Navigation

Inhaltsbereich

Incumbensa da la fracziun da la PS concernent l'observaziun da las cunvegnas centralas da la OIL tar las acquisiziuns chantunalas (L'emprim sutsegnà Trepp)

Sessiun: 10.06.2008
La confederaziun, ils chantuns e las vischnancas fan mintga onn acquisiziuns da rauba la pli differenta, da servetschs e da lavurs da construcziun las pli differentas per circa 34 milliardas francs. Questa summa correspunda a 25% da las expensas naziunalas ed a circa 8% dal product naziunal brut. Questas acquisiziuns èn d'ina gronda impurtanza e signifitgan ina responsabladad per in svilup persistent, per cundiziuns da lavur correctas e per ina meglieraziun da la qualitad da viver dals umans qua tar nus e sin tut il mund.

Gia oz cuntegna il dretg d'acquisiziun criteris socials: Uschia dastga ina incumbensa per exempel vegnir surdada mo ad offerentas ed ad offerents che garanteschan l'egualitad dals umens e da las dunnas tar la salarisaziun. La confederaziun resumescha ils instruments per realisar las normas ecologicas e socialas tar ils fatgs publics d'acquisiziun sut la noziun "politica da products integrada". Products e servetschs duain ademplir grondas pretensiuns areguard l'economia, areguard l'ecologia ed areguard dumondas socialas, e quai durant lur entir ciclus da vita (fasa da planisaziun, da realisaziun, d'utilisaziun e da dismessa). Quai ha il cussegl federal explitgà en ses rapport da strategia "Svilup persistent 2002" e suttastritgà en sia bilantscha 2007. En spezial ston las otg cunvegnas centralas da l'organisaziun internaziunala da lavur (OIL) che la Svizra ha ratifitgà e che cumpiglian la protecziun da normas da lavur fundamentalas, vegnir observadas da las offerentas e dals offerents. La OIL ha declerà questas cunvegnas l'onn 1998 sco standard da basa dals dretgs umans. Ellas ston vegnir observadas er da stadis che na las han betg ratifitgadas. Ellas pertutgan tranter auter il dretg d'associaziun ed il dretg da far tractativas collectivas, il scumond da lavur sfurzada, il scumond da lavur d'uffants sco er la nundiscriminaziun a la plazza da lavur.

Sut cundiziuns da concurrenza pli severas impedescha in commerzi correct d'ina vart che offertas da dumping social ed economic bittan tar nus interpresas pitschnas e mesaunas or dal martgà e promovan relaziuns da lavur malsegiras e pajadas mal. Da l'autra vart promova in commerzi correct la prosperitad economica dals pajais dal sid. Relaziuns da lavur ch'èn degnas per ils umans cumbattan la povradad en quests pajais ed als privan dals motivs per migraziun e per terrorissem. Qua po er il chantun Grischun prestar sia part: Quai che vala per las acquisiziuns da la confederaziun, vala er per las acquisiziuns dal chantun. Pervia da quai duai l'ordinaziun chantunala da submissiun vegnir adattada a medem temp sco la legislaziun federala. Quai è giustifitgà tant pli, perquai ch'ils chantuns èn ils incumbensaders ils pli gronds cun ina part da 38% dal volumen da las acquisiziuns publicas annualas, lunsch davant la confederaziun cun ina part da 19%.

Las sutsegnadras ed ils sutsegnaders incumbenseschan pervia da quai la regenza da far las adattaziuns correspundentas ch'èn necessarias per obligar las furnituras ed ils furniturs da rauba sco er da prestaziuns en il rom da las acquisiziuns publicas – e quai tenor lescha e tenor contract – d'observar las disposiziuns da las cunvegnas centralas da la OIL tar la realisaziun da lur incumbensas.

