La lescha federala d'energia ch'è vegnida revedida prescriva che la media da la producziun annuala d'electricitad che deriva da purtaders d'energia regenerabels stoppia vegnir augmentada fin l'onn 2030 per almain 5400 GWh envers la situaziun da l'onn 2000. Per cuntanscher questa finamira duain er vegnir promovids implants che tiran a niz la forza dal vent. A quest intent serva l'indemnisaziun da l'electricitad furnida che garantescha a las producentas ed als producents d'electricitad che deriva da purtaders d'energia regenerabels in pretsch da cumpra determinà per ina tscherta perioda. Ultra da quai han l'uffizi federal d'energia (UFE), l'uffizi federal d'ambient (UFAM) e l'uffizi federal dal svilup dal territori (UFST) laschà elavurar in "concept davart l'energia dal vent". Quel è vegnì publitgà l'onn 2004. In auter studi ch'è vegnì incumbensà dal UFE è vegnì resumà en il rapport final davart l'utilisaziun da l'energia dal vent en il chantun Grischun da l'onn 2003. La finamira dal project è stada quella d'evaluar en il Grischun – en enclegientscha cun vischnancas, cun ils posts chantunals cumpetents sco er cun federaziuns da la protecziun da la patria, da l'ambient e da la natira – lieus, nua ch'ins pudess construir implants d'energia dal vent gronds sco er implants d'energia dal vent pli pitschens che lavuran cun vents flaivels. Il resultat da quai è stada ina glista cun lieus che vegnissan en dumonda per implants d'energia dal vent en il Grischun.

I vegn beneventà che la confederaziun promova la producziun d'electricitad che deriva da purtaders d'energia regenerabels. L'utilisaziun rinforzada da novs purtaders d'energia regenerabels per producir electricitad senza chaschunar CO2 serva a cuntanscher las finamiras da la persistenza ch'èn vegnidas fixadas. Ord vista da la politica d'energia è ina diversificaziun da las producentas e dals producents d'electricitad er degna da vegnir sustegnida, per betg esser dependent da singuls purtaders d'energia. Ils studis ch'èn vegnids menziunads qua survart mussan dentant che l'utilisaziun da la forza dal vent sa mova en cunfins stretgs en Svizra. La Svizra n'è betg adattada per l'energia dal vent. En spezial en il Grischun datti mo paucs lieus ch'èn adattads per utilisar la forza dal vent. La realisabladad da projects per utilisar la forza dal vent dependa en emprima lingia da las relaziuns da vent. En quest connex ha la constanza dal vent ina impurtanza fitg gronda. En quest sectur ha la Svizra – cumpareglià cun regiuns a la riva dal mar per exempel – gronds dischavantatgs. Vitiers vegn anc il potenzial da conflicts cun la protecziun da la natira e da la cuntrada sco er cun il turissem. Plinavant sa tschentan las dumondas davart l'avertura dal lieu da l'implant sco er las premissas da la planisaziun dal territori per pudair construir implants che tiran a niz la forza dal vent. Tuttina s'exprima la regenza per utilisar l'energia dal vent en il chantun Grischun là, nua che quai è raschunaivel. La planisaziun, la projectaziun e la realisaziun d'in implant che tira a niz la forza dal vent èn dentant chaussa da las producentas e dals producents.

Per giuditgar la situaziun generala en il Grischun èn avant maun – grazia als studis ch'èn vegnids menziunads qua survart – scleriments avunda davart l'utilisaziun da la forza dal vent. Tenor l'avis da la regenza n'èsi betg l'incumbensa dal chantun d'elavurar resp. da laschar elavurar studis da realisabladad per projects singuls concrets. Actualmain è però ina gruppa da lavur da represchentantas e da represchentants da l'uffizi per il svilup dal territori, da l'uffizi d'energia e da traffic sco er da l'uffizi per la natira e l'ambient occupada cun l'elavuraziun d'in plan secturial "energia dal vent". Quel duai servir a l'elavuraziun da la basa è duai esser avant maun a partir da l'atun 2008.

Per indemnisar l'electricitad furnida tenor la lescha d'energia revedida che vegn probablamain ad entrar en vigur il 1. da schaner 2009 stattan a disposiziun gia 320 milliuns francs per promover ils purtaders d'energia regenerabels. Quest instrument pussibilitescha da manar implants che tiran a niz la forza dal vent en lieus ch'èn adattads per quai. Pervia da quai na duain vegnir mess a disposiziun nagins daners da promoziun supplementars da vart dal chantun. Anzi, il chantun duai cuntinuar sia strategia da promoziun vertenta e cumprovada en il sectur da l'utilisaziun raziunala da l'energia resp. da la substituziun dals purtaders d'energia fossils.

Per ils motivs menziunads propona la regenza da refusar questa incumbensa.

Datum: 11 d’avrigl 2008