Navigation

Inhaltsbereich

Incumbensa Thöny concernent l'installaziun d'in sistem da votaziun electronic en la sala dal cussegl grond

Sessiun: 12.02.2008
En la sala da cussegl grond duai vegnir installà in sistem da votaziun electronic. In tal sistem creescha transparenza – transparenza vers l'intern e vers l'extern.
L'avantatg d'in sistem da votaziun electronic è ch'il cumportament da votaziun vegn rendì visibel en moda nunbirocratica. Da quai pon profitar directamain tut las persunas ch'èn preschentas en la sala e sin la tribuna. Per tut quellas e quels che n'èn betg preschents po la votaziun vegnir arcunada en furma electronica. Il sistem da votaziun electronic permetta betg sco ultim a las burgaisas ed als burgais da persequitar pli da manidel la tenuta da lur deputadas e da lur deputads.
Cun ina tala installaziun vegn creada in'ulteriura valur augmentada, a moda che sbagls da dumbraziun pon vegnir impedids gia dal cumenzament ennà. Tar decisiuns cun ina maioritad fitg pitschna è quai fitg impurtant.
A las commembras ed als commembers dal cussegl grond èsi plinavant pussaivel d'inditgar – cun smatgar in nuf – sch'ellas u sch'els vulan prender il pled en la debatta. La presidenta u il president dal cussegl grond na sto betg pli observar ils mauns levads. Igl è exclus da survesair deputadas e deputads che vulan dar lur votum.
Las incumbensadras ed ils incumbensaders presuman che quest instrument augmentia la prontezza da las deputadas e dals deputads d'esser tuttas e tuts preschents tar votaziuns.
La proprietaria da l'immobiglia è la cassa da pensiun chantunala. Co ch'in sistem da votaziun electronic po vegnir installà, sto pia vegnir tractà cun la cassa da pensiun chantunala. La regenza duai entrar en contact cun la cassa da pensiun chantunala e negoziar las cundiziuns. Particularmain sto ella empruvar da cuntanscher che la cassa da pensiun chantunala surpiglia ils custs d'investiziun e ch'il chantun paja ils tschains. La cassa da pensiun chantunala ha gia signalisà ch'ella saja pronta da cooperar en quest senn.
Tut tenor la perioda d'amortisaziun sto vegnir quintà cun ina grevezza supplementara dal tschains da locaziun da 5.6% (durant 10 onns) fin 3.5% (durant 20 onns).
Las sutsegnadras ed ils sutsegnaders envidan la regenza da realisar in sistem da votaziun electronic en la sala dal cussegl grond, e quai en enclegientscha cun la cassa da pensiun chantunala.

Cuira, ils 12 da favrer 2008

Name: Thöny, Rathgeb, Loepfe, Augustin, Baselgia-Brunner, Brüesch, Bucher-Brini, Buchli, Caduff, Conrad, Darms-Landolt, Felix, Frigg-Walt, Gartmann-Albin, Jaag, Jäger, Kleis-Kümin, Menge, Meyer-Grass (Claustra Vitg), Niederer, Parolini, Parpan, Pfäffli, Pfenninger, Pfiffner-Bearth, Pfister, Tenchio, Trepp, Tuor, Wettstein, Locher Benguerel, Monigatti, Schädler

Session: 12.02.2008
Vorstoss: rg Auftrag


Resposta da la regenza

A chaschun da la sessiun d'avust 2007 avevan il deputà Thöny sco er ulteriuras sutsegnadas ed ulteriurs sutsegnads fatg la proposta da prender in conclus direct concernent l'installaziun d'in sistem da votaziun electronic en la sala dal cussegl grond, alura dentant retratg questa incumbensa durant la sessiun da december 2007 "pervia da l'opposiziun ch'è avant maun" (PCG 2007/2008, p. 372). Durant la sessiun da favrer 2008 è vegnida inoltrada puspè la medema proposta en furma d'ina incumbensa.

Ina retschertga ha mussà che 11 chantuns disponan fin oz d'in sistem da votaziun electronic. Quests chantuns inditgeschan sco avantatgs d'in sistem da votaziun electronic medemamain l'effizienza, la transparenza e l'exactadad da las datas e menziuneschan er l'avantatg ch'il cumportament da las singulas deputadas e dals singuls deputads en la votaziun possia vegnir eruì er posteriuramain, perquai che la votaziun saja vegnida arcunada electronicamain e possia pia vegnir analisada.

Ils sistems ch'èn per part fitg differents en ils singuls chantuns possedan per regla quatter buttuns ed en singuls cas anc in buttun da reserva (gea, na, abstenziun, preschientscha/dumandar il pled). En tscherts chantuns na vegnan las utilisadras ed ils utilisaders dal sistem betg identifitgads tar mintga act da votaziun, ni tras cartas ni tras in'autra procedura. A medem temp vegni renunzià er ad in buttun da segirezza cunter l'abus da votaziun (in buttun ch'è situà in pau pli distant sto vegnir smatgà a medem temp). Valair vala il princip da confidenza. Per garantir la fidaivladad e la confidaivladad da quests sistems, na vegnan els betg dirigids per func, mabain per cabel. Ina tscherta ristga ch'i vegnia fatg abus e ch'i dettia disturbis na po pia betg vegnir exclusa dal tuttafatg er tar quests sistems da votaziun.
Per realisar in sistem da votaziun electronic basegnassi diversas intervenziuns architectonicas en la sala actuala dal cussegl grond. Tut las plazzas en la sala dal cussegl grond stuessan vegnir colliadas cun cabels; ina transmissiun radiofonica sto vegnir refusada per motivs da segirezza. L'acquisiziun e l'installaziun d'in sistem da votaziun electronic pudessan ins obtegnair mo cun gronds custs. En la retschertga han ils chantuns inditgà custs da 400'000 francs (GE) fin 700'000 francs (SG). Vitiers vegnan custs consecutivs che sa repetan annualmain. Ils chantuns, cun excepziun dal chantun Basilea-Champagna, n'han fatg naginas indicaziuns correspundentas. Il chantun da Basilea-Champagna ha previs en ses sboz per mauns dal cussegl grond custs consecutivs annuals da 51'000 francs. Questa summa cuntegna er las amortisaziuns annualas che sa basan sin ina durada tecnica dal sistem da 15 onns.

Sch'ins presuma ina investiziun da 600'000 francs, chaschunass in tal sistem en la sala da cussegl grond – cun ina durada d'amortisaziun da 15 onns – custs supplementars per il chantun da circa 60'000 francs per onn. Igl è evident ch'ils custs supplementars che resultassan per la cassa da pensiun chantunala sco proprietaria da l'edifizi dal cussegl grond tras l'installaziun d'in tal sistem da votaziun stuessan vegnir transferids al chantun.

Cun il sistem actual voteschan las commembras ed ils commembers dal cussegl grond en la sala dal cussegl grond cun star si. Quai è ina procedura ch'è evidentamain pli clera e pli netta visavi la votaziun cun auzar il maun. Dal puntg da vista da la regenza è questa moda da votar sa cumprovada. Questa moda da proceder ademplescha, a l'avis da la regenza, er las pretensiuns da segirezza e da transparenza che vegnan fatgas ad in sistem da votaziun. Suenter avair ponderà ils avantatgs ed ils dischavantatgs vegn la regenza a la conclusiun ch'ils gronds custs d'installaziun e da manaschi d'in tal sistem na sa laschian betg giustifitgar, perquai ch'in tal ha mo pitschens avantatgs. Ella propona perquai da refusar l'incumbensa.

Datum: 23 d'avrigl 2008