Navigation

Inhaltsbereich

Dumonda Valär concernent l'utilisaziun da la laina en il Grischun

Sessiun: 09.12.2008
Il lain sco materia prima e sco resursa natirala da gronda impurtanza ha in potenzial che n'è anc betg exaurì en il chantun Grischun e che pudess contribuir directamain a stgaffir novas plazzas da lavur en las regiuns. Differentas interprendidras e differents interprendiders han fatg investiziuns per augmentar l'effizienza en connex cun la chadaina da laina. Tuttina poi vegnir constatà ch'il potenzial ch'il guaud ha en il Grischun na vegn betg utilisà cumplainamain.

Las structuras dals manaschis forestals s'orienteschan per gronda part vi dals cunfins communals. En la gronda part dals cas han las vischnancas structuras memia pitschnas per stgaffir las premissas infrastructuralas per utilisar effizientamain la laina. Las vischnancas stuessan sviluppar strategias per pussibilitar en la vischnanca resp. en il chantun ina valurisaziun uschè gronda sco pussaivel. Pia pudessan vegnir stgaffidas structuras regiunalas ch'èn pli effizientas e pli efficazias (gruppas forestalas regiunalas, racolta mecanisada da laina tras interpresas forestalas).

Actualmain vegnan utilisads circa 340'000 m3 laina dal tagl annual da 350'000 m3. Sch'i vegn deducì da quai la laina da feglia che vegn duvrada directamain sco er la laina per l'industria e la laina dad arder, importa la part da la laina da dascharina che po vegnir elavurada circa 270'000 m3. Sch'i vegn deducì da quai la part da laresch, da tieu e da schember, restan 230'000 m3 laina radunda da pign e d'aviez per la resgia. Da quels èn vegnids furnids 70'000 m3 l'onn 2007 (ca. 90'000 m3 l'onn 2008) a la firma Stallinger Swiss Timber SA (da nov Mayr - Melnhof Holz Gruppe).

A la firma Stallinger Swiss Timber SA è vegnida garantida ina furniziun annuala da – en media – 200'000 m3 laina radunda dal Grischun per la resgia. La SELVA ha eruì questa quantitad en stretga collavuraziun cun las proprietarias e cun ils proprietaris da guaud. Questa quantitad è vegnida documentada da las singulas proprietarias e dals singuls proprietaris da guaud cun suttascriver ina decleraziun d'intenziun. Quai ha sustegnì la decisiun positiva da promoziun che la regenza ha prendì. Per il mument sto quella vegnir giuditgada pir dretg sco decisiva e sco buna. Perquai che questa quantitad da laina annuala na vegn anc betg furnida da las vischnancas, è il rembursament da l'emprest da daners chantunals tras la firma Stallinger Swiss Timber SA en retard.

Da quest fatg poi vegnir devià in basegn d'agir. D'ina vart stoi vegnir empruvà da motivar las proprietarias ed ils proprietaris da guaud da furnir dapli laina a la firma Stallinger Swiss Timber SA (Mayr - Melnhof Holz Gruppe), da l'autra vart stuess vegnir augmentada l'utilisaziun totala en il chantun.

L'uffizi forestal s'occupa primarmain d'incumbensas dal suveran. La responsabladad dal guaud d'utilisaziun è sulettamain chaussa da las proprietarias e dals proprietaris da guaud, q.v.d. en il chantun Grischun spezialmain da las vischnancas.

Il chantun sto far sforzs pli gronds per cuntanscher la finamira da l'utilisaziun da la laina respectivamain dal tagl annual e – collià cun quai – per promover la creaziun da plazzas da lavur en las regiuns. Sche tut las parts che stattan en connex cun la chadaina da laina vegnan promovidas, è quai en l'interess da tuttas e da tuts e gida decisivamain a stgaffir plazzas da lavur supplementaras, e quai er en valladas periferas.

Nus supplitgain pervia da quai la regenza da respunder las suandantas dumondas:

1. Ha la regenza ils instruments per garantir ch'il potenzial da resursas ch'è avant maun possia vegnir numerà e valurisà e fa ella quint da stgaffir eventualmain tals instruments?

2. È la regenza pronta d'introducir mesiras che gidan ad intensivar l'utilisaziun da la laina respectivamain che contribueschan ad utilisar il potenzial da la laina sco resursa en moda pli effizienta ed efficazia en la chadaina da laina, per pudair extender e garantir plazzas da lavur en las regiuns?

3. È la regenza pronta d'analisar la dumonda da las structuras e da la repartiziun da las incumbensas tranter il chantun e las vischnancas en connex cun la cultivaziun dal guaud e da prender mesiras che sa basan sin questa analisa e che gidan ad optimar l'utilisaziun da la laina ed a sclerir la responsabladad en questa dumonda?

4. Tge quinta la regenza da far plinavant per garantir che las proprietarias grischunas e ch'ils proprietaris grischuns da guaud sajan motivads da furnir a la firma Stallinger Swiss Timber SA resp. a la Mayr - Melnhof Holz Gruppe la quantitad concludida da laina radunda per la resgia?

