Navigation

Inhaltsbereich

Dumonda Castelberg-Fleischhauer concernent l'augment dal volumen dal traffic pesant sin la A13 pervia da deviaziuns dal traffic da la ruta dal Gottard a la ruta dal San Bernardin

Sessiun: 21.10.2008
Il december 1967 è vegnì avert il tunnel dal San Bernardin. Quest eveniment è vegnì festivà da la populaziun. Quella giada eran ins superbi da quest nov gnerv vital – la N13 – tras nossa regiun.

Ils onns 1996 fin 2006 è il tunnel dal San Bernardin – cun sia lunghezza da 6,6 kilometers – vegnì sanà per ca. 236 milliuns francs.

La populaziun per lung da la A13 sa senta disturbada pli e pli fitg tras l'augment da las immissiuns che vegnan chaschunadas, perquai ch'il traffic vegn devià pli e pli savens da la ruta dal Gottard a la ruta dal San Bernardin.

A Giuvaulta ed a Grono èn installadas – per lung da la A13 – staziuns da mesiraziun da l'uffizi per la natira e l'ambient dal Grischun.

Savend che la confederaziun è cumpetenta per la rait da vias naziunalas, ans permettain nus da tschentar las suandantas dumondas:
1. Sa mussa l'augment dal volumen da traffic tar las mesiraziuns?
2. Po il chantun contribuir insatge per reducir las immissiuns?
3. Pudess ins far quint cun il sustegn dal chantun Grischun, en cas ch'i vegnissan – en cooperaziun cun las vischnancas – construidas paraids da protecziun cunter la canera u messas cuvridas che absorbeschan il tun?
4. En intgins onns duai il tunnel dal Gottard vegnir serrà per plirs onns e vegnir sanà totalmain. Datti in concept da traffic per la A13 durant quest temp?

Cuira, ils 21 d'october 2008

Castelberg-Fleischhauer, Stoffel, Fasani, Bleiker, Brüesch, Buchli, Campell, Casparis-Nigg, Casty, Christoffel-Casty, Clavadetscher, Feltscher, Florin-Caluori, Giovanoli, Hardegger, Heinz, Jenny, Keller, Kleis-Kümin, Mani-Heldstab, Märchy-Michel, Marti, Montalta, Nigg, Parolini, Pedrini, Plozza, Quinter, Righetti, Rizzi, Sax, Stiffler, Toschini, Vetsch (Claustra Vitg), Wettstein, Grass (Urmagn)

Session: 21.10.2008
Vorstoss: rg Anfrage

Resposta da la regenza

Il chantun Grischun sa stenta permanentamain da reducir las immissiuns ch'il traffic da la via naziunala chaschuna per la populaziun. Uschia han pudì vegnir realisadas ils ultims onns differentas installaziuns da protecziun cunter la canera per lung da la via naziunala A13. Cun l'intent da minimar vinavant la grevezza da canera han l'uffizi per la natira e l'ambient (UNA) e l'uffizi da construcziun bassa (UCB) sclerì ulteriuras mesiras da protecziun cunter la canera e resumà quellas en in rapport. L'impuls è resultà dal spustament dal traffic sin la ruta dal San Bernardin, durant ch'il Gottard era serrà. Displaschaivlamain ha la confederaziun refusà las ulteriuras mesiras ch'eran vegnidas dumandadas.

Cun la NGF èn las vias naziunalas vegnidas suttamessas per il 1. da schaner 2008 a la cumpetenza unica da la confederaziun. La realisaziun da mesiras che duain sminuir las emissiuns per lung da la A13 è – dapi lura – chaussa da la confederaziun. L'uffizi federal da vias (UVIAS) decida pia definitivamain davart la necessitad d'eventualas mesiras. En quest connex sa tegna ella strictamain vi dals criteris dal surpassament da las limitas da grevezza.

Davart las dumondas concretas s'exprima la regenza sco suonda:

1. En cas da las substanzas nuschaivlas en l'aria mussan las mesiraziuns dal UNA – sco spetgà – in connex cun il volumen da traffic: dapli traffic ch'igl ha e pli contaminada che l'aria è. Sch'il traffic sa dublegia, s'augmentan las substanzas nuschaivlas en l'aria (NO2 e PM10) ch'èn relevantas tenor l'ordinaziun per mantegnair l'aria pura (OAP) per circa la mesadad. L'influenza dal traffic sin la contaminaziun da l'aria dependa dentant dal lieu e da la stagiun e plinavant da la topografia e da l'aura. L'influenza dal traffic sin la contaminaziun da l'aria è sa manifestada spezialmain bain ils onns 2001 (october fin december) e 2006 (zercladur) durant las deviaziuns da la A2 che han durà plirs mais.

Il livel per giuditgar la canera reagescha dentant mo pauc, sch'il volumen da traffic sa mida. Uschia sto il traffic sa dublegiar, per che quest livel s'augmentia per 3 decibels.

2. Da sai anor na po il chantun ordinar directamain naginas mesiras dal manaschi e mesiras architectonicas che reduceschan las immissiuns per lung da la via naziunala. Cun in'observaziun permanenta da l'ambient vegn el dentant a persequitar il svilup. Ed en cas che las prescripziuns legalas vegnan surpassadas, vegn el ad intervegnir.

3. Las mesiras ch'èn necessarias per lung da la A13 tenor il dretg da l'ambient ston vegnir realisadas e finanziadas dal UVIAS. Sche las vischnancas prendan mesiras voluntaras, na presta il chantun naginas contribuziuns finanzialas. Percunter porscha el in sustegn professiunal, sch'i sa tracta da liquidar las proceduras da permissiun necessarias.

4. Actualmain na datti betg anc in concept da traffic per la A13 per il temp da las lavurs da renovaziun en il tunnel dal Gottard. La regenza vegn a s'engaschar a temp tar la confederaziun, insistind ch'ella restrenschia uschenavant sco pussaivel las consequenzas negativas che resultan dal volumen da traffic supplementar.

5 da schaner 2009