La regenza s'occupa gia dapi in temp pli lung cun la tematica che vegn preschentada en la revista ed en la perspectiva dal "Concept directiv per l'economia 2010" (actualisaziun dal CDE). L'onn 2007 ha ella dà incumbensas correspundentas per avair las basas da decisiun necessarias. Da quellas èsi resultà che l'economia grischuna duess avair ina creschientscha annuala da 2 pertschient per pudair mantegnair a vista mesauna il dumber d'abitantas e d'abitants sco er il bainstar en il chantun. La regenza sustegna questas ponderaziuns ed è pronta da prender per mauns las midadas necessarias. Questas midadas – che pon er signifitgar ina renunzia – ston dentant avair il sustegn da las burgaisas e dals burgais sco er dal parlament, sch'ellas duain vegnir realisadas cun success. Il stadi po dar stimuls e meglierar cuntinuadamain las cundiziuns generalas, ils impuls u las iniziativas da creschientscha sco tals dentant ston partir da las acturas e dals acturs privats.

1) La regenza sustegna da princip las conclusiuns per il rom politic economic da l'actualisaziun dal CDE. Ella beneventa che l'economia è pronta da concepir politicamain ed activamain la via communabla.

2) Abstrahà da las consequenzas che resultan a curta vista da la crisa che s'extenda svelt sin l'economia reala, mantegnan las enconuschientschas ch'èn vegnidas fatgas sin basa dals studis ch'èn avant maun (BAK 2007, CS 2007, actualisaziun dal CDE) lur valaivladad fundamentala. Uschia èn avant maun analisas avunda, la situaziun da partenza economica è clera. Quai vala er per ils deficits structurals existents. In nov giudicament da la situaziun n'è betg necessari ord vista da la regenza.

3) Las direcziuns ch'èn vegnidas identifitgadas en l'actualisaziun dal CDE e las prioritads da svilup (PS) dal program da la regenza 2009-12 (PR) van en la medema direcziun, perquai che tuttas duas sa basan sin ils medems studis e sin las medemas infurmaziuns. 18 da 28 PS dal PR tangheschan direcziuns ch'èn tematisadas en l'actualisaziun dal CDE. En blers secturs, nua ch'i spetgan midadas ch'èn relevantas per la creschientscha, sustegna il program da la regenza la direcziun che vegn pretendida da las federaziuns economicas. Emprims svilups positivs èn las midadas da las structuras communalas e meglieraziuns fiscalas. La refurma da la giustia ch'è vegnida deliberada dal cussegl grond va medemamain en la direcziun pretendida. Il program da construcziun da vias 2009-12, ch'è vegnì suttamess al cussegl grond, mussa che la regenza ha – ultra dal niz direct da l'infrastructura per l'economia publica – er dà la paisa correspundenta al rinforzament da l'urbanisaziun decentrala. In augment adequat dal maximum dal tschains d'aua tenor il dretg federal fin la fin da l'onn 2019 è la finamira d'ina iniziativa parlamentara actuala sin plaun federal, uschia ch'i ston vegnir dadas a curta vista pitschnas schanzas ad ina realisaziun d'agens models da tschains d'aua tenor l'economia da martgà.

4) La regenza s'engascha cuntinuadamain per ina meglieraziun da las cundiziuns economicas. En il rom da sias pussaivladads vegn ella a far quai er vinavant. Cunfins vegnan dentant mess tras las resursas che stattan a disposiziun. In augment da l'effizienza spetga ella da la realisaziun da la NGF tranter la confederaziun ed ils chantuns e da la NGF grischuna. Sche las finanzas dal chantun pon vegnir tegnidas libras da debits malgrà la crisa economica actuala e sch'i po vegnir cuntinuà cun las refurmas tenor la direcziun identifitgada e tenor ils PS dal PR, sa megliereschan las cundiziuns generalas economicas er en l'avegnir.
Cun agid d'in monitoring da la conjunctura observa la regenza cuntinuadamain la situaziun economica en noss chantun. Sco ch'igl è vegnì communitgà gia la fin da schaner 2009, è la regenza pronta da preschentar in pachet per la promoziun da la conjunctura, uschespert che la situaziun economica en il chantun pretenda quai.
Davart questas activitads vegn la regenza a rapportar en il rapport ordinari davart il program annual e davart il program da la regenza.

En il senn da questas explicaziuns è la regenza pronta d'acceptar questa incumbensa.

6 da mars 2009