Cuira, ils 9 da december 2008

Valär, Sax, Thomann, Arquint, Bezzola (Zernez), Blumenthal, Bundi, Candinas, Castelberg-Fleischhauer, Clavadetscher, Conrad, Darms-Landolt, Dermont, Fasani, Federspiel, Feltscher, Geisseler, Giovanoli, Hartmann (Champfèr), Jenny, Krättli-Lori, Kunz (Cuira), Loepfe, Mani-Heldstab, Meyer-Grass (Claustra Vitg), Michel (Tavau Monstein), Parolini, Perl, Pfäffli, Pfister, Quinter, Rizzi, Stiffler, Stoffel, Tenchio, Thurner-Steier, Toschini, Tuor, Engler, Furrer-Cabalzar, Hauser, Märchy-Caduff (Domat), Patt

Session: 09.12.2008
Vorstoss: rg Anfrage

Resposta da la regenza

Il lain sco materia prima è ina da las resursas natiralas las pli impurtantas dal chantun Grischun. La regenza è er da l'avis che quest potenzial correspundent stoppia sche pussaivel vegnir tratg a niz cumplainamain. Uschia pon vegnir stgaffidas novas plazzas da lavur e la capacitad da rendita en las regiuns po vegnir rinforzada. Las dumondas concretas po la regenza respunder sco suonda:

1. L'instrument il pli impurtant per valurisar e per numnar il potenzial da las resursas ch'èn avant maun en cifras è il plan da manaschi forestal. Tut las proprietarias e tut ils proprietaris dals guauds che han ina surfatscha da passa 40 hectaras ston far in tal plan da manaschi. Quest plan cuntegna tut ils indicaturs decisivs davart l'utilisaziun da la laina. El è sa cumprovà bain en la pratica. Ulteriurs instruments n'èn pervia da quai betg necessaris.

2. L'exauriziun dal tagl annual (da la quantitad da la laina che po vegnir utilisada en moda persistenta) dependa decisivamain dals pretschs dal martgà. Ils pretschs da laina èn – suenter ina perioda pli lunga – puspè s'augmentads la fin da l'onn 2006. L'onn 2007 ha pervia da quai pudì vegnir utilisà l'entir tagl annual. La regenza parta dentant l'avis che l'utilisaziun da la laina sco materia prima sto vegnir promovida. En il center stattan en quest connex ina reducziun dals custs da producziun meglierond l'avertura dal guaud sco er la promoziun da la collavuraziun intermanaschiala e la concentraziun dal deposit da lain da vender. Questas ed ulteriuras mesiras da promoziun èn pervia da quai vegnidas menziunadas en il program da la regenza ed en il plan da finanzas dals onns 2009 fin 2012.

3. In'emprima analisa da la repartiziun da las incumbensas tranter il chantun e las vischnancas resp. las instituziuns ch'èn responsablas per ils reviers ha la regenza gia fatg en il rom dal project "NGF grischuna". La finamira en quest connex è quella d'extender la libertad d'agir da las vischnancas resp. da las instituziuns ch'èn responsablas per ils reviers. A quellas duain da nov vegnir surdadas incumbensas suveranas da surveglianza, da controlla e d'execuziun. L'indemnisaziun da questas incumbensas vegn reglada en il rom da cunvegnas da prestaziun. In basegn d'agir datti dentant er tar las structuras da las instituziuns ch'èn responsablas per ils reviers. Questa problematica è dentant colliada stretgamain cun l'adattaziun da las structuras da las vischnancas ch'è previsa. Pervia da quai sto quella vegnir prendida per mauns en emprima lingia en quest connex. Ord vista da la regenza duess ina vischnaca "optimala" pudair ademplir autonomamain e senza ina collavuraziun intercommunala incumbensas elementaras sco la scola, ils pumpiers ed er la selvicultura.

4. La quantitad da laina radunda or dals guauds dal Grischun che po vegnir elavurada da la resgia a Domat importa circa 220'000 m3. Cun ina quantitad da laina da circa 70'000 m3 ha la resgia duvrà l'emprim onn da sia gestiun circa in terz da la part dal martgà. Questa part relativamain pitschna po vegnir declerada cun la dumonda da laina radunda ch'è dapi l'onn 2007 permanentamain gronda. Il martgà da vendidras e da vendiders ch'è s'etablì uschia ha chaschunà che blera laina radunda dal Grischun è vegnida vendida a l'exteriur vischin. Las proprietarias ed ils proprietaris da guaud èn numnadamain libers da decider a tgi ch'ellas e ch'els vulan vender lur laina radunda. Per regla survegn l'agiudicaziun quel che offra il meglier pretsch. La regenza na po e na vul da princip betg influenzar quest martgà liber. En il rom da sias pussaivladads vegn ella dentant a s'engaschar che la resgia da Domat possia s'etablir sco partenaria fidada da las proprietarias grischunas e dals proprietaris grischuns da guaud.

Il lain sco materia prima e sia utilisaziun valurisanta en l'entira chadaina da laina è per il Grischun in potenzial impurtant che generescha valurs. Quest potenzial sto vegnir nizzegià. Il guaud ademplescha dentant er funcziuns impurtantas da protecziun e da bainstar. Questas funcziuns ston vegnir accordadas ina cun l'autra en ina moda che correspunda als basegns.

13 da mars 2009