Dumonda Pfiffner-Bearth concernent plazzas parzialas per il cader en l'administraziun chantunala
Sessiun: 21.10.2008
Dacurt han las medias rapportà che la plazza da direcziun da l'uffizi chantunal da persunal e d'organisaziun (UPO) saja vegnida occupada cun in pensum dad 80 pertschient. En l'artitgel da gasetta correspundent è er vegnì cità signur cusseglier guvernativ Schmid. Da sias remartgas pon ins concluder ch'el na saja betg cunter plazzas parzialas, sch'i vegnia mo lavurà en moda correcta ed effizienta. Nus avain gia fatg attent pliras giadas en il cussegl grond – l'ultima giada en connex cun il rapport da famiglia – ch'i duessan en mintga cas vegnir examinadas plazzas da lavur parzialas en l'administraziun chantunala er sin nivel dal cader e ch'ellas duessan vegnir introducidas uschenavant ch'igl è pussaivel. Tant pli ans legra quest artitgel en la gasetta.
Las sutsegnadras ed ils sutsegnaders supplitgeschan perquai la regenza da respunder las suandantas dumondas:
1. È l'occupaziun da la plazza da direcziun dal UPO cun in pensum dad 80 pertschient ina decisiun da princip resp. in signal per stgaffir en il futur plazzas parzialas er sin nivel dal cader?
2. Vegnan posiziuns da cader publitgadas en il futur gia cun l'infurmaziun davart la pussaivladad per in'occupaziun parziala u da jobsharing?
Cuira, ils 21 d'october 2008
Pfiffner-Bearth, Locher Benguerel, Meyer Persili (Cuira), Arquint, Baselgia-Brunner, Bucher-Brini, Frigg, Gartmann-Albin, Jäger, Menge, Pfenninger, Thöny, Trepp, Michel (Cuira)
Resposta da la regenza
La dumonda concerna l'occupaziun d'ina funcziun da cader cun in pensum parzial u en furma da jobsharing. En cas dal jobsharing sa partan duas u pliras persunas sco communitad ina plazza da lavur e portan cuminaivlamain la responsabladad per l'adempliment da las incumbensas da la plazza respectiva.
Tar las dumondas:
1. I constat che la regenza ha engaschà il nov manader da l'uffizi da persunal cun in grad d'occupaziun dad 80 pertschient. La regenza ha concludì quest grond pensum parzial en il senn d'ina excepziun e senza crear in pregiudizi per l'occupaziun da posiziuns da cader superiuras. Il princip dad occupar plazzas da cader superiuras cun ina persuna cun in pensum cumplain vegn mantegnì er en il futur. Motivs sco la meglra cuntanschibladad da la titulara u dal titular da la plazza per la persuna superiura, per las collavuraturas e per ils collavuraturs subordinads sco er per la clientella interna ed externa, sco la circulaziun d'infurmaziuns pli simpla u sco l'adempliment pli speditiv da las incumbensas pledan en favur da quai. La regenza è pronta da concluder – en consideraziun da circumstanzas spezialas – excepziuns da quest princip er en il futur.
2. Tenor l'avis da la regenza na duessan posiziuns da cader superiuras da princip betg vegnir occupadas en furma da jobsharing. Ils dischavantatgs da quest model na s'accordan per regla betg cun las pretensiuns directivas da la regenza. La responsabladad per ina incumbensa (ina plazza) na po betg vegnir dividida. L'element central da manar en moda effizienta resta il fatg da pudair surdar cleramain la responsabladad per ina incumbensa. Ulteriurs dischavantatgs da quest model directiv èn ils fatgs che la cuntanschibladad da la singula persuna è restrenschida, che la circulaziun d'infurmaziuns vegn engrevgiada sco er ch'ils custs e che la lavur da communicaziun e da coordinaziun s'augmentan. Auter sa preschenta la situaziun, sch'ina incumbensa po vegnir dividida en duas differentas parts ed uschia en dus secturs da responsabladad. Quai sa numna jobsplitting. En singuls cas exista quest model en l'administraziun chantunala. Sin fundament dals dischavantatgs che predomineschan, na duain posiziuns da cader er en il futur per regla betg vegnir publitgadas cun ina infurmaziun davart la pussaivladad per in'occupaziun parziala u en furma da jobsharing.
19 da november 2008