Cuira, ils 10 da zercladur 2008

Trepp, Peyer, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Pfenninger, Pfiffner-Bearth, Thöny, Locher Benguerel, Michel (Cuira), Pedrini (Soazza)

Session: 10.06.2008
Vorstoss: rg Auftrag

Resposta da la regenza

Cun questa dumonda duai la regenza vegnir incumbensada dad obligar las furnituras ed ils furniturs da rauba sco er da prestaziuns en il rom da las acquisiziuns publicas – e quai tenor lescha e tenor contract – d'observar las disposiziuns da las cunvegnas centralas da l'organisaziun internaziunala da lavur (OIL).
Las otg cunvegnas centralas da la OIL che la Svizra ha ratifitgà han l'intent da proteger las normas da lavur fundamentalas (libertad d'associaziun ed il dretg sin tractativas collectivas, scumond da lavur sfurzada e da lavur d'uffants, scumond da discriminaziun a la plazza da lavur ed en la professiun). Questa convenziun è vegnida declerada da la OIL – sco organisaziun speziala da la ONU – sco standard minimal fundamental ch'è liant per tut las commembras e per tut ils commembers. Ultra da quai è la Svizra liada sin il plaun dals contracts internaziunals vi da la cunvegna plurilaterala da l'organisaziun mundiala da commerzi (WTO) davart las acquisiziuns publicas. Ils elements centrals da questa cunvegna èn il princip dal tractament egual ed il scumond da discriminaziun da purschidras e da purschiders esters. Cun agid da las publicaziuns uffizialas da las incumbensas duain la concurrenza, la transparenza sco er l'impundaziun economica e l'utilisaziun economica dals meds finanzials vegnir promovida.
Cun la cunvegna interchantunala davart las acquisiziuns publicas (CIAP) han ils chantuns armonisà da lur vart tranter els il dretg da surdada e realisà directamain en quella las obligaziuns che sa basan sin in contract internaziunal. L'art. 11 CIAP oblighescha las autoritads da resguardar tar la surdada d'incumbensas publicas che las disposiziuns e che las cundiziuns davart la protecziun da lavur vegnian resguardadas sco er ch'ils umens e che las dunnas vegnian tractads en moda eguala. Sin basa da quai fixescha l'art. 10 da nossa lescha chantunala da submissiun (Lsub) che l'incumbensadra u ch'il incumbensader ha da far valair questa pretensiun en il rom d'ina autodecleraziun. Uschia sto ella u el garantir che la purschidra u ch'il purschider observia questas disposiziuns e ch'ella u ch'el obligheschia terzas persunas, a las qualas ella u el dat vinavant tschertas incumbensas, per contract d'observar questas prescripziuns. Cun suttascriver l'autodecleraziun surpiglia pia en il chantun Grischuna ina purschidra u in purschider – en cas d'acquisiziuns publicas – la responsabladad che betg mo ella u el, mabain er sias subimpressarias e ses subimpressaris sco er sias furnituras e ses furniturs observian tut las prescripziuns da lavur minimalas che valan per ellas e per els. Sch'ina purschidra u sch'in purschider fa indicaziuns faussas ubain sch'ella u sch'el violescha ils princips ch'èn enumerads en l'autodecleraziun, sto ella u el far quint cun sancziuns rigurusas (privaziun da l'incumbensa, chasti convenziunal sco er exclusiun da mintga acquisiziun futura fin a 5 onns). Ultra da quai pussibilitescha la legislaziun da submissiun vertenta – grazia als criteris d'agiudicaziun correspundents – da tegnair quint dals aspects da la persistenza tar la surdada da l'incumbensa, e quai tant areguard l'economia e l'ecologia sco er areguard dumondas socialas.
Pli difficil è dentant – quai sto vegnir admess qua – l'execuziun da la lescha en in mund da lavur ch'è caracterisà da la globalisaziun: la controlla dals process da producziun da rauba resp. da las cundiziuns da lavur tar servetschs surpassa per regla las pussaivladads da l'autoritad da surdada. La controlla na vegn betg sco ultim difficultada dal fatg che la gronda part dals products (e per part er dals servetschs) passa tras process da producziun tar differentas interpresas en differents pajais u cuntegna parts da furnituras u da furniturs externs. Pervia da quai na sa laschan las relaziuns da lavur ed ils process da producziun strusch mai persequitar fin tar il cumenzament, e quai per custs giustifitgabels. Auter èsi, sch'ins po sa basar sin labels ch'èn renconuschids en general e che vegnan examinads d'organs da controlla independents.
Sa basond sin questas ponderaziuns è la regenza da l'avis che las premissas legalas per garantir las pretensiuns minimalas en il sectur da las disposiziuns e da las cundiziuns da lavur sajan gia francadas en moda suffizienta. Pervia da quai n'è la regenza betg pronta d'acceptar questa incumbensa.

Datum: 28 d'avust 2008