la cumissiun da gestiun. Independentamain da quai stoi vegnir punctuà che la critica vi da las structuras e vi dals process da la promoziun da l'economia sto vegnir prendida seriusa. Questa situaziun sto vegnir analisada e meglierada, sche noss chantun vul avair success en la concurrenza davart il lieu da staziunament che daventa adina pli dira.

Las sutsegnadas ed ils sutsegnads èn da l'avis ch'i saja ina incumbensa urgenta da la regenza da repassar la basa da la promoziun da l'economia en il Grischun, e quai en connex cun la retschertga externa, e da meglierar il sistem per promover l'economia. Pervia da quai vegn la regenza incumbensada d'adattar la promoziun da l'economia per ch'ella satisfetschia a las pretensiuns da la concurrenza dal lieu da staziunament tranter ils chantuns ed ils stadis e per ch'ella garanteschia al chantun Grischun ina posiziun fitg buna entaifer la Svizra orientala.

Cuira, ils 23 d'october 2007

Name: Nick, Barandun, Bezzola (Samedan), Bischoff, Bühler-Flury, Casparis-Nigg, Caviezel (Pitasch), Claus, Clavadetscher, Donatsch, Feltscher, Hanimann, Hartmann (Cuira), Hartmann (Champfèr), Jenny, Kessler, Krättli-Lori, Kunz, Meyer-Grass (Claustra), Michel, Peer, Pfäffli, Ragettli, Rathgeb, Rizzi, Thomann, Toschini, Valär, Vetsch (Pragg-Jenaz), Wettstein, Strimer

Session: 23.10.2007
Vorstoss: rg Auftrag


Resposta da la regenza

La concurrenza davart il lieu da staziunament è daventada cleramain pli dira, tant sin plaun naziunal sco er sin plaun internaziunal. Dapi l'onn 2000 ha er il chantun Grischun intensivà considerablamain sias activitads en il sectur dal marketing dal lieu e da la domiciliaziun d'interpresas. Fin oz han pudì vegnir domiciliadas 65 interpresas cun in potenzial da circa 1'200 plazzas da lavur, han pudì vegnir promovidas 24 interpresas existentas cun in potenzial da circa 1'000 plazzas da lavur. Ultra da quai han in pèr interpresas pudì vegnir persvadidas da betg bandunar il Grischun. En vista al fatg che la promoziun da l'economia ha gì in'activitad cleramain pli pitschna la fin da l'ultim tschientaner, po la cumprova da prestaziun da la promoziun chantunala da l'economia ch'è vegnida stabilida ils ultims onns bain sa mussar. L'expertisa che vegn fatga sin incumbensa duess stgaffir clerezza nua che la promoziun chantunala da l'economia sa chatta en cumparegliaziun cun ils auters chantuns ed en tge secturs ch'i dat in potenzial da meglieraziun. La regenza vegn alura a sa fatschentar cun ils resultats preschentads ed a decider en tge secturs ed en tge direcziun ch'il svilup sto vegnir cuntinuà. En quest connex poi sa tractar per exempel d'ina revisiun da la legislaziun, da la concepziun da la moda da lavurar e da las proceduras, da l'introducziun dal princip dal "one-stop-shop" e d'ina alimentaziun persunala e finanziala da la promoziun da l'economia. Las mesiras che ston eventualmain vegnir prendidas vegnan liquidadas en las proceduras ordinarias. Ultra da quai vali da resguardar l'activitad da la fundaziun grischuna per innovaziun, svilup e perscrutaziun ch'è vegnida stgaffida da nov.

L'expertisa correspundenta è avant maun il pli baud il mars 2008. La regenza è pronta da la suttametter a la cumissiun da gestiun dal cussegl grond.

Er la regenza è da l'avis ch'il sistem per promover l'economia stoppia vegnir examinà e sche necessari meglierà per pudair satisfar a las sfidas en la concurrenza davart ils lieus da staziunament. Ella è pronta d'acceptar l'incumbensa da fracziun da la PLD en il senn da las explicaziuns qua survart.

Datum: 20 da december 2007